वंचित बहुजन आघाडीने मावळ लोकसभा मतदारसंघात उमेदवार उभा करण्याची तयारी सुरू केली आहे. रायगड लोकसभा मतदारसंघात वंचित बहुजन आघाडीने नुकताच उमेदवार जाहीर केला. त्यापाठोपाठ आता मावळ लोकसभेसाठी उमेदवाराची चाचपणी सुरु आहे. वंचितकडून मावळ लोकसभेत स्थानिक आगरी, कोळी समाजातील उमेदवाराला प्राधान्य मिळेल, असे सांगण्यात येत आहे. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
लोकसभा मतदारसंघाच्या पुनर्रचनेनंतर 2009 मध्ये मावळ लोकसभा मतदारसंघ अस्तित्वात आला. पुणे जिल्ह्यातील मावळ, पिंपरी आणि चिंचवड तसेच रायगड जिल्ह्यातील पनवेल, उरण, कर्जत-खालापूर या विधानसभा मतदारसंघाचा मावळ लोकसभेत समावेश होतो. 2009 मध्ये या मतदारसंघातून शिवसेनेचे गजानन बाबर विजयी झाले, तर त्यानंतर 2014 आणि 2019 मध्ये शिवसेनेचेच श्रीरंग बारणे विजयी झाले. ( Prakash Ambedkar Will Give Vanchit Bahujan Aghadi Party Candidate In Maval Lok Sabha Constituency )
2019 मधील लोकसभा निवडणुकीत वंचित बहुजन आघाडीने उरण तालुक्यातील आगरी, कोळी समाजाचे नेते राजाराम पाटील यांना उमेदवारी दिली होती. त्यांना या निवडणुकीत 75,904 मते पडली होती. त्यांना संपूर्ण मतदानाच्या एकूण 5.54 टक्के मतदान झाले होते. मावळ लोकसभा मतदारसंघातील पनवेल, उरण व कर्जत या विधानसभा मतदारसंघात आगरी- कोळी समाजाचे प्राबल्य आहे. राजाराम पाटील यांना पडलेली मते लक्षात घेता आगामी लोकसभा निवडणुकीसाठी वंचित बहुजन आघाडीकडून आगरी, कोळी समाजाचा उमेदवार देण्याची चाचपणी सुरू आहे.
लोकसभा निवडणुकीदरम्यान महाविकास आघाडी आणि वंचित बहुजन आघाडी यांच्यात जागा वाटपावरून आघाडी फिस्कटली. वंचित बहुजन आघाडीने दलित आणि बहुजनांचे वर्चस्व असलेल्या अनेक मतदारसंघात उमेदवार जाहीर केल्याने महाविकास आघाडीपुढे पेचप्रसंग निर्माण झाला आहे. अशात वंचित बहुजन आघाडीने रायगड लोकसभा मतदारसंघात ताकदीचा उमेदवार दिलाय. त्याप्रमाणे आता मावळ लोकसभा मतदारसंघात देखील सक्षम उमेदवार दिला जाणार आहे. यासाठी उमेदवारांची चाचपणी सुरू असल्याचे वंचितच्या प्रदेश अध्यक्षा रेखा ठाकूर यांनी सांगितले.
अधिक वाचा –
– ‘मी आयुष्यात पहिल्यांदाच धनुष्यबाणाला मतदान करणार आहे’ – बापूसाहेब भेगडे । Maval Lok Sabha
– हिंदू धर्मियांसाठी महत्वाच्या असलेल्या सणांच्या दिवशी लोणावळा विभागातील मांस विक्री दुकाने बंद ठेवण्याची मागणी । Lonavala News
– ‘महायुतीच्या विरोधात काम करणाऱ्या कार्यकर्त्यांप्रमाणेच नेत्यांवर देखील कारवाई होईल’ – बाळा भेगडे । Maval Lok Sabha
