Dainik Maval News : मावळ विधानसभा मतदारसंघाचा अधिकृत निकाल जाहीर झाला आहे. मावळ विधानसभेच्या निवडणुकीत अजित पवार यांच्या राष्ट्रवादी काँग्रेस पक्षाचे तथा महायुतीचे उमेदवार, विद्यमान आमदार सुनील शेळके हे विजयी झाले आहेत. सुनील शेळके यांनी 1 लाख 8 हजार 565 इतक्या विक्रमी मताधिक्यासह विजय संपादन केला आहे. तर शेळकेंचे विरोधी उमेदवार बापू भेगडे यांना पराभवाचा झटका बसला आहे.
मावळ विधानसभा मतदारसंघाची एकूण 29 फेऱ्यांमध्ये मतमोजणी संपन्न झाली. पहिल्या फेरीपासून ते अखेरच्या फेरीपर्यंत शेळके आघाडीवर राहिले. फेरीनिहाय शेळकेंची आघाडी वाढतच राहिली आणि अखेर एकोणतीसाव्या फेरीपर्यंत सुनील शेळकेंनी लाखाहून अधिकचे मताधिक्य घेत विजय निश्चित केला.
मतमोजणीत सुनिल शेळके यांना एकूण 1 लाख 91 हजार 255 मते मिळाली. तर प्रमुख विरोधी उमेदवार अण्णा उर्फ बापू जयवंतराव भेगडे यांना 82 हजार 690 मते मिळाली. तर नोटा या पर्यायाला तिसऱ्या क्रमांकाची 2715 इतकी मते मिळाली आहेत. सुनिल शेळके यांनी ऐतिहासिक अशा 1 लाख 8 हजार 565 इतक्या फरकाने विजय मिळविला आहे.
