Dainik Maval News : दोन विधानसभा निवडणुकीतील पराभव, नगरपंचायत – नगरपरिषदा निवडणुकीत मिळालेले अल्प यश आणि जिल्हा परिषद व पंचायत समिती निवडणुकीत झालेला दारुण पराभव यानंतर मावळ भाजपने मोठा निर्णय घेत, तालुक्यात सर्वोच्च अधिकार असलेली कोअर कमिटी बरखास्त केली आहे. पवनानगर येथे झालेल्या बैठकीत हा निर्णय घेण्यात आला. तसेच, आता नव्या कोअर कमिटीत युवा नेतृत्वाकडे तालुक्यात पक्षाची धुरा सोपविली जाण्याची शक्यता वर्तवली जात आहे.
तब्बल 25 वर्षे मावळ विधानसभा, मावळ पंचायत समितीमध्ये सत्ता राहिलेल्या, तसेच लोणावळा नगरपरिषदमध्ये असलेली एकहाती सत्ता राहिलेल्या भाजपाची मागील सहा ते सात वर्षांत कधी नव्हे इतकी पिछेहाट झाली. नुकत्याच झालेल्या जिल्हा परिषद, पंचायत समिती निवडणुकीत तर भाजपाला एकही जागा मिळाली नाही. एकंदरीत सर्व पराभवाचा विचार करून मावळ भाजपा नेत्यांनी हा निर्णय घेतल्याचे सांगितले जात आहे.
धुलीवंदनाच्या दिवशी माजी राज्यमंत्री संजय भेगडे, भाजप किसान मोर्चाचे प्रदेशाध्यक्ष गणेश भेगडे, भाजप कोअर कमिटीचे अध्यक्ष निवृत्ती शेटे यांच्यासह सर्व सदस्य, पक्षाचे प्रमुख पदाधिकारी, सर्व मंडल अध्यक्ष, तसेच नुकत्याच झालेल्या जिल्हा परिषद व पंचायत समिती निवडणुकीत पराभूत झालेले उमेदवार यांच्या उपस्थितीत मावळ भाजपची विशेष बैठक पवनानगर येथे झाली. तिथेच कोअर कमिटी बरखास्त करणे व नवीन कमिटी नेमणे आदी निर्णय झाल्याचे समजते.
या बैठकीत सन 2019 च्या विधानसभा निवडणुकीपासून आतापर्यंत झालेल्या सर्व निवडणुकांमध्ये पक्षाला आलेले अपयश याबाबत महत्त्वपूर्ण चर्चा झाली. दरम्यान, या वेळी कोअर कमिटीचे अध्यक्ष निवृत्ती शेटे यांनी स्वतःहून पराभवाची नैतिक जबाबदारी स्वीकारत अध्यक्ष पदाचा राजीनामा दिला व पक्षाची कोअर कमिटी बरखास्त करण्याचा निर्णय घेण्यात आला.
दरम्यान, कोअर कमिटी बरखास्त करण्याचा निर्णय घेताना नव्या कोअर कमिटीमध्ये तसेच, पक्षाच्या महत्त्वाच्या निर्णयांमध्ये तालुक्यातील तरुणांना सहभागी करून घेण्याचा महत्वाचा निर्णय या वेळी झाला असल्याचे समजते. त्यामुळे मावळ भाजपने झालेल्या पराभवानंतर पक्षाचे अधिकार ज्येष्ठांकडून तरुणांकडे सोपवत एकप्रकारे भाकरी फिरवण्याचा मोठा निर्णय घेतला असल्याचे दिसते.
प्रामुख्याने जिल्हा परिषद, पंचायत समिती निवडणुकीनंतर पक्षात राहून पक्षविरोधी काम करणाऱ्या गद्दारांवर कारवाई व्हावी, अशी मागणी सोशल मीडियाद्वारे व्यक्त करण्यात येत होती. या बैठकीत पक्षातील गटबाजी, गद्दारांमुळे झालेला पराभव याविषयी विशेष चर्चा झाली. तसेच, अशा गद्दारांवर कारवाई करावी अशी मागणी कार्यकर्त्यांनी केली. त्यानुसार पक्षाच्या वरिष्ठ नेत्यांकडे सबंधित गद्दारांची नावे पाठविण्यात आली असून, लवकरच त्यांच्यावर कारवाई होणार असल्याचे समजते.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– इयत्ता चौथी आणि सातवीच्या शिष्यवृत्ती परीक्षेकरिता नोंदणी आणि आवेदनपत्र भरण्यासाठी मुदतवाढ ; ‘या’ तारखेपर्यंत भरता येणार अर्ज
– मावळ कृषी उत्पन्न बाजार समितीचे सभापती संभाजी शिंदे यांचा राजीनामा ! जिल्हा उपनिबंधक यांच्याकडे सोपविला राजीनामा
– वाहतूकीचे नियम मोडणारे, गाडीला काळ्या काचा – फॅन्सी नंबरप्लेट असलेल्या वाहन चालकांवर वडगाव मावळ पोलिसांची कारवाई
– पुणे – लोणावळा रेल्वे प्रवास होणार सुसाट.. प्रवाशांचा वेळ वाचणार ; रेल्वे विभागाचा मास्टर प्लॅन – वाचा सविस्तर
