Dainik Maval News : लोणावळा शहरात स्वच्छता विभागातील ठेक्यावरून सुरू असलेला वाद अखेर संपुष्टात आला आहे. शहरातील स्वच्छतेसाठी एका कंपनीस 11 कोटी 93 लाख रुपयांना दिल्या गेलेल्या ठेक्याची रक्कम 9 कोटी 54 लाख रुपयांपर्यंत खाली आणण्याचा प्रस्ताव मुख्याधिकारी अशोक साबळे यांनी लोणावळा जागरूक नागरिक मंचाला दिला. त्यावर चर्चेअंती एकमत झाल्यावर मुख्याधिकारी यांचा प्रस्ताव मान्य करीत असल्याचे मंचच्या वतीने जाहीर करण्यात आले. त्यासह दिनांक 19 सप्टेंबर पासून सुरू झालेले आंदोलन मागे घेण्यात आले आहे.
पूर्वीच्या मूळ ठेक्यातून 72 कामगार कमी केल्याने सदर ठेक्याची रक्कम 2 कोटी 38 लाख 85 हजार 358 रुपयाने कमी झाली आहे. त्यामुळे संबंधित कंपनीला यापूर्वी लोणावळा नगर परिषदेने दिलेल्या 11 कोटी 93 लाख 11 हजार 996 रुपयांचा ठेका आता 9 कोटी 54 लाख 26 हजार 637 रुपये होणार आहे. शिवाय लोणावळा नगर परिषदेची सार्वत्रिक निवडणूक होऊन नवीन लोकप्रतिनिधी नगरपरिषद येईपर्यंत सद्यस्थितीत वरील प्रस्तावाप्रमाणे कामकाज सुरू राहील आणि नवीन लोकप्रतिनिधी निवडून आल्यानंतर सभागृह जो निर्णय घेईल तो सर्वांना मान्य असेल असे देखील यावेळी एकमताने ठरविण्यात आले.
पाणीपट्टी करवाढीचा प्रस्ताव जिल्हाधिकाऱ्यांकडे –
लोणावळा नगरपरिषदेकडून पाणीपट्टी मध्ये करवाढ करत घरगुती दर चौदाशे रुपये वरून 1700 रुपये, तर व्यवसायिक पाणी वापराचे दर 7500 रुपयांवरून नऊ हजार करण्यात आले आहेत. करवाढीतील दर कमी करण्याचे अधिकार नगरपरिषदेला नसल्याने याबाबतचा निर्णय घेण्यासाठीचा प्रस्ताव जिल्हाधिकारी कार्यालयाकडे पाठविण्यात आला असल्याचे मुख्याधिकारी साबळे यांनी सांगितले.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– सोमाटणे फाटा येथे पाच किलो गांजा सह एकाला अटक, तळेगाव पोलिसांची कारवाई । Talegaon Crime
– संत तुकाराम साखर कारखान्याचा बॉयलर अग्नी प्रदीपन समारंभ ; यंदा पाच लाख मेट्रिक टन ऊस गाळपाचे ध्येय
– महाराष्ट्रातील विधानसभा निवडणूकीची ही माहिती प्रत्येक मतदाराला असलीच पाहिजे, नक्की वाचा । Maharashtra Vidhan Sabha Election
