जनसेवा विकास आघाडीचे संस्थापक अध्यक्ष किशोर आवारे यांच्यावर शुक्रवारी (दिनांक 12 मे) दुपारच्या सुमारास तळेगाव नगरपरिषदेच्या कार्यालयासमोर प्राणघातक हल्ला करण्यात आला, ज्यात त्यांचा उपचारापूर्वीच मृत्यू झाला.
भरदिवसा दुपारच्या सुमारास नगरपरिषद कार्यालयासमोर झालेल्या या घटनेने तळेगाव शहरात तणाव असून मावळ तालुक्यात दहशतीचे वातावरण तयार झाले आहे. अशात किशोर आवारे यांच्या मातोश्री तथा तळेगाव नगरीच्या माजी नगराध्यक्षा सुलोचना आवारे यांनी दिलेल्या जबाबावरुन सात जणांवर पोलिसांकडून गुन्हा दाखल करण्यात आला आहे.
दैनिक मावळचा व्हॉट्सअ‍ॅप ग्रुप जॉइन करण्यासाठी इथे क्लिक करा
गुन्हा दाखल करण्यात आलेल्या व्यक्तींमध्ये मावळ तालुक्याचे विद्यमान आमदार सुनिल शेळके यांसह त्यांचे बंधू सुधाकर शेळके यांसह एकूण सात जणांचा समावेश आहे. किशोर आवारेंच्या हत्याप्रकरणात आता आमदार शेळकेंचेही नाव घेतले गेल्याने संपूर्ण मावळसह पुणे जिल्ह्यात एकच खळबळ माजली आहे.
सुलोचना आवारे यांनी तळेगाव दाभाडे पोलीस ठाण्यात दिलेल्या फिर्यादीत त्यांनी, आमदार सुनिल शेळके, उद्योजक सुधाकर शेळके, संदीप गराडे यांचा उल्लेख केला असून अन्य चार जण अशा सात जणांवर गुन्हा दाखल करण्यात आला आहे. ( Breaking News Case filed against MLA Sunil Shelke in murder of Kishore Aware )
हेही वाचा – प्राणघातक हल्ल्यात गंभीर जखमी झालेले किशोर आवारे यांचे निधन, मावळ तालुक्यात खळबळ । Kishor Aware Murder News
सुलोचना आवारे यांनी फिर्यादीत म्हटले आहे की; आमदार सुनिल शेळके, सुधाकर शेळके व संदीप गराडे यांच्यापासून माझ्या जीवाला धोका आहे असे किशोर आवारे यांनी मला सांगितले होते. मागील काही महिन्यांपासून त्यांच्यात खटका उडत होता. सामाजिक कार्यासह राजकारणात किशोर आवारे सक्रीय झाले होते. तसेच किशोर आवारे हे सुनिल शेळके यांचे प्रमुख राजकीय विरोधक होते. त्यांचे राजकीय वर्चस्व निर्माण होत होते, ज्यामुळे सुनिल शेळके यांना आणि त्यांच्या बंधूंच्या राजकीय वर्चस्वाला धोका निर्माण झाला होता. तसेच माझ्या चालकाला देखील सुधाकर शेळके यांनी जातीचावक शिविगाळ केली होती असे फिर्यादीत म्हटले आहे.
तसेच, वरील सर्वांनी संगनमत करुन तळेगाव नगरपरिषद कार्यालयाच्या परिसरात श्याम निगडकर व त्याच्या तीन साथीदारांनी किशोर आवारे यांच्यावर शुक्रवारी दुपारी बंदूकीतून गोळ्या झाडत व कोयत्याने वार करत त्यांची हत्या केली असल्याची फिर्याद सुलोचना आवारे यांनी दिली आहे. दरम्यान सीसीटीव्ही फुटेजमधून आरोपीचे चेहरे समोर आले आहेत. प्रत्यक्ष साक्षीदार देखील उपलब्ध असल्याने आरोपींच्या मागावर क्राईम ब्रांचची पथके रवाना करण्यात आली असल्याची माहिती पोलीस उपायुक्त पद्माकर घनवट व काकासाहेब डोळे यांनी दिली.
अधिक वाचा –
– आंदर मावळातील नागाथली गावात गोठ्याला आग लागल्याने सहा म्हशींचा होरपळून मृत्यू
– ‘चांदणी चौकातील उड्डाण पुलाला मुळशी सत्याग्रहाचे नायक सेनापती बापट यांचे नाव द्या’, सुप्रिया सुळेंची मागणी
