दिनांक 6 जानेवारी 2023 ते दिनांक 7 जानेवारी 2023 रोजी लोहगड किल्ल्यावरील हाजी हजरत उमरशावली बाबा दर्ग्याचा उरूस साजरा करण्यासाठी मोठया प्रमाणात जनसमुदाय उपस्थित राहत असतो. मात्र, कायदा सुव्यवस्थेसाठी संभाव्य संघर्ष टाळण्याकरिता, लोहगड व घेरेवाडी येथे दिनांक 5 जानेवारी 2023 ते 8 जानेवारी 2023 दरम्यान फौजदारी प्रक्रिया संहिता 1973 चे कलम 144 अन्वये लोहगड आणि घेरेवाडी परिसरामध्ये प्रतिबंधात्मक आदेश जारी करण्यात आला आहे. ( Section 144 Applicable In Lohgad Gherewadi Area From 5th To 8th January Maval Pune )
दैनिक मावळचा व्हॉट्सअॅप ग्रुप जॉइन करण्यासाठी इथे क्लिक करा
काय म्हटलंय आदेशात?
पोलीस निरीक्षक लोणावळा ग्रामीण पोलीस स्टेशन यांच्या प्राप्त झालेल्या अर्जानुसार दिनांक 6 जानेवारी रोजी मौजे लोहगड (ता मावळ, जि पुणे) येथे लोहगड किल्ल्यावरील हाजी हजरत उमरशावली बाबा दर्ग्याचा उरूस साजरा करण्यासाठी मोठ्याप्रमाणात अनुयायी येण्याची शक्यता आहे. तसेच लोहगडावरील 6 जानेवारीचा उरूस साजरा होवू नये यासाठी त्यास प्रखर विरोध दर्शवण्यासाठी मावळ तालुक्यातील स्थानिक ग्रामपंचायत यांचे बजरंग दल आणि इतर संघटनांच्या भूमिकेला पाठिंबा असल्याबाबत लेखी समर्थन पत्र तहसीलदार मावळ यांना मिळाले आहे.
सदर निवेदनात आणि समक्ष चर्चेत त्यांनी लोहगडावरील दर्गा आणि मजार यांचा कोणताही ऐतिहासिक पुरावा नसलेने मा न्यायालयाचे आदेशानुसार प्रतापगडावरील अनाधिकृत बांधकाम जमिनदोस्त केले आहे, त्या प्रमाणे लोहगडावरील अनाधिकृत बांधकाम काढावे, हि बांधकामे अधिकृत करण्यासाठी उरूसाचा वापर केला जात आहे. त्यामुळे लोहगडावर उरूस होवू दिला जाणार नाही. यावर्षी कोणत्याही परिस्थितीत हा अनाधिकृत उरूस होवू देणार नाही या प्रसंगी मोठे जनआंदोलन / मोर्चा उभारू असेही सांगितले आहे.
त्यामुळे लोहगडावरील दर्ग्याचा उरूस जवळ आलेला असल्याने उरूसाला विरोध होण्याची शक्यता अधिक आहे. तसेच जातीय तणाव होण्याची शक्यता देखील नाकारण्यात येत नाही. भारतीय पुरातन विभाग पुणे यांनी देखील लोहगडावर दर्ग्याचे उरूसास परवानगी नाकारली असून त्या दरम्यान पोलीस बंदोबस्ताची मागणी केली आहे. लोहगडावरील दर्ग्याचे उरूसाचे दरम्यान हिंदू मुस्लिम समाजाचे लोक मोठया प्रमाणात उरूसाचे दरम्यान लोहगडाचे परिसरामध्ये येणेची शक्यता असल्याने कोणताही कायदा व सुव्यवस्थेचा प्रश्न निर्माण होवू नये यासाठी तात्काळ प्रतिबंधात्मक उपाययोजना म्हणून दिनांक 5 जानेवारी ते दिनांर 8 जानेवारी रोजी दरम्यान काळात लोहगड आणि घेरेवाडी या परिसरात फौजदारी प्रक्रिया संहिता 1973 चे कलम 144 लागू करण्याची गरज लक्षात घेता,
संदेश शिर्के (उपविभागीय दंडाधिकारी तथा उपविभागीय अधिकारी मावळ- मुळशी, उपविभाग पुणे) यांनी फौजदारी प्रक्रीया संहीता 1973 चे कलम 144 (1) (3) अन्वये दिनांक 6 जानेवारी 2023 रोजीच्या लोहगड किल्यावरील हजी हजरत उमरशावली बाबा दर्गाचा उरूसाचे कार्यक्रमाच्या अनुषंगाने लोहगड व घेरेवाडी परिसरामध्ये कायदा व सुव्यवस्था अबाधित राहण्यासाठी दिनांक 5 जानेवारी 2023 च्या मध्यरात्रीपासून दिनांक 8 जानेवारी 2023 च्या सायंकाळी 6 वाजेपर्यंत खालील बाबी करण्यास प्रतिबंधात्मक आदेश निर्गमित करण्यात आल्या आहेत.
1) कोणीतीही व्यक्ती इंस्टाग्राम, व्हॉटसअॅप, ट्वीटर, फेसबुक व इतर समाजमाध्यमाद्वारे अफवा, जातीय द्वेष पसरवणारे संदेश, खोटी माहीती पोस्ट करणार नाही किंवा फॉरवर्ड करणार नाही, असे केल्यास त्याबाबतची जबाबदारी संबंधित पोस्ट करणारी व्यक्ती तसेच ग्रुप अॅडमिनची राहील.
2) लोहगड व घेरेवाडी हद्दीमधील गावांमध्ये स्थानिक प्रशासन व पोलीस विभागाच्या लेखी परवानगी शिवाय सार्वजनिक ठिकाणी बॅनर, फ्लेक्स, होर्डींग लावण्यास प्रतिबंध राहील.
3) सदर परिसरामध्ये 5 पेक्षा जास्त व्यक्तीनी जमा होवू नये.
4) समाज भावना भडकवतील अशा घोषणा / भाषण करू नये.
5) सदर परिसरामध्ये मोर्चा / आंदोलन करणेत येवू नये.
6) प्रतिबंधात्मक कालावधी दरम्यान धार्मिक विधी साठी पशु पक्षांचा बळी दिला जावू नये.
7) सदर परिसरामधील ऐतिहासीक व सार्वजनिक वस्तुंचे नुकसान करणेत येवू नये.
वरील प्रतिबंधात्मक आदेशाचे उल्लंघन करणारी व्यक्ती भा.दं.वि.सं. कलम 188 मधील तरतुदी व प्रचलित कायदयान्वये शिक्षेस पात्र राहील, असे आदेश पत्र संदेश शिर्के यांच्याकडून 4 जानेवारी रोजी काढण्यात आले आहे.
अधिक वाचा –
– धक्कादायक! वाढदिवसाची पार्टी जीवावर बेतली, लोणावळ्यात स्विमिंग पूलमध्ये बुडून चिंचवडमधील युवकाचा मृत्यू
– रोटरी क्लब ऑफ तळेगाव दाभाडे सिटीतर्फे सामुदायिक विवाह सोहळ्याचे आयोजन
