Dainik Maval News : मावळ विधानसभा मतदारसंघातील अपक्ष उमेदवार अण्णा उर्फ बापूसाहेब भेगडे यांना पवन मावळ, नाणे मावळनंतर आंदर मावळातही नागरिकांचा मोठा प्रतिसाद मिळला आहे. आंदर मावळमध्ये पर्यटन व्यवसाय वाढवून तरुणांना मोठी रोजगारनिर्मिती करण्यासाठी आपण बांधील असणार आहोत, असे आश्वासन बापूसाहेब भेगडे यांनी तरुणांना दिले. विद्यमान आमदाराचे गेल्या पाच वर्षात जनतेच्या प्रश्नांकडे कमालीचे दुर्लक्ष झाल्याने आंदर मावळमधील समस्या वाढतच चालल्या आहेत.
बापूसाहेब भेगडे यांनी आज शनिवारी आंदर मावळातील पिंपरी, माळेगाव बुद्रुक, कुणेवाडी, कुणे, अनसुटे (मानकुली) पारिठेवाडी, इंगळून, किवळे, कशाळ, भोयरे, कोंडीवडे, कल्हाट, पवळेवाडी, निगडे, आंबळे, कदमवाडी, शेटेवाडी, शिरे, मंगरूळ, गोळेवाडी आदी गावांना भेट देत प्रचारदौरा केला. यावेळी महिलांनी औक्षण करीत विजय तिलक लावला.
राष्ट्रवादी काँग्रेसचे तालुकाध्यक्ष दत्तात्रय पडवळ, मनसेचे तालुकाध्यक्ष रुपेश म्हाळसकर, माजी उपसभापती शांताराम कदम, शिवाजी आसवले, गणेश कल्हाटकर, शिवाजीराव पवार, अतिश परदेशी, बाबाजी गायकवाड, रोहिदास आसवले आदींसह ग्रामस्थ, आजी-माजी सरपंच, विविध कार्यकारी सोसायटीचे आजी-माजी सदस्य, नागरिक मोठ्या संख्येने उपस्थित होते.
प्रचार भेटीदरम्यान नागरिकांनी आपल्या समस्या मांडल्या. आपण समस्या सोडविण्यास बांधील असल्याचे आश्वासन देत बापूसाहेब भेगडे म्हणाले, की विद्यमान आमदार आदिवासी विद्यार्थ्यांसाठी वसतिगृह बांधून देणार होते. मात्र, त्याचे पुढे काय झाले ? पाच वर्षात शेतीला पाणी पुरवता आले नाही. जवळ धरण असतानाही शेतीला पाणी मिळत नसल्याने शेतकरी वर्ग नाराज आहे. आपण प्रथम शेतकऱ्यांना पाण्याची व्यवस्था करू.
2019 ला मी एक वेगळा प्रयोग केला. पण तो प्रयोग फसला. गावकी भावकीचा विचार न करता झोकून देऊन सुनील शेळके यांचे काम केले होते. मात्र, ‘एकदाच आमदार करा ‘ हा शब्द त्यांनी न पाळता मोठा विश्वासघात केला. ही माझी मोठी चूक होती. मावळातील सर्व पक्ष मतप्रवाह विसरून माझ्यामागे ठामपणे उभे राहिले आहेत. त्यामुळेच पैशाची गुर्मी व सत्तेची मस्ती जिरवल्याशिवाय आपण स्वस्थ बसणार नाही. – बापूसाहेब भेगडे, अपक्ष उमेदवार, मावळ विधानसभा
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– मावळची संस्कृती बिघडत चालल्याने सर्व पक्ष एक झाले – बापूसाहेब भेगडे । Bapu Bhegade
– पोलिसांनी जप्त केलेली रक्कम माझ्या व्यवसायाची, विरोधकांनी दबाव आणून कारवाई करण्यास भाग पाडले – सचिन मुऱ्हे
– मावळात राष्ट्रवादीच्या नेत्याच्या कार्यालयातून 36 लाखांची रोकड जप्त, सोमाटणे येथे मोठी कारवाई । Maval Crime
