Dainik Maval News : अल्पवयीन बालकांविरुद्धच्या गुन्ह्यांमध्ये दोषींना शिक्षा मिळवून देण्यासाठी प्रभावी तपास, पुराव्यांचे शास्त्रोक्त संकलन आणि न्यायालयीन प्रक्रियेत सातत्यपूर्ण पाठपुरावा किती महत्त्वाचा असतो, हे कामशेत पोलीस स्टेशनच्या एका महत्त्वपूर्ण निकालातून अधोरेखित झाले आहे.
कामशेत पोलीस स्टेशन येथे दाखल गुन्हा रजिस्टर क्रमांक ५८/२०२३, भारतीय दंड विधान कलम ३५४ व बालकांचे लैंगिक अपराधांपासून संरक्षण अधिनियम (POCSO) कलम ८ व १२ अन्वये दाखल प्रकरणात मा. जिल्हा व अतिरिक्त सत्र न्यायालय, वडगाव मावळ, पुणे यांनी आरोपी योगेश प्रकाश सोमवंशी (वय ४८ वर्षे, रा. धानोरी, पुणे) यास दोषी ठरवून कारावासाची शिक्षा सुनावली आहे.
तपासातील सातत्य आणि समन्वय ठरला महत्त्वाचा
सदर गुन्ह्याचा तपास तत्कालीन तपासी अधिकारी व सध्या कामशेत पोलीस स्टेशनचे प्रभारी अधिकारी म्हणून कार्यरत असलेले सहायक पोलीस निरीक्षक आकाश पवार यांनी केला. तपासाच्या प्रत्येक टप्प्यावर आवश्यक बाबींची पूर्तता करून प्रकरण न्यायालयात प्रभावीपणे सादर होण्यासाठी त्यांनी तपासकार्य केले. या कामात त्यांचे सहकारी पोलीस हवालदार आशिष झगडे यांनी मोलाचे सहकार्य केले. तसेच पोलीस हवालदार संदीप शिंदे व पोलीस शिपाई सौरभ गायकवाड यांनी न्यायालयीन कामकाजासाठी सहकार्य केले.
गुन्ह्याच्या तपासापासून ते न्यायालयीन निकालापर्यंत आवश्यक समन्वय राखणे, तपासातील बाबींचा योग्य पाठपुरावा करणे आणि न्यायालयीन प्रक्रियेसाठी सहकार्य करणे, या सामूहिक प्रयत्नांना या निकालामुळे महत्त्व प्राप्त झाले आहे.
सदर प्रकरणाची सुनावणी मा. जिल्हा व अतिरिक्त सत्र न्यायाधीश डी. के. अनभुले यांच्या न्यायालयात झाली. सरकार पक्षातर्फे सरकारी अभियोक्ता संतोष परदेशी व लालचंद ओसवाल यांनी काम पाहिले.
न्यायालयाने सुनावलेली शिक्षा
१. POCSO कायदा कलम ८ — ४ वर्षे सक्तमजुरी व ₹१०,००० दंड; दंड न भरल्यास ६ महिने साधी कैद.
२. POCSO कायदा कलम १२ — ३ वर्षे साधी कैद व ₹५,००० दंड; दंड न भरल्यास ६ महिने साधी कैद.
३. भारतीय दंड विधान कलम ३५४ — ४ वर्षे सक्तमजुरी व ₹१०,००० दंड; दंड न भरल्यास ६ महिने साधी कैद.
न्यायालयीन कामकाजातील सहकार्य
या प्रकरणात वडगाव मावळ सत्र न्यायालयाचे पैरवी अंमलदार GPSI वाघमारे व जिल्हा न्यायालयाच्या अधिकारी माधुरी तावरे यांनीही समन्वय साधला.
बालकांविरुद्धच्या गुन्ह्यांबाबत कठोर आणि परिणामकारक कारवाईचा संदेश
अल्पवयीन बालकांचे संरक्षण, त्यांच्यावरील गुन्ह्यांचा प्रभावी तपास आणि दोषींना कायद्यानुसार शिक्षा मिळवून देण्यासाठी पोलीस यंत्रणा कटिबद्ध आहे. कामशेत पोलीस स्टेशनच्या या प्रकरणातील निकालातून तपासातील जबाबदारी, समन्वय आणि न्यायालयीन प्रक्रियेतील सातत्यपूर्ण पाठपुराव्याचे महत्त्व स्पष्ट झाले आहे.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा
– दुष्काळग्रस्त तालुक्यांच्या यादीत मावळ, मुळशीचा समावेश करावा; पुणे जिल्हा परिषदेत ठराव एकमताने मंजूर
– कामशेत पोलिसांची तत्पर कामगिरी! हरवलेल्या चार अल्पवयीन बालकांचा अवघ्या तीन तासांत शोध ; पालकांच्या स्वाधीन
– वडगाव मावळमध्ये शुक्रवारपासून दिवसाआड पाणीपुरवठा ; पाणीसाठ्याचे नियोजन करण्यासाठी नगरपंचायतीचा निर्णय
– पक्ष नेतृत्वाच्या बदनामीकारक पोस्टना प्रतिक्रिया देऊ नये ; “सोशल मीडियावर निरर्थक वाद नको” – गणेश खांडगे
