धाराशिव जिल्ह्यात प्रथमच रंगणार महाराष्ट्र केसरी कुस्ती स्पर्धेचा थरार! संपूर्ण वेळापत्रक जाहीर, ‘या’ दिवशी फायनल

महाराष्ट्रासह संपूर्ण देशातील कुस्ती शौकिनांसाठी महत्वाची असलेली मानाची महाराष्ट्र केसरी स्पर्धा 2023 चे वेळापत्रक जाहीर झाले आहे. यंदा महाराष्ट्र केसरी स्पर्धेचा थरार धाराशिव जिल्ह्यात (पूर्वीचे नाव उस्मानाबाद) रंगणार आहे. एकूण पाच दिवस ही स्पर्धा चालणार आहे. ( Maharashtra Kesari Wrestling Tournament 2023 To Be Held In Dharashiv District View Full Schedule )

महाराष्ट्र केसरी ही महाराष्ट्राच्या मातीत रुजलेली मानाची सर्वात मोठी कुस्ती स्पर्धा आहे. यंदाच्या महाराष्ट्र केसरी स्पर्धेच्या तारखा जाहीर झाल्या आहेत. यंदा ह्या स्पर्धेच्या आयोजनाचा मान मराठवाड्यातील धाराशिव जिल्ह्याला मिळाला आहे. दिनांक 1 नोव्हेंबर ते 5 नोव्हेंबर या दरम्यान धाराशिवच्या तुळजाभवानी क्रीडा संकुलाच्या मैदानावर 65 व्या महाराष्ट्र कुस्ती स्पर्धा चा थरार रंगणार आहे.

दिनांक 1 ते 5 नोव्हेंबर अशी एकूण 5 दिवस ही स्पर्धा चालणार आहे. स्पर्धेत 45 वेगवेगळे जिल्हा संघ सहभागी होणार आहेत. माती आणि गादी असे एकूण 20 वेगवेगळ्या वजनी गटात ही स्पर्धा होईल. जवळपास 900 खेळाडू या स्पर्धेमध्ये सहभागी होणार असून विजेत्यांना स्कॉर्पियो, ट्रॅक्टर आणि बुलेटसह 2 कोटी रुपयांचे बक्षीस दिले जाणार आहेत, अशी माहिती मिळत आहे.

धाराशिवला इतिहासात प्रथमच महाराष्ट्र केसरी स्पर्धेचा मान मिळाला आहे. आयोजकांनी दिलेल्या माहितीनुसार, या स्पर्धेचा थरार हा स्टेडियमच्या आत आणि बाहेर देखील चौकाचौकात स्क्रीनद्वारे पाहायला मिळणार आहे. धाराशिवमध्ये होणाऱ्या स्पर्धेचे आयोजक धाराशिव जिल्हा तालीम संघ, आदर्श शिक्षण प्रसारक मंडळ हे असणार आहेत. ( Maharashtra Kesari Wrestling Tournament 2023 To Be Held In Dharashiv District View Full Schedule )