Dainik Maval News : लोणावळा परिसरातील औंढोली गावातून एक वर्षापूर्वी चोरी गेलेला टेम्पो पोलिसांनी शोधून काढला आहे. अहिल्यानगर कडे जाणाऱ्या रस्त्यावरील वाघोली बाजारतळ परिसरात लावलेला टेम्पो पोलिसांनी पाहिला असता बऱ्याच दिवसांपासून सदर टेम्पो बाजारतळावर असल्याची माहिती समजली. त्यानंतर पोलिसांनी माहिती काढल्यावर सदर टेम्पो चोरीचा असून वाहन चोरीचा गुन्हा समोर आला. त्यानंतर पोलिसांनी कारवाई करीत टेम्पो ताब्यात घेतला असून याप्रकरणी एकाला अटक केली आहे.
सुनील अण्णा कांबळे (वय ४०, रा. रामनगर, वारजे माळवाडी) असे अटक करण्यात आलेल्याचे नाव आहे. वाघोली पोलिसांचे पथक गस्त घालत होते. त्यावेळी वाघोली बाजारतळ परिसरात वाहन क्रमांकाची अर्धवट पाटी असलेला टेम्पो पोलीस कर्मचारी प्रदीप मोटे यांनी पाहिला. त्यानंतर वरिष्ठ पोलीस निरीक्षक युवराज हांडे यांच्या मार्गदर्शनाखाली उपनिरीक्षक मनोज बागल आणि पथकाने बाजरतळ परिसरात तपास सुरू केला. टेम्पोत असलेल्या कांबळे याची चौकशी करण्यात आली. त्याच्याकडे वाहनाची कागदपत्रे आणि वाहन क्रमांकाबाबत पोलिसांनी विचारणा केली. तेव्हा त्याने उडवाउडवीची उत्तरे दिली. त्यानंतर कांबळेला पोलीस ठाण्यात चौकशीसाठी आणण्यात आले.
चौकशीत त्याने टेम्पो लोणावळा परिसरात असलेल्या औंढोली गावातील एका घरासमोरून एक वर्षापूर्वी चोरल्याची माहिती दिली. त्यानंतर वाघोली पोलिसांनी शहानिशा केली. आरोपी कांबळेला अटक करुन टेम्पो जप्त केला. त्याला तपासासाठी लोणावळा ग्रामीण पोलिसांच्या ताब्यात दिले. पोलीस निरीक्षक युवराज हांडे, उपनिरीक्षक मनोज बागल, प्रदीप मोटे, पांडुरंग माने, विशाल गायकवाड, मनोज भोरडे यांनी ही कामगिरी केली.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– मावळ तालुक्यात दहा दिवसांत विविध ठिकाणी ९ अजगर सापांना ‘वन्यजीव रक्षक मावळ’ व ‘शिवदुर्ग मित्र’च्या सर्पमित्रांकडून जीवदान । Maval
– राज्य सरकारने शब्द पाळला… आषाढी एकादशी वारीसाठी दिंड्यांना २.८ कोटींचे अनुदान देण्यास मान्यता । Ashadhi Vari 2025
– जन्मदात्याकडून अल्पवयीन लेकीवर लैंगिक अत्या’चार ! लोणावळा शहाराजवळील संतापजनक घटना । Maval Crime
