Dainik Maval News : सातत्याने विजपुरवठा खंडित होत असल्याने वडगाव मावळ शहरातील नागरिक त्रस्त झाले आहेत. वेळी अवेळी कोणत्याही पुर्वसूचनेशिवाय शहरात विज गायब होत असल्याने सामान्य नागरिकांसह, लहान मोठ्या उद्योजक व्यवसायिकांना नाहक त्रास सहन करावा लागत आहे. तालुक्याचे ठिकाण असुनही महावितरणकडून शहराला सुरळीतपणे विजपुरवठा करणे शक्य होत नसल्याने नागरिकांकडून नाराजी व्यक्त करण्यात येत आहे.
वडगाव मावळ शहरात वीज पुरवठा सातत्याने खंडित होत असून याचा स्थानिक उद्योग-व्यवसायावर गंभीर परिणाम होत आहे. शिवाय, महसूल केंद्र असलेल्या वडगावातील दैनंदिन कामकाजाचा खोळंबा होत आहे. रविवारी रात्री (दि.२३) आणि सोमवारी सकाळपासून शहरातील वीजपुरवठा ठप्प होता. तर मंगळवार सकाळपासून पुन्हा विजेचे येणे – जाणे सुरू झाले आहे, यामुळे नागरिक संतप्त झालेत.
- शहर परिसरात कुठल्याही पूर्वसूचनेशिवाय वीज पुरवठा खंडित केला जात आहे. वडगावात तहसील कार्यालय, पोलीस ठाणे, दुय्यम निबंधक, तलाठी कार्यालय, सत्र न्यायालय, सहायक निबंधक कार्यालय, शाळा, महाविद्यालय, बाजारपेठ येथे आहे. त्यामुळे तालुक्याभरातून आलेल्या नागरिकांची मोठी वर्दळ येथे असते. अशावेळी सतत वीज पुरवठा खंडित झाल्याने या सर्वांचीच गैरसोय होत आहे.
तर, सकाळपासून विजेच्या अनियमित पुरवठ्यामुळे सामान्य नागरिकांना दैनंदिन कामकाजात अडणींचा सामना करावा लागत आहे. यात पाणीपुरवठा विस्कळीत होण्यापासून ते विजेची उपकरणे वापराविना कामे उरकावी लागत आहेत. यामुळे गृहिणी त्रस्त आहेत. सध्या दहावी, बारावीच्या बोर्ड परीक्षा सुरू आहेत. अशावेळी अचानक वीज जाण्याने विद्यार्थ्यांच्या अभ्यासावरही परिणाम होत आहे.
एकीकडे कामाचा खोळंबा आणि दुसरीकडे कडक उन्हाळ्याची चाहूल लागली आहे. अशावेळी विजेच्या अभावी नागरिकांना उष्म्यात दिवस काढावा लागत आहे. घरात विजेची उपकरणे असूनही ऐन दुपारी तर कधी कधी सायंकाळी विज गायब होत असल्याने नागरिकांना उकाड्याचा सामना करावा लागत आहे. महावितरणचे अधिकारी, विज वाहक वाहिनीची कारणे देत प्रत्येकवेळी वेळ सारून नेण्याचा प्रयत्न करतात. परंतु ग्रामस्थांनी वारंवार निवेदन देऊनही खंडित होणाऱ्या विजेच्या पुरवठ्यावर अधिकाऱ्यांना कोणतेही ठोस उपाययोजना करता येत नाही, हेच सत्य आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– प्रधानमंत्री आवास योजना – ग्रामीण टप्पा 2 अंतर्गत मावळ तालुक्यातील 1,602 लाभार्थींना मंजुरीपत्र वाटप । Maval News
– मोठी बातमी : लोणावळ्यात द्रुतगती मार्गाच्या पुलाखाली उभारण्यात आलेल्या अनधिकृत झोपड्यांवर प्रशासनाची धडक कारवाई । Lonavala
– दहावीच्या विद्यार्थ्यांना आमदार शेळकेंकडून खास पद्धतीने ‘ऑल दी बेस्ट’ ; संपूर्ण तालुक्यातील विद्यार्थ्यांसाठी मोफत बससेवा
