Dainik Maval News : लोणावळा नगरपरिषदेकडून सांडपाण्यावर योग्य प्रक्रिया न करता ते पाणी तसेच नाल्यामध्ये सोडले जात आहे. हे सांडपाणी नाल्यातून पुढे दोन नद्यांमध्ये मिसळून जलप्रदूषण होत असल्याची गंभीर बाब उघडकीस आली आहे. याप्रकरणी महाराष्ट्र प्रदूषण नियंत्रण मंडळाने नगरपरिषदेला नोटीस बजावून कारवाई करण्याचा इशारा दिला आहे.
लोणावळा नगरपरिषदेचा सांडपाणी प्रक्रिया प्रकल्प सुरू नसल्याची बाब महाराष्ट्र प्रदूषण नियंत्रण मंडळाच्या अधिकाऱ्यांनी केलेल्या तपासणीत समोर आली. त्यामुळे मंडळाने लोणावळा नगरपरिषदेला नोटीस बजावली आहे. नोटीसीत म्हटले आहे की, नगरपरिषदेने आपल्या कार्यक्षेत्रातील सर्व सांडपाण्यावर प्रक्रिया करणे बंधनकारक आहे. प्रत्यक्षात नगर परिषदेचा सांडपाणी प्रक्रिया प्रकल्प कार्यान्वित नाही. यामुळे सांडपाणी प्रक्रिया न करता नाल्यास सोडले जात आहे. हे सांडपाणी नाल्यातून पुढे इंद्रायणी नदीत मिसळून जलप्रदूषण होत आहे.
नगरपरिषदेने सांडपाणी प्रक्रिया प्रकल्पासाठी स्वतंत्र वीजजोडणी घेतली नसल्याची बाब उघडकीस आली आहे. नगरपरिषदेकडून वेगवेगळ्या नाल्यांतून सांडपाणी प्रक्रिया न करता सोडले जात आहे. हे सांडपाणी पुढे इंद्रायणी आणि उल्हास नद्यांमध्ये मिसळून मोठ्या प्रमाणात जलप्रदूषण होत आहे. याप्रकरणी नगरपरिषद आणि संबंधित अधिकाऱ्यांवर कायदेशीर कारवाई का करू नये, अशी विचारणा मंडळाने केली आहे.
राष्ट्रीय हरित न्यायाधिकरणाच्या आदेशानुसार सांडपाण्यावर प्रक्रीया करणे बंधनकारक असून, याचे उल्लंघन केल्याप्रकरणी नगरपरिषदेला दंडात्मक कारवाईला सामोरे लागू शकते, असा इशाराही मंडळाने दिला आहे. त्यामुळे, लोणावळा नगर परिषदेकडून सांडपाण्यावर प्रक्रिया न करता ते नदीत सोडले जात असल्याने जलप्रदूषण होत असून या प्रकरणी नगरपरिषदेला नोटीस बजाविण्यात आली आहे, तसेच उत्तर देण्यास 15 दिवसांचा कालावधी देण्यात आला आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– अल्पवयीन मुलीवर बलात्कार प्रकरणी आरोपी तरुणाला 20 वर्षे तुरुंगवासाची शिक्षा ; वडगाव कोर्टाचा निर्णय । Maval Crime
– मोठी बातमी : इंद्रायणी नदीत बुडून मुलाचा मृत्यू… ‘तो’ बुडाला हे मित्रांनी कुणालाच सांगितले नाही, पोलिसांनी ‘असा’ घेतला शोध
– भरधाव वाहनाच्या धडकेत दुचाकीस्वार गंभीर जखमी, मावळातील बधलवाडी येथील घटना । Maval Accident News
