Dainik Maval News : कामशेत येथील जुन्या पुणे-मुंबई राष्ट्रीय महामार्गालगत खिंडीजवळील टेकडीवर वृक्षारोपण करीत असताना ग्रामस्थांना जमिनीत शिवपिंड दिसून आली. वृक्षारोपणाचा खड्डा घेताना ही शिवपिंड सापडली, ज्या तरुणांना ही पिंडी निदर्शनास आली त्यांनी त्वरित इतिहास संशोधकांना बोलावून पिंड दाखविली. या घटनेमुळे कामशेत शहर परिसरात चैतन्याचे वातावरण निर्माण झाले असून शिवभक्त, ग्रामस्थ येथे दर्शनार्थ येऊ लागले आहे.
इतिहास संशोधकांनी दिलेल्या माहितीनुसार, शैव सांप्रदाय हा भारताच्या इतिहासाचा महत्वपूर्ण भाग आहे. भारतभर शिवलिंग अर्थात शिवपिंडीचे पूजन करून शैवपंथाने आपले भक्तीसुख अनुभवलेले दिसून येते. प्राचीन काळापासून शैव सांप्रदाय चालत आला असून भक्तांची मोठी परंपरा या सांप्रदायास आहे. यात उप-सांप्रदाय देखील असून विरशैव, नाथ आणि लिंगायत यांचा समावेश होतो.
- प्राचीन, मध्ययुगीन ते अर्वाचीन काळात महादेवभक्त सर्व क्षेत्रात कार्यरत असल्याचे आपल्याला सह्याद्रीमधील दुर्गांवर व परिघात असलेल्या पाण्याच्या ठिकाणावर दिसून येते. बहुतांश पाण्याच्या टाक्यावर तसेच दुर्गपरीघातील पानवठ्यावर कातळ्यास एक वित आकाराच्या पिंडी संशोधकांच्या निदर्शनास आल्या आहेत.
पवन मावळ, नाणे मावळ व आंदर मावळ असे तीन शिवकालीन मावळ मिळून आजचा मावळ तालुका बनलेला असून छत्रपती शिवाजी महाराजांनी स्वराज्य स्थापनेच्या प्रथम टप्प्यात मावळातील दुर्ग जिंकून घेतले होते. यातील प्रत्येक दुर्गावर महादेवाचे रूप असलेल्या शिवपिंडीची स्थापना महाराजांनी केली होती. आजही सर्व दुर्गांवर महादेवाची मंदिरे स्थित असून इतिहासाची साक्ष देतात.
दुर्ग सोडता मध्ययुगात अनेक मंदिरे सपाट पृष्ठभागावर देखील बांधन्यात आली. यात मावळातील वाघेश्वर मंदिर, कोंडेश्वर मंदिरासारखी अनेक मंदिरे आजही भक्तांची प्रेरक स्थाने आहेत. मात्र कालपरत्वे अनेक ठिकाणी भक्तांनी कोरून, बनवून ठेवलेल्या अनेक पिंडी मातीखाली गेल्या. इतिहास बुजला गेला. लोहगडावरील नंदी कुणी अज्ञाताने चोरून नेला किंवा खाली ढकलून दिला. अशा घटना होत असल्या तरी यातूनही नव्याने काही ठिकाणी सह्याद्रीचा इतिहास, श्रद्धा व आस्था असलेल्या पिंडी, समाधी शिलालेख समोर येत आहे हे मोठे सकारात्मक चित्र आहे.
कामशेत येथील नव्याने उजेडात आलेली शिवपिंडी एक अस्सल ऐतिहासिक मध्ययुगीन पिंडी असून कालौघात मातीखाली गेली होती. या पिंडीचा अभ्यास केल्यानंतर तिचा काळ मध्ययुग येत असल्याचे निदर्शनास आले. खडकाळा हा ऐतिहासिक भाग असून येथील खिंडीत जनमानसाचे भक्तीस्थान असलेले महादेवाचे जुने देवस्थान होते हे समोर येत आहे. – डॉ. प्रमोद बोराडे, इतिहास संशोधक
“संकल्प से सिद्धी तक” या कार्यक्रमांतर्गत कामशेत शहरात भारतीय जनता पार्टी वडगाव कामशेत आंदर मावळ मंडलच्या वतीने वृक्षारोपण कार्यक्रम चालू असताना झाडे लावण्यासाठी खड्डा घेत असताना त्यात शिवलिंग दिसून आले. शिवलिंग असल्यामुळे आम्ही इतिहासकार याना याची कल्पना दिली. ही शिवलिंग मध्ययुगीन असल्याचे समजलं. – अभिमन्यू शिंदे, मंडलाध्यक्ष, भाजपा
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– पावसाळ्यात फिरायला जायचंय? पुणे जिल्ह्यातील मावळ तालुका म्हणजे पावसाळ्यात स्वर्गच, ‘या’ ठिकाणांना नक्की भेट द्या
– महाराष्ट्र शक्तीपीठ महामार्गाला गती ! २० हजार ७८७ कोटींची तरतूद ; बारा जिल्ह्यांना जोडणारा ८०२ कि.मी. लांबीचा द्रुतगती मार्ग
– मावळ लोकसभा क्षेत्रातील पनवेल विमानतळ सप्टेंबरपासून सुरू होणार ; खासदार श्रीरंग बारणे यांची माहिती
– कार्यकर्ते हेच आमचे खरे बलस्थान, पुढील प्रत्येक निर्णय त्यांच्याच सल्ल्याने घेणार – आमदार सुनील शेळके
