लोणावळा परिसर हा थंड हवेचे ठिकाण असल्याने परिसरात मोठ्या प्रमाणात पर्यटक फिरण्यासाठी, राहण्यासाठी येत असतात. काही पर्यटकांची स्वत:ची घरे आहेत तर काही पर्यटक भाडेतत्वावर घरे घेऊन राहतात. पर्यटकांच्या तसेच स्थानिकांच्या घरामध्ये चोरी होत असल्याबाबत वारंवार तक्रारी येत असल्याने पोलीस अधिक्षक पुणे ग्रामीण यांनी स्थानिक गुन्हे शाखेला कारवाई करण्याबाबत सुचना केल्या होत्या. त्याअनुषंगाने स्थानिक गुन्हे शाखेचे पोलीस निरीक्षक अविनाश शिळीमकर यांनी लोणावळा विभागाचे उपविभागीय पोलीस अधिकारी सत्यसाई कार्तिक यांच्याशी संपर्क साधून त्यांचे मार्गदर्शनाखाली लोणावळा उप विभागाची गुन्हे आढावा बैठक घेतली. यावेळी गुन्हे घडलेले ठिकाण, गुन्ह्याची वेळ, गुन्हे करण्याची पद्धत याचा अभ्यास करून घरफोडी चोरीचे गुन्हे उघडकीस आणण्यासाठी स्थानिक गुन्हे शाखेने एक पथक तयार केले गेले.
स्थानिक गुन्हे शाखेच्या पथकाने लोणावळा परिसरात आपला वावर वाढवून सीसीटीव्ही फुटेज तपासले. तसेच गोपनीय बातमीदार आणि तांत्रिक विश्लेषणाच्या आधारे तपास सुरू केला. उपलब्ध माहितीच्या आधारे सदरचे गुन्हे हे रेकॉर्डवरील गुन्हेगार १) वसीम सलाऊद्दीन चौधरी (वय २७ वर्षे रा. वाकसाई, वरसोली लोणावळा ता. मावळ जि. पुणे) हा असल्याची माहिती समोर आली. त्याला तपासकामी ताब्यात घेऊन तपास केला असता, त्याने चोरी केल्याचे निष्पन्न झाले. आरोपी वसीम हा उघड्या दरवाजावाटे स्लायडींग खिडकीद्वारे, घरात प्रवेश करून घरातील रोख रक्कमेसह मौल्यवान वस्तूंची चोरी करत असल्याचे निष्पन्न झाले.
चोरीचे काही गुन्ह्यात त्याचे साथीदार २) सलीम सलाऊद्दीन चौथरी (वय २९ वर्षे रा. लोणावळा ता मावळ जि पुणे) 3) शहारूख बाबू शेख (वय २९ वर्षे रा. लोणावळा ता मावळ जि पुणे) यांचा सहभाग असल्याने त्यांना देखील ताब्यात घेण्यात आले. आरोपींकडून आतापर्यंत एक तोळा वजनाची सोन्याची चैन, दोन डायमंडच्या अंगठ्या, एक सोन्याची अंगठी, दोन मोटार सायकल, रोख रक्कम असा एकूण 2,26,700 रूपये किंमतीचा मुद्देमाल हस्तगत करण्याच आला असून आरोपी वसीम चौधरी हा सध्या पोलीस कस्टडी रिमांड मध्ये असून इतर दोन आरोपींचा न्यायालयाने जामीन मंजूर केला आहे.
आरोपी वसीम चौधरी या आरोपीवर यापुर्वी आठ घरफोडी चोरीचे गुन्हे दाखल असून आरोपींकडून एकूण दहा गुन्हे उघडकीस आले आहेत. उघडकीस आलेले गुन्हे लोणावळा शहर पोस्टे १) ३९७/२०२३ भादंवि ३८०, २) २१४/२०२३ भादंवि ३८०, ३) १६२/२०२३ भादंवि ३८०, ४) २१३/२०२३ भादंवि ३८०, ५) २३५/२०२३ भादंवि ३७९, ६) १७८/२०२३ भादंवि ३७९, ७) २१८/२०२३ भादंवि ३७९, ८)६७/२०२३ भादंवि ४५४,३८०, ९) ७१/२०२३ भादंवि ४५४,४५७,३८० लोणावळा ग्रामीण पोस्टे – १०) ४४६/२०२३ भादंवि ४५४, ४५७,३८० इ.
लोणावळा परिसरात राहणारे लोक तसेच येणारे पर्यटकांनी रात्रीचे वेळी तसेच फिरण्यासाठी बाहेर पडताना आपाआपले घरांचे दरवाजे-खिडक्या व्यवस्थित लॉक करावेत. दरवाजा-खिडकी उघडे ठेवून झोपू नये. तसेच स्लायडिंग खिडक्यांना लोखंडी ग्रिल लावावेत. सिसिटीव्ही कॅमेरे लावणेबाबत पुणे ग्रामीण पोलीस अधिक्षक डॉ अंकित गोयल तसेच लोणावळा उप विभागाचे उपविभागीय पोलीस अधिकारी सत्यसाई कार्तिक यांनी आवाहन केले आहे.
सदरची कामगिरी पोलिस अधीक्षक अंकित गोयल – पुणे ग्रामीण, अपर पोलीस अधीक्षक मितेश घट्टे पुणे विभाग, उपविभागीय पोलीस अधिकारी सत्यसाई कार्तिक – लोणावळा उपविभाग यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, सपोनि नेताजी गंधारे, पोसई प्रदीप चौधरी, सपो प्रकाश वाघमारे, पोहवा राजु मोमीण, अतुल डेरे, चंद्रकांत जाधव, मंगेश थिगळे, पोना बाळासाहेब खडके, तुषार भोईटे, अमोल शेडगे, पोकॉ मंगेश भगत, प्राण येवले, काशिनाथ राजापूरे, पोहवा शकील शेख यांनी केली असून पुढील तपास लोणावळा शहर पो.स्टे. चे पोलिस निरिक्षक सिताराम डुबल, लोणावळा ग्रामीण पो.स्टे.चे पोलिस निरिक्षक किशोर धुमाळ हे करत आहेत.
दैनिक मावळचा व्हॉट्सअॅप ग्रुप जॉइन करण्यासाठी इथे क्लिक करा
अधिक वाचा –
– दैनिक मावळ विशेष – सरपंच असावा तर असा! ओझर्डे गावच्या सरपंचाने राज्यात गाजवलं तालुक्याचं नाव
– भाताचे बियाणे निघाले बोगस? मावळातील शेतकऱ्याचे मोठे नुकसान
– मोठी बातमी! मावळात पावसाचा जोर वाढला, पवना धरणातून पाण्याचा विसर्ग वाढवला, पाहा तालुक्यात कुठे किती पाऊस झालाय
