Dainik Maval News : मावळ तालुका कृषी उत्पन्न बाजार समितीचे विद्यमान सभापती संभाजी आनंदराव शिंदे यांनी आज रोजी (दि. ५ मार्च) आपल्या पदाचा राजीनामा दिला आहे. जिल्हा उपनिबंधक, सहकारी संस्था, पुणे ग्रामीण यांच्याकडे शिंदे यांनी पदाचा राजीनामा सादर केला आहे. आपण स्वखुशीने राजीनामा देत असून तो मंजूर करावा, असे संभाजी शिंदे यांनी दिलेल्या राजीनामा पत्रात म्हटले आहे. दरम्यान, उपसभापती नामदेव शेलार यांच्या राजीनाम्यानंतर आता सभापती संभाजी शिंदे यांनीही राजीनामा दिल्यामुळे मावळ कृषी उत्पन्न बाजार समितीत नेतृत्व बदलाचे वारे वाहू लागले आहेत.
मे २०२३ मध्ये तब्बल बारा वर्षांनी मावळ बाजार समितीची निवडणूक झाली होती. त्यात राष्ट्रवादी काँग्रेसचा समावेश असलेल्या पॅनलचे १७ तर, भाजपाचा समावेश असलेल्या पॅनलचे १ असे एकूण १८ संचालक निवडून आले होते. या संचालकांमधून २४ मे २०२३ रोजी सभापतीपदी संभाजी शिंदे आणि उपसभापतीपदी नामदेव शेलार यांची निवड झाली होती. सर्व संचालकांची भावना लक्षात घेत सर्वांना संधी मिळावी याकरीता सभापती-उपसभापती पदाकरिता काही कालावधी निश्चित करण्यात आला होता. परंतु तदनंतर राज्याच्या राजकारणात घडलेल्या घडामोडींचा परिणाम मावळच्या राजकारणावरही झाला आणि दोन्ही पदाधिकाऱ्यांचे राजीनामे लांबले. परंतु आज अखेर सभापती – उपसभापती पदाचे राजीनामे झाल्यामुळे लवकरच बाजार समितीवर नवीन कारभारी निवडले जातील, अशी शक्यता वर्तवली जात आहे.
सभापती म्हणून संभाजी शिंदे यांचे भरीव योगदान
संभाजी शिंदे हे जेव्हा मावळ कृषी उत्पन्न बाजार समितीचे सभापती झाले, तेव्हा त्या पदाला ‘ओसाड गावची पाटीलकी’ असे उपहासाने बोलले जात होते. कारण 1957 मध्ये स्थापना झालेल्या बाजार समितीचा कारभार कालांतराने डळमळीत होत गेला. चांगले कार्यालय नाही, प्रॉपर्टी आहे पण उलाढाल नाही, अशी बाजार समितीची अवस्था होती. परंतु संभाजी शिंदे यांनी सभापती पदाच्या कार्यकाळात या ओसाड गावचे रूप बदलून बाजार समितीला नवी ओळख दिली.
बाजार समितीचे सुसज्ज कार्यालय उभारले. ६ एकर क्षेत्रात वॉल कंपाऊंड व सुशोभिकरणाची कामे केली. बाजार समितीचा २२ कोटींचा विकास आराखडा मंजूर केला असुन लवकरच सर्व कामे सुरू होतील. यासह शिवणे, वडेश्वर येथे उपबाजार स्थापन केले. तसेच इंदुरी उप बाजाराचे उद्घाटनही लवकरच होईल. स्व. अजित पवार आणि सहकारमहर्षी माऊली दाभाडे, आमदार सुनील शेळके यांच्या मार्गदर्शनाखाली आणि सर्व संचालक मंडळाला सोबत घेऊन सभापती शिंदे यांनी बाजार समितीचे रूप पालटविले. त्यामुळेच आजवर झालेल्या सभापतींपैकी संभाजी शिंदे यांचे योगदान नक्कीच भरीव आणि संस्मरणीय असे राहिले आहे.
मावळ कृषी उत्पन्न बाजार समितीचे संचालक मंडळ
संभाजी शिंदे (मा. सभापती), नामदेव शेलार (मा. उपसभापती), सुभाष जाधव, मारुती वाळुंज, दिलिप ढोरे, विलास मालपोटे, बंडू घोजगे, साईनाथ मांडेकर, सुप्रिया अनिल मालपोटे, अंजली गोरख जांभुळकर, शिवाजी असवले, नथुराम वाघमारे, विक्रम कलवडे, विलास मानकर, अमोल मोकाशी, ॲड भरत टकले, नामदेव कोंडे, शंकर उर्फ बाळासाहेब वाजे
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– तळेगाव दाभाडे नगरपरिषद प्रशासनाची धडक कारवाई ; दहा अनधिकृत नळ जोडण्या खंडीत केल्या
– पुणे ते लोणावळा दरम्यान लोकलच्या फेऱ्या वाढविण्याची गरज ; रेल्वे प्रवाशांची मागणी
– कृत्रिम फुलांच्या वापरावरील बंदीसंदर्भात स्पष्टतेसाठी शासन निर्णय लवकरच ; मुख्यमंत्री देवेंद्र फडणवीस यांची घोषणा
– पवन मावळातील गावागावांत पोहोचणार विज्ञानाचे धडे देणारी फिरती प्रयोगशाळा ; ‘नॉलेज ऑन व्हिल्स’ बसचे लोकार्पण
