मावळ विधानसभा मतदारसंघासह संपूर्ण राज्यातील एकूण २८८ विधानसभा मतदारसंघातील प्रचार आज (दि.१८) सायंकाळी सहा वाजता संपणार आहे. निवडणूक आयोगाच्या सुचनेनुसार संध्याकाळी सहा नंतर प्रचार करण्यास बंदी असेल. संपूर्ण राज्यात चर्चेत असणारा मावळ विधानसभा मतदारसंघ आता शेवटच्या दिवशी अधिक चर्चेत आला आहे. याचे कारण म्हणजे येथील महायुतीचे उमेदवार सुनील शेळके आणि अपक्ष उमेदवार बापूसाहेब भेगडे या दोन्ही प्रमुख उमेदवारांसाठी एकाही नेत्याने मतदारसंघात सभा घेतली नाही, की रॅली काढली नाही.
मावळ मतदारसंघातील ही लढत आमदार सुनिल शेळके यांच्यासाठी आणि त्यांचे विरोधी उमेदवार बापू भेगडे दोघांसाठी प्रतिष्ठेची आहे. आमदार सुनिल शेळके यांच्यासाठी स्वतः देवेंद्र फडणवीस यांनी मावळात प्रचारासाठी येणार, असे सांगितले होते. तर अजितदादा आपल्या लाडक्या शिलेदारासाठी मावळात सभा घेतील, अशी अपेक्षा मावळकरांना होती. परंतु असे काहीही घडले नाही.
आमदार शेळकेंनी एकट्याने लढविला किल्ला
आमदार सुनिल शेळके यांच्यासाठी एकाही नेत्याने सभा घेतली नाही. परंतु याचे एक खास कारण आता समोर आले आहे. स्वतः आमदार सुनिल शेळके यांनी सभेसाठी आग्रह धरला नसल्याची माहिती समोर येत आहे. मावळ विधानसभा मतदारसंघात आपण केलेल्या विकासकामांच्या जोरावर आणि जनतेच्या मिळणाऱ्या प्रतिसादावर आपण ही निवडणूक जिंकू असा विश्वास आमदार शेळकेंनी अजित पवार यांना दिल्याचे आणि त्यामुळे मतदारसंघात कुणीही सभा घेण्याचे नियोजन केली नसल्याची माहिती आता समोर येत आहे.
