शिवकालीन कालखंडातील प्रमुख प्रदेश राहिलेला आणि त्यापूर्वी किंवा त्यानंतरही ऐतिहासिक दृष्टीने अतिशय महत्वाचा राहिलेला मावळ प्रांत आणि मावळ प्रांतातील सध्याचा प्रमुख मावळ तालुका हा अभ्यासक, पर्यटक, विद्यार्थी यांच्या दृष्टीने नेहमीच केंद्रस्थानी राहतो. मावळ तालुक्यात असणारे गड-किल्ले, लेण्या, प्राचीन मंदिरे, समाधीस्थळे अशा अनेक गोष्टी अभ्यासकांना खुणावत असतात. सध्या लोणावळा येथीलच अभ्यासक दिपक पटेकर यांनी लोणावळा-खंडाळा भागातील मराठा साम्राज्य काळातील एका अज्ञात व्यक्तीची समाधी छत्री बद्दल केलेल्या लिखाणामुळे हे ठिकाण प्रकाशझोतात आले आहे. ( An Ancient Tomb Of An Unknown Person At Lonavala Khandala Maval Taluka Pune )
दैनिक मावळचा व्हॉट्सअॅप ग्रुप जॉइन करण्यासाठी इथे क्लिक करा
“लोणावळा-खंडाळा येथील मराठा कालखंडातील अज्ञात व्यक्तीची समाधी-छत्री
लोणावळा आणि खंडाळ्याच्या मधोमध जुन्या मुंबई पुणे रस्त्याच्या लगतच एका खाजगी गृह संकुलाच्या आवारात ही छत्री आहे. उत्तर मराठा कालखंडातील म्हणजे 18 व्या शतकातील मराठा वास्तूरचना-कलेतील ही वास्तू. आजूबाजूला बंगले होण्यापूर्वी ही छत्री लोणावळ्याकडून खंडाळ्यात जाताना उजव्या हाताला रस्त्यावरुनही थोड्या उंचीवर अगदी स्पष्ट दिसत असे, ही जागाच ह्या उद्देशाने निश्चित केली गेली असावी.
सोसायटीच्या आवारात असल्यामुळे नियमित झाडलोट व स्वच्छता राखली जाते. खालील भाग सपाटीकरणासाठी बांधून घेतला असल्यामुळे खाली नेमकं काय होतं/आहे, हे कळून येत नाही. शिलालेख किंवा या वास्तूबद्दल एक शब्दही माहिती करुन घेण्याची काहीही सोय येथे नाही. ही वास्तू कोणाची, कोणी बांधली हे आजूबाजूच्या लोकांना माहित नाही. (किंवा असे म्हणता येईल की, ज्या कोणाला हे माहित असावे, त्या व्यक्तीपर्यंत आम्ही पोहचू शकलो नाही.)
ही वास्तू कोणी, केव्हा, कोणासाठी, का बांधली या प्रश्नार्थक ‘क’ चे कोडे लवकरात लवकर सोडवण्याचा प्रयत्न करत आहोत. पाहुयात किती यश मिळते ते! लोणावळा-खंडाळा परिसरात मराठा कालखंडातील एक सुंदर वास्तू आहे. ठिकाण – रहेजा सोसायटी, मयूर रेट्रीट जवळ, जुना मुंबई पुणे रस्ता. (सुचना – खाजगी बंगल्यांच्या सोसायटीच्या आत हे स्मारक असल्याने, आत जाण्यासाठी परवानगी घेणे आवश्यक.) – दिपक पटेकर (9527671678)”
अधिक वाचा –
– मावळ तालुक्यातील पर्यटनाला चालना देण्यासाठी आराखड्याचे काम हाती, खासदार बारणे यांची माहिती
– मावळ तालुक्यातील सर्व पर्यटनस्थळांची यादी, वाचा एका क्लिकवर