Dainik Maval News : लोणावळा शहरातील एका पेट्रोल पंपावर १ रूपया देण्याच्या क्षुल्लक कारणावरून मोठा राडा झाल्याची घटना समोर आली आहे. पेट्रोल भरल्यानंतर सुट्ट्या पैशाच्या वादातून काही तरुणांनी मिळून पंप कर्मचाऱ्यांना लाथाबुक्क्यांनी आणि लोखंडी रॉडने बेदम मारहाण केल्याचा प्रकार सीसीटीव्हीत कैद झाला आहे.
इतकेच नव्हे तर संतप्त टोळक्याने पंपाच्या कार्यालयाचीही मोठ्या प्रमाणावर तोडफोड केली आहे. याप्रकरणी लोणावळा शहर पोलिसांनी ७ जणांसह इतर अज्ञात इसमांविरुद्ध गुन्हा दाखल केला आहे.
मिळालेल्या माहितीनुसार, संबंधित पेट्रोल पंपावर तरूण पेट्रोल भरण्यासाठी आले होते. पेट्रोल भरून झाल्यानंतर बिल देताना केवळ ‘एक रुपया’ कमी असल्याच्या कारणावरून कर्मचारी आणि त्यांच्यात बाचाबाची सुरू झाली. सुरुवातीला हा वाद शाब्दिक होता, मात्र त्याचे रूपांतर लवकरच हिंसक संघर्षात झाले.
आरोपी तरूणांनी इतर साथीदारांना बोलावून घेत कर्मचाऱ्यांवर हल्ला चढवला. मारहाणीच्या या घटनेत पेट्रोल पंपावरील कर्मचारी गंभीर जखमी झाले. हल्ला एवढा भीषण होता की आरोपींनी पंपाच्या केबिनमध्ये घुसून तिथल्या संगणकाची, काचांची आणि फर्निचरची तोडफोड केली.
अचानक झालेल्या या हल्ल्यामुळे परिसरात मोठी खळबळ उडाली, इतर ग्राहक आणि कर्मचाऱ्यांमध्ये भीतीचे वातावरण पसरले होते. ही संपूर्ण घटना सीसीटीव्ही (CCTV) कॅमेऱ्यात कैद झाली आहे.
घटनेची माहिती मिळताच लोणावळा शहर पोलिसांनी तातडीने घटनास्थळी धाव घेतली. पीडित कर्मचाऱ्यांच्या तक्रारीवरून पोलिसांनी ७ निष्पन्न आरोपींसह त्यांच्या इतर साथीदारांविरुद्ध विविध कलमान्वये गुन्हा नोंदवला आहे.
“क्षुल्लक कारणावरून कायदा हातात घेणाऱ्यांची गय केली जाणार नाही,” असा इशारा पोलिसांनी दिला असून फरार आरोपींचा शोध घेण्यासाठी पथके रवाना करण्यात आली आहेत.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मोठी बातमी ! वडगाव मावळ आणि कामशेत पोलीस ठाण्याचे PI बदलले, पाहा कोण आहेत नवीन पोलीस निरिक्षक
– तळेगाव ते चाकण ४ पदरी उन्नत महामार्गास मान्यता ; मुख्यमंत्र्यांच्या उपस्थितीत झालेल्या बैठकीत निर्णय
– वृक्षमित्र म्हणून प्रसिद्ध अभिनेते सयाजी शिंदे यांच्या उपस्थितीत मावळमध्ये विशेष वृक्षारोपण कार्यक्रम संपन्न
– यंदाचा गुढीपाडवा ठरला ऐतिहासिक ! आई एकविरा देवीच्या मंदिराचा चोरीला गेलेला कळस तब्बल ८ वर्षांनी मिळाला
