Dainik Maval News : बैलगाडा शर्यत क्षेत्रात मावळ तालुक्याचे नाव गाजविणारा, मावळची शान आणि मावळकरांचा अभिमान असलेला ‘भारतकेसरी ओम्या’ बैल आज (दि.२७) काळाच्या पडद्याआड गेला. वारंगवाडी येथील रामनाथ (मामा) विष्णू वारिंगे यांचा हा ओम्या बैल आजवर संपूर्ण राज्यभरातील विविध बैलगाडा घाटात, प्रसिद्ध घाटात पळाला आणि आपल्या वेगाने घाटाचा राजा ठरला. ‘भारतकेसरी’ ठरलेल्या ओम्या बैलाच्या निधनाने बैलगाडा शौकिनांमध्ये शोककळा पसरली असून सर्वजण शोकभावना व्यक्त करीत आहेत.
आज (दि. २७ ऑगस्ट) रोजी ओम्या बैलाचे निधन झाले. त्याच्यावर शेकडो बैलगाडाप्रेमी नागरिकांच्या उपस्थितीत अंत्यसंस्कार करण्यात आले. यावेळी आपल्या लाडक्या ओम्याला निरोप देताना अनेकांचे डोळे पाणावले होते. बैलगाडा क्षेत्रात मावळ तालुक्याचे नाव उंचावणाऱ्या ‘भारतकेसरी ओम्या’ बैलास श्रद्धांजली अर्पण करण्यासाठी आणि अखेरचा निरोप देण्यासाठी मोठी गर्दी जमली होती. आपल्या कर्तृत्वाने आणि दमदार कामगिरीने बैलगाडा क्षेत्रात निर्माण केलेली त्याची वेगळी ओळख सदैव स्मरणात राहील, असे उद्गार यावेळी उपस्थितांनी काढले.
राजकीय क्षेत्रातूनही शोकभावना
“मावळ तालुक्याचा अभिमान – ओम्या. ज्या बैलाने आपल्या वेगाच्या जोरावर मावळ तालुक्याचे नाव सुवर्ण अक्षरांत कोरले, त्या लाडक्या “ओम्या” बैलाला भावपूर्ण श्रद्धांजली! मैदान गाजवणारा तुझा वेग, तुझी ताकद आणि तुझी जिद्द कायम स्मरणात राहील. ओम्या… तू फक्त बैल नव्हतास, तर मावळच्या मातीतला अभिमान होतास! तुझ्या आठवणी सदैव मनात जिवंत राहतील… भावपूर्ण श्रद्धांजली!” अशा शब्दांत आमदार सुनील शेळके यांनी मावळचा अभिमान असलेल्या या लाडक्या बैलाप्रती श्रद्धांजली अर्पण केली.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा
– शिळींबची धनगरवस्ती ‘विकासाच्या रस्त्यापासून’ वंचित ; स्वातंत्र्याच्या ८० वर्षानंतरही रस्ता नाही; खांद्यावर दूधाची कावड घेवून रोजची पायपीट सुरूच
– मावळमधील बालवैज्ञानिकांची इस्रो-नासाच्या अभ्यासदौऱ्यासाठी निवड ; आमदार सुनील शेळके यांच्याकडून अभिनंदन
– तळेगाव दाभाडेतील ‘मायमर’ हॉस्पिटलमध्ये प्रसूतीसाठी दाखल झालेल्या महिलेचा आणि नवजात बाळाचा मृत्यू
– कोंडेश्वर तीर्थक्षेत्राच्या विकासाला मिळणार गती ; भाविक-पर्यटकांच्या सुविधांसाठी आमदार सुनील शेळके यांची प्रत्यक्ष पाहणी
