Dainik Maval News : श्रीक्षेत्र पंढरपूर येथे देवदर्शनासाठी गेलेल्या मावळ तालुक्यातील भाविकांच्या बसचा भीषण अपघात झाला आहे. प्राप्त माहितीनुसार हे सर्व भाविक मावळ तालुक्यातील नाणे, लोणावळा भागातील असून एका खासगी ट्रॅव्हल बसने सर्वजण पंढरपूरकडे गेले होते. भटुंबरे गाव (ता. पंढरपूर, जि. सोलापूर) येथे त्यांच्या बसचा आणि ट्रकचा भीषण अपघात झाला. यात बसमधील सर्व प्रवासी जखमी झालेत. यापैकी दोन जण जागेवरच गतप्राण झाल्याची माहिती मिळत आहे.
आज, रविवारी (दि. 29 डिसेंबर) सकाळी 6.15 वाजताच्या सुमारास हा अपघात घडला. ट्रॅव्हल्समध्ये मावळ तालुक्यातील एकूण 34 भाविक होते. त्यापैकी अपघातात 2 जण मृत पावले असून 12 जण गंभीररित्या जखमी असून त्यांना सोलापूर सिविल हॉस्पिटलला पाठविण्यात आले आहे. 20 जणांवर पंढरपूर सिविल हॉस्पिटल येथे उपचार सुरू आहेत, अशी माहिती नाणे मावळचे तलाठी विजय चव्हाण व पोलीस पाटील दत्ता वाल्हेकर यांनी दिली.
प्राप्त माहितीनुसार, सोलापूर जिल्ह्याच्या पंढरपूर तालुक्यातील भटुंबरे गावात हा अपघात घडला. मावळमधील भाविकांच्या बस आणि ट्रकची समोरासमोर धडक झाली. अपघात इतका तीव्र होता की यात बस आणि ट्रकच्या समोरील भागाचा चक्काचूर झाला. अपघातात दोन जणांचा जागीच मृत्यू झाला. या दोन्ही व्यक्ती नाणे (मावळ) येथील आहेत. तर इतर 32 जण जखमी असल्याची माहिती मिळत आहे. जखमींना स्थानिक रुग्णालयात उपचासाठी नेण्यात आले आहे.
राजनंदनी ट्रॅव्हल्सची बस नाणे (मावळ) येथील प्रवाशांना घेऊन जात होती. दरम्यान समोरून येणाऱ्या ट्रकला बसची धडक बसली. दोन्ही वाहने वेगात असल्याने दोन्ही गाड्यांच्या समोरील भागाचे मोठे नुकसान झाले. यात बसच्या केबिनचा तर चक्काचूर झाला. अपघात दोन प्रवाशांचा जागीच मृत्यू झाला, तर काहीजण गंभीर जखमी झाले.
अपघातानंतर स्थानिक नागरिकांनी घटनास्थळी धाव घेत जखमी प्रवाशांना बाहेर काढलं. जखमींवर स्थानिक रुग्णालयात उपचार सुरू आहेत. बस आणि ट्रकच्या धडकेमुळे रस्त्यावर मोठ्या प्रमाणावर वाहतूक कोंडी झाली होती. दोन्ही बाजुने वाहनांच्या रांगा लागल्या होत्या. अपघातग्रस्त वाहने रस्त्यातून बाजुला करण्यात आली आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– श्री खंडोबा देवाच्या सोमवती यात्रेच्या अनुषंगाने सोमवारी 30 डिसेंबर रोजी वाहतूक मार्गात मोठा बदल – जाणून घ्या
– थर्टी फर्स्ट, नववर्षाच्या स्वागतासाठी पवना धरण परिसरात येण्याचा प्लॅन करताय ? आधी ही बातमी वाचा । Pavana Nagar News
– विजयस्तंभ अभिवादन कार्यक्रमानिमित्त पुणे जिल्ह्यातील वाहतुकीत मोठा बदल ; पाहा कोणते मार्ग बंद, कोणते सुरु
