Dainik Maval News : मावळ तालुक्यातील पवन मावळ विभागातील दुर्गम मोरवे गावात रानात चरत असलेल्या बैलांना शनिवारी (दि. २६ सप्टेंबर) दुपारी विद्युत वाहिनीचा तीव्र झटका बसल्याने त्यांचा जागीच मृत्यू झाल्याची दुर्दैवी घटना घडली आहे.
शेतातून गेलेली खासगी क्षेत्राकडील चालू विद्युत वाहिनी अचानक खाली कोसळल्याने तिच्या संपर्कात आलेल्या दोन बैलांचा विजेच्या धक्क्याने जागीच मृत्यू झाला. बैलांचा हंबरडा ऐकून त्यांना वाचवण्यासाठी धावलेल्या शेतकऱ्यालाही विजेचा धक्का बसला; मात्र हातात काठी असल्याने तो थोडक्यात बचावला.
मिळालेल्या माहितीनुसार, मोरवे परिसरात शनिवारी दुपारी चारच्या सुमारास येथील शेतकरी काशिनाथ एकनाथ घारे (वय ६६) त्यांचे बैल चरण्यासाठी रानावर घेऊन गेले होते. ज्या शेतात बैल चरत होते, त्या ठिकाणाहून एका धनाढ्य व्यक्तीच्या प्रॉपर्टीवर खासगी विद्युत वाहिनी गेली होती. ही चालू विद्युत वाहिनी अचानक खाली कोसळली आणि चरत असलेल्या दोन बैलांच्या संपर्कात आली. काही क्षणांतच दोन्ही बैलांना विजेचा जोरदार धक्का बसला आणि त्यांचा मृत्यू झाला.
बैलांचा हंबरडा ऐकून शेतकरी घाबरून घटनास्थळी धावला. आपल्या डोळ्यांसमोर बैल तडफडताना पाहून त्याने त्यांना वाचवण्याचा प्रयत्न केला. मात्र त्याचवेळी त्यालाही विजेचा सौम्य धक्का बसला. सुदैवाने त्याच्या हातात काठी असल्याने शेतकरी विद्युत प्रवाहाच्या थेट संपर्कात येण्यापासून बचावला. त्यामुळे मोठी दुर्घटना टळली.
शेतकऱ्याच्या उदरनिर्वाहासाठी महत्त्वाचे असलेले दोन्ही बैल या घटनेत दगावल्याने त्याचे जवळपास लाखो रुपयांचे नुकसान झाले आहे. तसेच कुटुंबावर दुःखाचा डोंगर कोसळला आहे, शेतकऱ्याच्या दृष्टीने ही केवळ आर्थिक हानी नसून शेतीच्या कामासाठी आधार असलेल्या जनावरांचा झालेला मृत्यू हा मोठा भावनिक धक्का आहे.
या घटनेनंतर संबंधित विद्युत वाहिनीची सुरक्षितता, देखभाल आणि ती शेतातून नेण्याबाबत आवश्यक खबरदारी घेण्यात आली होती का, याची चौकशी करण्याची मागणी होत आहे. चालू विद्युत वाहिनी अशा प्रकारे शेतात कोसळून दोन जनावरांचा जीव जाणे ही बाब गंभीर असल्याने संबंधित यंत्रणेने याकडे गांभीर्याने पाहण्याची गरज आहे.
या घटनेचा संबंधित विभागाने तातडीने पंचनामा करून शेतकऱ्याला योग्य नुकसानभरपाई द्यावी, अशी मागणी करण्यात आली आहे. तसेच विद्युत वाहिनीच्या सुरक्षिततेबाबत हलगर्जीपणा किंवा निष्काळजीपणा आढळल्यास संबंधित धनाढ्य व्यक्तीविरोधात निष्काळजीपणामुळे झालेल्या दुर्घटनेप्रकरणी कायदेशीर कारवाई करावी, अशी मागणीही करण्यात आली आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा
– दुःखद घटनांच्या पार्श्वभूमीवर वडगाव शहरात गणेश मंडळांकडून विसर्जन मिरवणुका रद्द ; साधेपणाने बाप्पाला निरोप
– पुढच्या वर्षी लवकर या… पवनानगर परिसरात दीड दिवसांच्या गणरायाला भक्तिमय वातावरणात निरोप
– टाकवे बुद्रुक बाललैंगिक अत्याचार प्रकरण : खटला ‘फास्टट्रॅक’वर चालवून आरोपीला कठोर शिक्षेची तृप्ती देसाईंची मागणी
– ‘मावळचे भाग्यविधाते’ माजी मंत्री मदन बाफना यांना शासकीय इतमामात अखेरचा निरोप
