मावळातील रस्त्यांच्या कामाचे थर्ड पार्टी ऑडिट करा, बैलगाडा घाटासाठी निधीची तरतूद करा ; आमदार सुनिल शेळके यांची सूचना

Dainik Maval News : मावळ तालुक्यातील पीएमआरडीए अंतर्गत येणाऱ्या विविध विषयांसंदर्भात पीएमआरडीए आयुक्त योगेश म्हसे यांच्या उपस्थितीत विशेष बैठक संपन्न झाली. या बैठकीत पीएमआरडीए अंतर्गत मावळ तालुक्यात झालेल्या रस्त्यांच्या कामांबाबत चर्चा झाली. या रस्त्यांच्या कामाच्या गुणवत्तेबाबत तक्रारी येत असून कामाचा दर्जा सुधारण्याची गरज आहे. या कामांचे थर्ड पार्टी ऑडिट करण्यात यावे, अशी सूचना आमदार सुनील शेळके यांनी यावेळी केली.

यासह इंद्रायणी व पवना नदी या दोन्ही नदी सुधार प्रकल्पांचे आराखडे तयार करून शासनास सादर करावेत. नद्यांमध्ये थेट दूषित पाणी, सांडपाणी सोडण्यात येत असेल त्या ठिकाणी एसटीपी प्लांटस बसवावेत, या कामास सुरुवात केल्यास काही प्रमाणात नदी प्रदूषणास आळा बसेल, असेही सांगितले. मावळ तालुक्यातील ऐतिहासिक तलावांचे पुनरुज्जीवन व सुशोभीकरणासाठी पीएमआरडीएच्या माध्यमातून निधीची तरतूद व्हावी. तसेच ग्रामीण भागात बैलगाडा घाट, देवस्थान परिसरातील सुशोभीकरण यासाठी देखील निधीची तरतूद करण्याबाबत अधिकाऱ्यांनी सकारात्मक प्रतिसाद दिला आहे.

मावळ तालुक्यात मोठे गृह प्रकल्प उभारले जात आहेत. अनेक ठिकाणी विकसकांकडून संपूर्ण भौतिक सुविधा दिलेल्या नसतानाही पूर्णत्वाचा दाखला देण्यात येतो. अशा प्रकल्पांबाबत अनेक तक्रारी प्राप्त झाल्या असुन सदनिकाधारकांना रस्ते, पाणी, वीज अशा सुविधा मिळत नसल्यामुळे नाहक त्रासाला सामोरे जावे लागत आहे. यापुढे प्रकल्पांना पूर्णत्वाचा दाखला देताना प्रत्यक्ष स्थळ पाहणी करून सर्व गोष्टींची शहानिशा करुनच दाखले द्यावेत व या प्रक्रियेची तात्काळ अंमलबजावणी व्हावी अशी मागणी सुनील शेळके यांनी केली.

सदर बैठकीला आमदार सुनील शेळके यांसह मुख्य अभियंता अशोक भालेकर, सल्लागार विवेक खरवडकर, कार्यकारी अभियंता वसंत नाईक, वरिष्ठ अभियंता सुजय शेवाळे, नगररचना उपसंचालक सोनाली आहेर, एकविरा देवस्थान ट्रस्टचे अध्यक्ष दिपक हुलावळे, माजी नगराध्यक्ष कारके, माजी नगरसेवक सुदर्शन खांडगे, मारुती देशमुख, संजय बाविस्कर व इतर अधिकारी उपस्थित होते.

( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– सलग सुट्ट्यांमुळे द्रुतगती मार्गावर अवजड वाहनांच्या वाहतूक मार्गात बदल ; दुपारी बारानंतर प्रवास करावा…
– मावळात होणार हरिनामाचा गजर ! कामशेत येथे एक जानेवारीपासून भव्य ‘कीर्तन महोत्सव’ – पाहा वेळापत्रक
– महाराष्ट्रात शुक्रवार – शनिवार दोन दिवस गारपीट आणि मेघगर्जनेसह मुसळधार पावसाचा अंदाज ; सोमवारपासून थंडी वाढणार