Dainik Maval News : जगद्गुरू संत श्री तुकाराम महाराज यांच्या बीज उत्सवानिमित्त देहूगाव येथे 5 मार्च रोजी मोठ्या प्रमाणावर वारकरी, भाविक व नागरिक उपस्थित राहणार आहेत. त्यामुळे परिसरात होणारी गर्दी लक्षात घेऊन पिंपरी-चिंचवड वाहतूक शाखेकडून 4 ते 6 मार्चदरम्यान विशेष वाहतूक बदल लागू करण्यात आले आहेत. वाहतूक शाखेचे उपायुक्त विवेक पाटील यांनी याबाबतचे आदेश जारी केले आहेत.
जुना मुंबई-पुणे महामार्गावरील देहूगाव कमान ते देहूकडे जाणारा मार्ग (सार्वजनिक बसेस व दिंडीतील वाहनांव्यतिरिक्त) 4 ते 6 मार्चदरम्यान बंद राहणार आहे. महिंद्रा सर्कल ते फिजिक्स कॉर्नर, कॅनबे चौक, आयटी पार्क चौक, तळेगाव-चाकण रोडवरील देहूफाटा ते देहूगाव मार्ग, आयटी पार्क-कॅनबे चौक ते काळोखे पाटील चौक, त्रिवेणीनगर चौक (निगडी) ते तळवडे चौक, डायमंड चौक ते देहू मार्ग, तसेच 14 टाळकरी कमान ते भैरवनाथ चौक, काळोखे पाटील चौक ते देहू मुख्य कमान आणि परंडवाल चौक या मार्गांवरही वाहतूक निर्बंध लागू राहणार आहेत.
जुना पालखी मार्ग (केंद पाटील चौक ते झेंडे मळा जकात नाका) हा ‘वन-वे’ करण्यात येणार असून, झेंडेमळ्याकडून केंद पाटील चौकाकडे प्रवेश बंद राहील. पर्यायी मार्ग म्हणून भक्ती-शक्ती चौक, मोशी फाटा, एच.पी. चौक, संविधान चौक, कृष्णानगर चौक, कुंडवडी सर्कल आदी मार्गांचा वापर करण्याचे आवाहन करण्यात आले आहे.
वाहनतळांची सोय
आळंदी-तळवडे मार्गाने येणाऱ्या वाहनांसाठी माऊली वजनकाटा, काळोखे पाटील चौक व गायरान परिसरात पार्किंगची व्यवस्था करण्यात आली आहे. जुना पुणे-मुंबई महामार्गावरील देहू कमान येथून येणाऱ्यांसाठी राधाकृष्ण लॉन्सशेजारील सीओडी जागेत वाहनतळ उपलब्ध राहील. देहू फाटा मार्गाने येणाऱ्यांसाठी सप्तपदी लॉन्स, येलवडी शॉपिंग कॉम्प्लेक्स, भिगवडी लॉन्स तसेच साईराज चौक ते देहू फाटादरम्यानच्या मोकळ्या जागांमध्ये पार्किंगची सोय करण्यात आली आहे. संबंधित ठिकाणी पीएमपीएमएल बस पार्किंगचीही व्यवस्था असणार आहे.
देहू परिसरात वाढतीवस्ती आणि मर्यादित वाहनतळ लक्षात घेता भाविकांनी शक्यतो सार्वजनिक वाहतुकीचा वापर करावा. तसेच वाहतूक पोलिसांच्या सूचनांचे पालन करावे, असे आवाहन उपायुक्त पाटील यांनी केले आहे. वाहतूक कोंडी टाळण्यासाठी पर्यायी मार्गांचा अवलंब करण्याचेही आवाहन करण्यात आले आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– तळेगाव दाभाडे नगरपरिषद प्रशासनाची धडक कारवाई ; दहा अनधिकृत नळ जोडण्या खंडीत केल्या
– पुणे ते लोणावळा दरम्यान लोकलच्या फेऱ्या वाढविण्याची गरज ; रेल्वे प्रवाशांची मागणी
– कृत्रिम फुलांच्या वापरावरील बंदीसंदर्भात स्पष्टतेसाठी शासन निर्णय लवकरच ; मुख्यमंत्री देवेंद्र फडणवीस यांची घोषणा
– पवन मावळातील गावागावांत पोहोचणार विज्ञानाचे धडे देणारी फिरती प्रयोगशाळा ; ‘नॉलेज ऑन व्हिल्स’ बसचे लोकार्पण
