आमदार सुनिल शेळके यांनी घेतली ‘तालुकास्तरीय आढावा बैठक’, ग्रामस्थांनी वाचला तक्रारींची पाढा
जल जीवन मिशन, बांधकाम विभाग जिल्हा परिषद, विद्युत विभाग अंतर्गत तालुक्यातील विविध कामांसंदर्भातील आढावा बैठक आमदार सुनिल शेळके यांच्या प्रमुख उपस्थितीत शासकीय विश्रामगृह वडगाव मावळ येथे संपन्न झाली.
ग्रामसेवक,सरपंच,सदस्य आणि प्रत्येक विभागाचे वरिष्ठ अधिकारी यांची एकत्रित बैठक घेतल्याने जिल्हा परिषद व पंचायत समितीकडील कामांची सद्यस्थिती जाणून घेण्यात आली.आमदार शेळके यांनी गावनिहाय समस्यांचा आढावा घेऊन त्यावर तात्काळ कार्यवाही करण्याच्या सुचना अधिकाऱ्यांना दिल्या.
यामध्ये प्रामुख्याने जल जीवन मिशन अंतर्गत सुरु असलेल्या पाणी योजनांची सद्यस्थिती तसेच ज्या योजनांची कामे अर्धवट ठेवली आहेत,त्या ठेकेदारांवर तात्काळ कारवाई करुन कामे मदतीत पूर्ण करावीत.फिल्टर प्लांट,पाण्याची टाकी, पाईपलाईन, नळ जोडणी ही अपूर्ण कामे दर्जेदार करून मार्गी लावावीत अशा सूचना पाणीपुरवठा विभागाच्या अधिकाऱ्यांना आमदार शेळके यांनी दिल्या.
तसेच ग्रामस्थांनी केलेल्या तक्रारींची दखल घेऊन अनेक गावांमध्ये अधिक क्षमतेचे ट्रान्स्फॉर्मर व विजेचे नवीन खांब टाकावेत आणि भारनियमन कमी करून गाव पातळीवरील समस्या सोडवण्यासाठी प्रयत्न करावेत,अशा स्पष्ट सूचना विद्युत विभागाच्या अधिकाऱ्यांना दिल्या आहेत.तसेच जिल्हा परिषद बांधकाम विभागाने त्यांचे अखत्यारितील उर्वरित कामांच्या निविदा तात्काळ काढून कामांना गती द्यावी,अशा सूचना बैठकीत देण्यात आल्या.
याबैठकीस जिल्हा परिषदेचे उपमुख्य कार्यकारी अधिकारी चंद्रकांत वाघमारे, कार्यकारी अभियंता ग्रामीण पाणीपुरवठा अमित पाथरवट, बांधकाम विभाग उपअभियंता संजय पाटील, उपअभियंता मनोज क्षीरसागर, विद्युत विभाग कार्यकारी उपअभियंता राजेंद्र गोरे, उपअभियंता शैलेश गीते, विस्तार अधिकारी बाळासाहेब वाईकर,पीएमआरडीए सदस्या दिपाली हुलावळे, राष्ट्रवादी महिला काँग्रेस अध्यक्षा दिपाली गराडे, ग्रामपंचायतींचे ग्रामसेवक,सरपंच, सदस्य व ग्रामस्थ उपस्थित होते.
