Dainik Maval News : लोणावळा येथे रविवारी (दि. १६ फेब्रुवारी) रोजी भारताच्या संविधानाचा अमृत महोत्सव साजरा करण्यात आला. याप्रसंगी लोणावळा शहरातील सर्व जातीधर्माच्या तसेच वेगवेगळ्या राजकीय पक्षाच्या लोकांनी एकत्र येऊन भव्य संविधान मिरवणूक काढली. तसेच जाहीर सभेत संविधानाच्या ७५ प्रती लोणावळ्यातील वेगवेगळ्या जाती धर्माच्या धर्मगुरूंना, सर्व पक्षांच्या प्रमुखांना, शाळा काॅलेज आणि शासकीय अधिकाऱ्यांना बौद्ध भिक्खूच्या हस्ते वाटप करण्यात आल्या.
भारतीय संविधानाच्या अमृत महोत्सवानिमित्त लोणावळा शहरांमध्ये सर्व धर्मीय संविधान रॅलीचे रविवारी आयोजन करण्यात आले होते. या रॅलीला सर्व धर्मीय धर्मगुरू सर्व राजकीय पक्षांचे प्रमुख पदाधिकारी, अध्यक्ष व सर्व धर्मीय नागरिकांनी उस्फुर्त असा प्रतिसाद दिला. विविध शाळांमधील विद्यार्थी या रॅलीमध्ये सहभागी झाले होते. मावळा पुतळा चौक ते छत्रपती शिवाजी महाराज चौक दरम्यान रथामधून संविधान प्रतीची मिरवणूक काढण्यात आली होती. कार्यक्रम स्थळी सर्व महापुरुषांचे पुतळे व समूह शिल्पांना पुष्पहार अर्पण करण्यात आला.
संविधान गौरव समितीच्या वतीने लोणावळा शहरांमधील शासकीय, निमशासकीय कार्यालय तसेच शाळा व विविध संस्था, संघटना यांना 75 संविधानाच्या प्रती वाटप करण्यात आले आहेत. सर्व धर्मीय धर्मगुरू व सर्व धर्मीय प्रतिनिधी यांनी यावेळी व्यासपीठावरून संविधानाबाबत आपल्या भूमिका स्पष्ट करत संविधान जनजागृतीसाठी कायमस्वरूपी उपक्रम राबवण्याबाबतचा मानस व्यक्त केला.
भारत देश स्वतंत्र झाल्यानंतर संविधान मसुदा समितीच्या वतीने संविधान तयार करण्यात आले. भारतरत्न डॉक्टर बाबासाहेब आंबेडकर हे या संविधान मसुदा समितीचे अध्यक्ष होते. त्यांनी सदर संविधानाचा मसुदा तयार करत तो पंतप्रधान पंडित नेहरू यांच्याकडे सुपूर्द केला. या संविधानाच्या तत्त्वावर भारतीय राज्यघटना, भारतीय न्यायव्यवस्था, भारतीय सामाजिक व्यवस्था, समता व बंधुत्व, या व्यवस्था काम करत आहेत. प्रत्येक घटकाला या संविधानाच्या माध्यमातून न्याय देण्याची भूमिका विशद करण्यात आली आहे. अशा या संविधानाबाबत प्रत्येकाला माहिती असावी, संविधानाने दिलेले अधिकार व मूलभूत कर्तव्य ही प्रत्येकाला समजावी याकरिता संविधान गौरव समितीच्या वतीने येणाऱ्या काळात देखील संविधान जनजागृती अभियान राबवले जाणार असल्याचे सूर्यकांत वाघमारे व दत्तात्रेय येवले यांनी सांगितले.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– सरकारची लाडक्या बहिणींवरील माया आटली ! ‘या’ महिलांची नावे वगळणार, दरवर्षी करावी लागणार ई-केवायसी । Ladki Bahin Yojana
– वडगावकरांचा लाडका शिवम, दीक्षा समारंभानंतर बनले ‘महक ऋषी’ ; दीक्षा समारंभासाठी भक्तीचा महापूर । Maval News
– खळबळजनक ! गावच्या यात्रेत झालेल्या वादातून चार जणांचा एकावर प्राणघातक हल्ला, मावळ तालुक्यातील घटना । Maval Crime
