Dainik Maval News : स्वच्छ भारत अभियान, स्वच्छ सर्वेक्षण व माजी वसुंधरा अभियान अंतर्गत थोर संत गाडगे बाबा महाराज व निरंकारी बाबा हरदेव सिंग महाराज यांच्या जयंतीचे औचित्य साधून, संत निरंकारी मंडळ तळेगाव दाभाडे, वडगाव मावळ व वडगाव नगरपंचायत यांच्या संयुक्त विद्यमाने रविवारी (दि.23 फेब्रुवारी) प्रोजेक्ट ‘अमृत’ अंतर्गत शहरातील तीर्थक्षेत्र श्री पोटोबा महाराज मंदिर परिसरातील ऐतिहासिक तलाव, दत्त मंदिर परिसर, बाजारपेठ परिसर, मुंबई-पुणे महामार्ग दुतर्फा श्रमदान करून स्वच्छता अभियान राबविण्यात आले.
संत निरंकारी मिशनचे बाबा हरदेव सिंग जी यांच्या प्रेरणादायी शिकवणुकींना आत्मसात करीत वर्ष 2023 मध्ये सांस्कृतिक मंत्रालय भारत सरकार यांच्या सहयोगाने ‘प्रोजेक्ट अमृत’चा शुभारंभ केला होता. याचा उद्देश केवळ जल स्रोतांची स्वच्छता नसून जल संरक्षण करण्यासाठी मानवी जीवनास जल संरक्षणाचे महत्त्व पटवून देणे व त्याबाबतचा विचार विकसित करणे हा आहे.
- सदर अभियान रविवारी देशभरातील 27 राज्ये व केंद्रशासित प्रदेशातील 900 पेक्षा अधिक शहरांमध्ये 5600 हून अधिक ठिकाणी एकाच वेळी आयोजित करण्यात आले होते. त्यामुळे अभियानाची व्यापकता अधिक होती.
परम श्रद्धेय सद्गुरू माता सुदीक्षाजी महाराज आणि निरंकारी राजपिता रमितजी यांच्या सानिध्यात यमुना नदी नदीकाठ दिल्ली येथे स्वच्छता केली जाते, त्याच अनुषंगाने निरंकारी मंडळ तळेगाव दाभाडे, वडगाव मावळचे सुमारे 150 सदस्य यांनी वडगाव नगरपंचायत हद्दीत श्रमदान करून सेवा दिली.
सदर अभियानात सुमारे दोन टन कचरा जमा करण्यात आला. अभियानात वडगाव नगरपंचायतीचे मुख्याधिकारी तथा प्रशासक, माजी नगराध्यक्ष, अधिकारी, कर्मचारी, सफाई कर्मचारी, शहरातील नागरिक उपस्थित होते. स्वच्छतेचे नियोजन व साहित्य वाटप नगरपंचायती मार्फत करण्यात आले. तसेच सेवेकऱ्यांना प्रसादाचे नियोजन मोरया प्रतिष्ठान यांच्यामार्फत करण्यात आले होते.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– प्रधानमंत्री आवास योजना – ग्रामीण टप्पा 2 अंतर्गत मावळ तालुक्यातील 1,602 लाभार्थींना मंजुरीपत्र वाटप । Maval News
– मोठी बातमी : लोणावळ्यात द्रुतगती मार्गाच्या पुलाखाली उभारण्यात आलेल्या अनधिकृत झोपड्यांवर प्रशासनाची धडक कारवाई । Lonavala
– दहावीच्या विद्यार्थ्यांना आमदार शेळकेंकडून खास पद्धतीने ‘ऑल दी बेस्ट’ ; संपूर्ण तालुक्यातील विद्यार्थ्यांसाठी मोफत बससेवा
