Dainik Maval News : मावळ विधानसभा मतदारसंघातील अपक्ष उमेदवार बापूसाहेब भेगडे यांना पाठिंबा देण्याच्या निर्णयावर अखेर महाविकास आघाडीच्या घटक पक्षांनी शिक्कामोर्तब केले आहे. महाविकास आघाडीने अधिकृत पाठिंबा दिल्याने भाजप कार्यकर्त्यांनी ‘यू टर्न’ घेतल्याचे पहायला मिळत आहे. अपक्ष उमेदवार बापूसाहेब भेगडे यांना महाविकास आघाडीने पाठिंबा दिल्यामुळे ‘मावळ पॅटर्न’च्या नावाखाली निर्माण करण्यात आलेल्या फुग्यातील हवा निघून गेली आहे.
राष्ट्रवादी काँग्रेस मधील अजित पवार यांचे समर्थक असलेल्या बापूसाहेब भेगडे यांना अपक्ष म्हणून निवडणूक रिंगणात उतरवून त्यांच्यामागे सर्व शेळके विरोधकांची एकत्रित ताकद उभी करण्याचा प्रयत्न चालवला होता. पण महाविकास आघाडीचा पाठिंबा बापूसाहेबांनी घेतल्यामुळे मावळ पॅटर्नची हवा निघून गेल्याची चर्चा तालुक्यात आहे.
भाजपचे नेते उपमुख्यमंत्री देवेंद्र फडणवीस आणि भाजपचे प्रदेशाध्यक्ष चंद्रशेखर बावनकुळे या दोघांनीही तालुक्यातील भाजपच्या पदाधिकारी व कार्यकर्त्यांना महायुतीचे अधिकृत उमेदवार सुनील शेळके यांचेच काम करण्याचे आदेश दिले आहे. बाळा भेगडे व सुनील शेळके यांचे वैयक्तिक वैर असल्याचे सांगत त्यांनी पक्षाची भूमिका स्पष्ट केली. त्यामुळे आतापर्यंत दबावाखाली असलेले भाजप कार्यकर्ते आता महायुतीच्या प्रचारात सक्रिय होताना दिसू लागले आहे.
निवडणुकीत विजयी झाल्यास महाविकास आघाडीलाच पाठिंबा देण्याच्या अटीवरच राष्ट्रवादी काँग्रेस शरद पवार गट, काँग्रेस आणि शिवसेना उद्धव ठाकरे या घटक पक्षांनी त्यांना पाठिंब्याचे पत्र दिल्याची तालुक्यात चर्चा आहे. बापूसाहेब भेगडे यांनी राजकीय भूमिका स्पष्ट केल्यामुळे महाविकास आघाडीचे कार्यकर्ते आता जोमाने प्रचारात उतरले आहेत. त्याच वेळी भाजपचे कार्यकर्त्यांनी ‘यू टर्न’ घेतल्याने बापूसाहेब भेगडे चांगलेच अडचणीत आले आहेत.
“मावळातील भाजपला भाजप नेत्यांनीच संपवलं”
मावळातील भाजपला भाजपच्याच नेत्यांनी संपविले, असा आरोप भाजपचे निष्ठावान कार्यकर्ते जालिंदर थरकुडे यांनी निगडे गावातील महायुतीच्या प्रचारसभेत बोलताना केला. सुनील शेळके यांनी भाजप संपवली नाही तर भाजपच्या काही नेतेमंडळींच्या स्वार्थी राजकारणामुळे भाजप संपवली, ही वस्तुस्थिती आहे. आतापर्यंत भाजप आणि शिवसेना सोडून कोणत्याही पक्षाला मतदान केले नव्हते, पण पक्षाच्या आदेशानुसार आम्ही महायुती धर्माचे पालन करू आणि वैयक्तिक द्वेषापायी भाजपला महाविकास आघाडीच्या दावणीला बांधायला निघालेल्या नेत्यांना कायमचा धडा शिकवू, असा इशाराही या कार्यकर्त्याने दिला.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– मावळची संस्कृती बिघडत चालल्याने सर्व पक्ष एक झाले – बापूसाहेब भेगडे । Bapu Bhegade
– पोलिसांनी जप्त केलेली रक्कम माझ्या व्यवसायाची, विरोधकांनी दबाव आणून कारवाई करण्यास भाग पाडले – सचिन मुऱ्हे
– मावळात राष्ट्रवादीच्या नेत्याच्या कार्यालयातून 36 लाखांची रोकड जप्त, सोमाटणे येथे मोठी कारवाई । Maval Crime
