Dainik Maval News : लोणावळा शहरातील मुख्य प्रलंबित कामांबाबत जिल्हाधिकारी यांच्यासोबत बैठक पार पडली. सदर बैठकीत सूचना करून देखील नगरपरिषद प्रशासन दिरंगाई करीत असल्याचे निदर्शनास आले. त्यात प्रामुख्याने भांगरवाडी रेल्वे उड्डाण पुलाचे काम 10 मार्च पर्यंत सुरु करण्याचे आदेश अधिकाऱ्यांना दिले आहेत. जर मुदतीत काम सुरू झाले नाही तर लोणावळा नगरपरिषदेला टाळे ठोकणार असल्याचा इशारा आमदार सुनिल शेळके यांनी दिला.
लोणावळा नगर परिषद हद्दीतील विकास कामे आणि प्रलंबित कामांचा आढावा आमदार सुनिल शेळके यांच्या उपस्थित घेण्यात आला. यावेळी शेळके बोलत होते. यावेळी, खंडाळा येथील नगरपरिषद शाळेच्या विस्तारीकरणासाठी लगतच्या जागा मालकांना तत्काळ उर्वरित पैसे देऊन जागा ताब्यात घेण्याबाबत सूचनाही शेळकेंनी दिल्या. यामध्ये कोणतेही राजकारण अथवा दिरंगाई खपवून घेतली जाणार नसल्याचे देखील अधिकाऱ्यांना सांगितले.
- लोणावळा शहराचा पर्यटन दृष्ट्या विकास साधण्यासाठी वळवण तलावाच्या विकास आराखड्याची पाहणी करण्यात आली. त्यासाठी सुमारे 8 कोटी रुपये अंदाजित खर्च येणार असून 50 टक्के खर्च नगरपरिषदेने करावा आणि 50 टक्के खर्च जिल्हा नियोजन समितीच्या माध्यमातून आपण उपलब्ध करून देणार असल्याचे आमदारांनी सांगितले आहे.
शहरातील डॉ. बाबासाहेब आंबेडकर स्मारकाचे काम सुरू असून उर्वरित कामासाठी सूर्यकांत वाघमारे यांनी मागणी केली, त्यानुसार जिल्हा नियोजन समितीच्या माध्यमातून सुमारे 2 कोटी 78 लक्ष इतक्या निधीची उपलब्धता येत्या काही महिन्यात केले जाईल, असे आश्वासन शेळके यांनी यावेळी दिले. तसेच छत्रपती शिवाजी महाराज स्मारकाच्या कामाचा आढावा घेतला असता सदर काम अतिशय दर्जेदार पद्धतीने होत आहे. परंतु शहरातील उर्वरित कामे देखील अशाच दर्जेदार पद्धतीने करण्याबाबत सूचना दिल्या.
- लोणावळा शहराच्या सौंदर्याचे भान राखून गेल्या दहा वर्षांपेक्षा जुन्या टपरी धारकांचे होकर्स झोन करून पुनर्वसन करेपर्यंत त्यांना हटविण्यात येऊ नये, परंतु नव्याने टाकलेल्या 10 वर्षांच्या आतील टपऱ्यांचे अतिक्रमण 15 दिवसांत हटविण्याबाबतच्या सूचना दिल्या. त्याचप्रमाणे गेल्या महिन्यात लोणावळा शहरात केलेल्या जनसंवाद दौऱ्या दरम्यान नागरिकांनी उपस्थित केलेल्या प्रश्नांबाबत यावेळी चर्चा करण्यात आली.
यामध्ये प्रामुख्याने ; खंडाळा येथील तलाव लगत अनेक वर्षांपासून राहणाऱ्या स्थानिक बांधवांना घरकुल, रस्ते व मूलभूत सुविधा मिळणे, महात्मा फुले भाजी मंडई विकसित करणे, रामनगर येथील गायरान जागा घरकुल योजनेसाठी उपलब्ध करणे, शहरामध्ये सीसीटीव्ही कॅमेरे बसविणे, अनुकंपा तत्वावरील वारसांना नोकरी मिळणे, इंदिरानगर येथे पोलिस क्वार्टरजवळील अंतर्गत रस्ता करणे, खंडाळा येथील जिम साहित्य बसविणे, नवीन अंगणवाड्या इमारती बांधणे, शहरातील स्वच्छता, अनधिकृत पाणी पुरवठा कनेक्शन या विषयांबाबत सूचना देण्यात आल्या.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– देहू नगरपंचायतीचा 97 कोटी 99 लाखाचा अर्थसंकल्प सादर, विशेष सभेत अर्थसंकल्प मंजूर । Dehu News
– तळेगाव-चाकण महामार्गाच्या कामाला मंत्रिमंडळाची मंजुरी मिळावी ; कृती समितीचे मुख्यमंत्र्यांना निवेदन । Maval News
– मोठी बातमी ! ‘पीएमआरडीए’चा मोठा निर्णय, आता नऊ तालुक्यांत होणार PMRDA चे कार्यालय, मावळचाही समावेश
