Dainik Maval News : मावळच्या जनतेने तुम्हाला मतदान का करायचे, असा सवाल करीत आमदार सुनील शेळके यांनी मावळातील भाजपा नेत्यांवर सडकून टीका केली. पंचायत समितीवर राष्ट्रवादीचा झेंडा फडकवा. तालुक्यातील वाड्यावस्त्यांपर्यंत विकासकामे करण्याची जबाबदारी माझी, असे आश्वासनही आमदार शेळके यांनी दिले.
वडगाव मावळ येथे जिल्हा परिषद – पंचायत समिती निवडणुकीसाठी राष्ट्रवादीच्या उमेदवारांचे उमेदवारी अर्ज भरण्यावेळी झालेल्या सभेत आमदार सुनील शेळके बोलत होते. पुणे जिल्हा परिषद आणि पंचायत समिती मावळ निवडणुकीत राष्ट्रवादी काँग्रेस पार्टी, रिपब्लिकन पक्ष आणि स्वाभिमानी रिपब्लिकन पक्ष यांची युती आहे. मंगळवारी युतीचे अधिकृत उमेदवारांचे अर्ज मोठ्या शक्तिप्रदर्शनासह दाखल करण्यात आले.
यावेळी आमदार सुनील शेळके, राष्ट्रवादीचे जिल्हाध्यक्ष विठ्ठलराव शिंदे, तालुकाध्यक्ष गणेश खांडगे, ज्येष्ठ नेते बबनराव भेगडे, गणेश ढोरे, रामनाथ वारिंगे, स्वाभिमानी रिपाइंचे अध्यक्ष रमेश साळवे, रिपाइंचे तालुकाध्यक्ष नारायण भालेराव, सारिका शेळके, नगराध्यक्षा अबोली ढोरे, महिलाध्यक्षा सुवर्णा राऊत, युवक अध्यक्ष किशोर सातकर उपस्थित होते.
आमदार शेळके म्हणाले, राज्यात आम्ही युती म्हणून काम करतोय. मग, तालुक्यात संघर्ष कशाला हवा, यासाठी युती करण्याचा प्रयत्न नगर परिषद निवडणुकीत केला होता. पण त्या निवडणुकीतील अनुभव घेऊन या निवडणुकीत भाजपसोबत युती करायची नाही, असा निश्चय केला असून या निवडणुकीत जातीपातीचे राजकारण करू नका, असा इशाराही आमदार शेळके यांनी दिला.
गणेश खांडगे म्हणाले, आमदार शेळके यांच्या माध्यमातून तालुक्याला विकासस्पर्श झाला आहे. कुस बदलल्याचे चित्र तालुक्यात निर्माण झाले आहे. याचा परिणाम या निवडणुकांमध्ये मतांच्या रूपाने दिसला पाहिजे, असे आवाहन केले.
रमेश साळवे म्हणाले, यापूर्वीच्या निवडणुकांमध्ये आम्ही राष्टवादीसोबत होतो. आताच्या निवडणुकांमध्येही ही भूमिका कायम असून पंचायत समितीवर आपलाच सभापती होईल, असा विश्वास त्यांनी व्यक्त केला. नारायण भालेराव यांनीही रिपब्लिकन पक्ष राष्ट्रवादीसोबत राहील, असा विश्वास व्यक्त केला. सूत्रसंचालन राज खांडभोर यांनी केले.
भाजपा-राष्ट्रवादी आमनेसामने –
जिल्हा परिषद व पंचायत समिती निवडणुकीसाठी उमेदवारी अर्ज दाखल करण्यासाठी भाजपा व राष्ट्रवादी या दोन्ही पक्षांच्या वतीने वडगाव शहरात जोरदार शक्तिप्रदर्शन करण्यात आले. सुरुवातीला राष्ट्रवादीच्या वतीने भव्य रॅली काढून पंचायत समिती समोरील चौकात जाहीरसभा आयोजित करण्यात आली होती. ही सभा अखेरच्या टप्प्याकडे असताना भाजपची रॅली ही चौकात दाखल झाली. त्यामुळे दोन्ही पक्षाच्या कार्यकर्त्यांकडून जोरदार घोषणाबाजी झाली. तसेच सभा चालू असलेल्या ठिकाणापासूनच भाजपा कार्यकर्ते तहसील कार्यालयाकडे जमावाने निघाले. त्यामुळे काहीसे तणावपूर्ण वातावरण निर्माण झाले होते.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा –
– ‘…त्यांनी आम्हाला विश्वासात घेतलंच नाही’ ; मावळात दोन्ही राष्ट्रवादी काँग्रेस आमने – सामने
– निवडणुकीच्या पार्श्वभूमीवर मावळात पोलीस प्रशासन अलर्ट मोडवर ; जागोजागी होतेय वाहनांची तपासणी
– राष्ट्रवादीकडे युतीसाठी कुठलाही प्रस्ताव नाही अन् मावळात राष्ट्रवादीसोबत युती नाही ! – बाळा भेगडे यांच्याकडून युतीला फुलस्टॉप
– इंदुरी – वराळे जिल्हा परिषद गटात राजकीय भूकंप ; प्रशांत भागवत, मेघा भागवत यांचा राष्ट्रवादी काँग्रेसला रामराम
