Dainik Maval News : पवन मावळ विभागातील शिळींब गावातील जागृत देवस्थान श्री काळभैरवनाथ देवाचा वार्षिक उत्सव येत्या सोमवारी (दि. 20 एप्रिल) चैत्र कृष्ण कालाष्ठमी रोजी होणार आहे. त्यानिमित्त सोमवार, दि. २० एप्रिल व मंगळवार, दिनांक २१ एप्रिल रोजी विविध कार्यक्रमांचे आयोजन करण्यात आले असल्याची माहिती उत्सव समितीकडून देण्यात आली आहे.
सोमवारी सकाळी देवाचा अभिषेक, सायंकाळी भव्य पालखी सोहळा, त्यानंतर रात्री काळोखेवाडी (वेल्हावळे, ता. खेड) येथी श्री गुरुदत्त कलापथक भजनी भारुड मंजळ यांचा भारूडाचा कार्यक्रम होणार आहे. तर मंगळवारी, भारुडाचा हजेरीचा कार्यक्रम होणार असल्याचे उत्सव समिती व संयोजकांनी सांगितले.
दरम्यान, शिळींब गावात सध्या ग्रामदैवत श्री काळभैरवनाथ महाराज देवाच्या मंदिराचे जीर्णोद्धाराचे काम सुरू असून काम अंतिम टप्प्यात आहे. लोकवर्गणीतून साकारत असलेल्या या भव्य मंदिराचा कलश पूजन व वास्तूशांती सोहळा याच महिन्यात अखेरीस होणार आहे, त्यामुळे वार्षिक उत्सवातील कार्यक्रम मर्यादीत करून मंदिर पूर्णत्वाकडे नेण्याचा कौतुकास्पद निर्णय ग्रामस्थांनी सर्वानुमते घेतला आहे.
मंदिराचा कलश पूजन आणि वास्तूशांती सोहळा
ग्रामदैवत श्री भैरवनाथ महाराज मंदिराचे काम जवळपास पूर्ण झाले असून मंगळवारी, २९ एप्रिल रोजी कलश मिरवणूक आयोजित केली आहे. तर, बुधवारी (दि. ३० एप्रिल) रोजी अक्षय्य तृतीयाच्या शुभदिनी मंदिर वास्तुशांती, कलश पूजन आदी कार्यक्रम असणार आहेत. यानिमित्त कीर्तन व इतरही कार्यक्रमांचे आयोजन केले आहे. ग्रामदैवताचे भव्यदिव्य व सुरेख असे मंदिर पूर्ण होत असताना मंदिराचे कलश पूजन, वास्तूशांती हे सोहळे भव्यदिव्य व्हावे, याकरिता वार्षिक उत्सवाचे कार्यक्रम मर्यादीत करून मंदिर उभारणीसह लोकार्पण सोहळ्यात योगदान देण्याचा निर्णय गावकऱ्यांनी घेतल्याचे ग्रामस्थांनी आणि मंदिर पंच कमिटीने सांगितले.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– श्री संत तुकाराम सहकारी साखर कारखान्याचा 27वा गाळप हंगाम संपन्न ; 4 लाख 64 हजार पोती साखरेचे उत्पादन
– ‘मी 1 लाख 10 हजार मतांनी निवडून आलो, त्यामुळे आता 1 लाख 10 हजार झाडे लावणार’ ; आमदार शेळके यांचा संकल्प
– लोहगड किल्ल्याच्या विकासासाठी केंद्र सरकारकडून अडीच कोटींचा निधी ; खासदार श्रीरंग बारणे यांची माहिती । Lohgad Fort
