Dainik Maval News : लोणावळा नगरपरिषदेमधील सत्ताधारी पक्षाचे नगराध्यक्ष, उपनगराध्यक्ष व नगरसेवक यांनी दिनांक 20 मार्च रोजी लोणावळा नगरपरिषदेचे मुख्याधिकारी यांच्या कार्यालयाला कुलूप लावत त्यांच्या कार्यपद्धतीचा निषेध नोंदविला होता. दुसरीकडे मुख्याधिकारी यांनी, माझ्याकडे कोणतीही फाईल प्रलंबित नसल्याचे सांगत कामाच्या बाबतीमध्ये चोख असल्याचे म्हटले होते.
दरम्यान शासकीय कार्यालयाला कुलूप लावण्याची लोकप्रतिनिधींची ही कृती कायदा व्यवस्थेला धरून नसल्याने जिल्हाधिकारी यांच्या आदेशाने तहसीलदार विक्रम देशमुख यांनी पोलीस बंदोबस्तामध्ये कार्यालयाला लावण्यात आलेले कुलूप काढले आहे.
गुरुवारी, दि. 26 मार्च रोजी सायंकाळी तहसीलदार यांच्या उपस्थितीमध्ये मुख्याधिकारी कार्यालयाचे कुलूप खोलण्यात आले. तर, शुक्रवारी दि. 27 मार्च रोजी आमदार सुनील शेळके यांनी मुख्याधिकारी व लोकप्रतिनिधी यांची एकत्रित बैठक घेत सर्वांना सूचना दिल्या आहेत. विकासकामे करत असताना शासन व प्रशासन यांनी एकत्रित येऊन काम केले तरच खऱ्या अर्थाने विकास होऊ शकतो, असे त्यांनी सांगितले आहे.
आमदार सुनील शेळके यांच्या प्रमुख उपस्थितीमध्ये शुक्रवारी (दि. 27 मार्च) रोजी लोणावळा नगरपरिषदेमधील नगराध्यक्ष, उपनगराध्यक्ष व नगरसेवक तसेच मावळचे प्रांत अधिकारी, तहसीलदार व मुख्याधिकारी यांची संयुक्त बैठक झाली. या बैठकीमध्ये लोकप्रतिनिधी यांच्या भावना व मुख्याधिकारी यांची बाजू ऐकून घेतली. यानंतर मुख्याधिकारी यांनी शहरातील नागरिक, लोकप्रतिनिधी व विकासकामांना अधिकचा वेळ देण्याचे मान्य केले आहे.
सर्व लोकप्रतिनिधींनी सकारात्मकता दाखविली आहे. परंतु, मुख्याधिकारी यांनी कामकाजाच्या पद्धतीमध्ये बदल करावा व अधिकचा वेळ शहराच्या विकासासाठी द्यावा, जास्तीत जास्त वेळ कार्यालयामध्ये उपस्थित राहावे, अशा अपेक्षा सत्ताधारी पक्षातील लोकप्रतिनिधींनी व्यक्त केल्या आहेत. तसेच, पुढील काही दिवसांमध्ये यात सुधारणा न झाल्यास आंदोलन पुन्हा उभे केले जाईल, तूर्तास ते स्थगित केले असले तरी थांबलेले नाही, असेही लोकप्रतिनिधींनी सांगितले आहे.
आमदार सुनील शेळके व प्रांत अधिकारी यांनी बैठकीमध्ये मुख्याधिकारी यांना सूचना दिल्या असून लोकप्रतिनिधींना विश्वासात घेऊन जनतेच्या विकासाची कामे करा, असे सांगितले आहे. मुख्याधिकारी यांनी याबाबतीमध्ये सकारात्मक राहण्याचे सांगितल्यानंतर आमचे मनोमिलन झाले आहे. – राजेंद्र सोनवणे, नगराध्यक्ष, लोणावळा, न.प.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– वडगाव मावळ येथे ३९.३३ कोटींच्या पाणीपुरवठा योजनेचा शुभारंभ ; आमदार सुनील शेळके यांच्या पुढाकारातून शहरवासीयांना दिलासा
– लोणावळ्यात एक रूपयासाठी तुफान राडा ! पेट्रोल पंपाच्या कार्यालयाची तोडफोड आणि कर्मचाऱ्यांना मारहाण ; 7 जणांसह अज्ञातांवर गुन्हा दाखल
– शेतकरी मित्रांनो, तुमचे बँक खाते तपासा ! मुख्यमंत्री व दोन्ही उपमुख्यमंत्र्यांच्या हस्ते शेतकरी महासन्मान निधी योजनेच्या आठव्या हप्त्याचे वितरण
