Dainik Maval News : पर्यटननगरी लोणावळा शहरापासून जवळ असलेला, राजमाची मार्गावरील प्रसिद्ध कातळधार धबधबा सुरक्षेच्या कारणास्तव पर्यटकांसाठी प्रतिबंधित करण्यात आला आहे. वनखात्याने त्यासंदर्भात आदेश पारित केले आहेत.
राजमाची किल्ल्याच्या मार्गावर असलेल्या कातळधार धबधब्याकडे जाणारी पायवाट निसरडी आणि धोकादायक झालेली असल्याने, तसेच या मार्गावर अनेक ठिकाणी दरडी सैल झालेल्या असल्याने राजमाची ग्रामस्थांनी हा धबधबा पर्यटकांसाठी बंद करावा, अशी मागणी पोलीस आणि वन खात्याकडे केली होती.
त्याअनुषंगाने कातळधार धबधब्याकडे जाण्यास प्रतिबंध करण्यात आला असून तसे फलक वनखात्याकडून जागोजागी लावण्यात आले आहे. याशिवाय राजमाची किल्ल्याकडे जाणाऱ्या रस्त्यावर ऑफरोडिंग करणाऱ्या वाहनांना देखील बंदी घालण्यात आल्याची माहिती वनपरिमंडळ अधिकारी सागर चुटके यांनी दिली.
दरम्यान, धबधब्याचा पाण्यात भिजण्याची मजा लुटण्यासाठी राजमाचीकडे येणाऱ्या पर्यटकांचा हिरमोड होऊ नये यासाठी फणसराई भागात असलेले ५ ते ६ धबधबे पर्यटकांसाठी खुले ठेवण्यात आले असून त्याठिकाणी सुरक्षित पर्यटनाचा आनंद पर्यटकांनी घ्यावा, असे आवाहन वनखात्याकडून करण्यात आले आहे.
एखादी दुर्घटना घडल्यावर सर्वात आधी प्रशासनाला जबाबदार धरले जाते. मात्र प्रशासनाने दिलेल्या सूचनांकडे दुर्लक्ष करून पर्यटक अतिउत्साहीपणा दाखवतात व त्यानंतर कुंडमळा सारख्या दुर्घटना घडतात, हेही तितकेच खरे आहे. प्रशासनाने दिलेल्या सूचनांचे पालन करीत सुरक्षित पर्यटन करणे, ही सर्वांची जबाबदारी आहे, असे प्रशासनाकडून सांगण्यात आले.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– मावळ तालुक्यात दहा दिवसांत विविध ठिकाणी ९ अजगर सापांना ‘वन्यजीव रक्षक मावळ’ व ‘शिवदुर्ग मित्र’च्या सर्पमित्रांकडून जीवदान । Maval
– राज्य सरकारने शब्द पाळला… आषाढी एकादशी वारीसाठी दिंड्यांना २.८ कोटींचे अनुदान देण्यास मान्यता । Ashadhi Vari 2025
– जन्मदात्याकडून अल्पवयीन लेकीवर लैंगिक अत्या’चार ! लोणावळा शहाराजवळील संतापजनक घटना । Maval Crime
