Dainik Maval News : पावसामुळे बाधित झालेल्या शेतकऱ्यांच्या नुकसानीचे पंचनामे करा, चिखलमय रस्त्यांची डागडुजीकरण करा, अशी मागणी मावळ तालुका राष्ट्रवादी काँग्रेस शरदचंद्र पवार पक्षाच्या पदाधिकाऱ्यांनी सरकारकडे केली आहे. याबाबत पदाधिकाऱ्यांनी तहसीलदार मावळ, विक्रम देशमुख यांची भेट घेऊन त्यांना मागणीचे निवेदन दिले आहे.
याप्रसंगी पक्षाचे तालुका अध्यक्ष दत्तात्रय पडवळ, ओबीसी सेलचे पुणे जिल्हाध्यक्ष अतुल राऊत, युवक तालुकाध्यक्ष विशाल वहिले, महिला तालुकाध्यक्ष जयश्री पवार, माजी सरपंच कैलास खांडभोर, सोमनाथ धोंगडे, बारकू ढोरे, दत्तात्रय आंद्रे, सुरज पुरी, संतोष देशमुख आदी उपस्थित होते.
काय आहे निवेदन?
मागील आठ ते दहा दिवसांपासून सुरू असलेल्या मान्सूनपूर्व मुसळधार पावसामुळे उन्हाळी भुईमूग, बाजरी आणि बागायती भाजीपाला पिकांचे अतोनात नुकसान झाले आहे. हातातोंडाशी बाजरीचे पीक आले असताना देखील काढता आले नाही, त्यामुळे मोठे नुकसान शेतकऱ्याला सोसावे लागले आहे. तसेच भुईमूग पिकाला पावसामुळे शेतात वापसा नसल्यामुळे काढता येत नाही. काही ठिकाणी शेंगांना मोड येऊ लागले आहेत.
खरीप भात पिकाच्या तयारीच्या कामाला खीळ बसली असून शेतकऱ्यांसमोर भात रोपे कशी तयार करायची याची चिंता लागून राहिली आहे. पशूधनाचे देखील नुकसान झाले आहे, तरी त्या नुकसानाचे त्वरित पंचनामे करून बाधित शेतकऱ्यांना नुकसान भरपाई देण्यात यावी. तसेच खरीप पेरणीसाठी बियाणे व खतांचा तुटवडा निर्माण होऊ नये, बोगस बियाणांची विक्री होऊ नये यासाठी ताबडतोब उपाययोजना करावी, अशी मागणी करण्यात आली आहे.
खराब रस्त्यांची डागडुजी करा
वडेश्वर ते शिंदे घाटेवाडी पर्यंत रस्ता हा संपूर्ण चिखलमय झाला आहे. तालुक्यातील ग्रामीण भागातील इतर रस्ते देखील खराब झाले आहेत. त्यामुळे सर्वसामान्य नागरिकांना वाहन चालविताना मोठी कसरत करावी लागते. यासंबधी संबंधितांना डागडुजीकरण करण्यास ताबडतोब आदेश द्यावेत, असे निवेदन मावळचे तहसीलदार विक्रम देशमुख यांना देण्यात आले आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– मोठी बातमी : तळेगाव-चाकण-शिक्रापूर रस्त्याच्या सुधारणा प्रकल्पाबाबत अधिकृत शासन आदेश जारी । Talegaon Chakan Shikrapur Road
– वडीवळे धरण डावा-उजवा कालवा बंदिस्त करणे आणि आढले-डोणे उपसा जलसिंचन योजनेचा डीपीआर तयार करण्याचे निर्देश । Maval News
– मोठी बातमी : मुंबई-पुणे-हैदराबाद बुलेट ट्रेन प्रकल्प भंडारा डोंगराला भेदून जाणार नाही ; रेल्वे मंत्र्यांचे आश्वासन
