देशाची सार्वत्रिक निवडणूक अर्थात लोकसभा निवडणूक 2024 आता तोंडावर आहे. किंबहुना फक्त निवडणूकीचे पडघम वाजायचे राहिलेत, बाकी निवडणूकीचे वारे हे आधीच वाहू लागलेत. राज्यातील मागील अडीच वर्षांच्या काळातील राजकीय घडामोडींमुळे यंदाच्या लोकसभा निवडणूका या अधिक उत्साहाच्या आणि कांटे की टक्कर वाल्या होणार, हे सांगायला कुणा भविष्यवेत्त्याची गरज नाही. त्यामुळेच महाराष्ट्रातील 48 पैकी लोकसभेच्या प्रत्येक जागेवर वेगवेगळे राजकीय नाट्य जणू पाहायला मिळत आहे. त्यातही मावळ लोकसभेत ( Maval Lok Sabha Election 2024 )सुरु असलेल्या राजकीय नाट्याची चर्चा सबंध राज्यभर होत आहे. याचे कारण म्हणजे, मावळचे विद्यमान आमदार-खासदार दोघेही सत्तेत आहेत आणि दोघेही परस्परविरोधी भूमिका घेत आहेत. त्यामुळे मावळ लोकसभेत नेमके काय चाललंय? हाच प्रश्न प्रत्येकाला पडला आहे. ( मावळ, पिंपरी-चिंचवड, पुणे परिसरातील ताज्या अपडेट्ससाठी दैनिक मावळचा व्हॉट्सअॅप चॅनेल जॉईन करा )
मावळ लोकसभेतील सध्याचे चित्र –
मागील काही दिवसांपासून मावळ लोकसभा मतदारसंघावरून राज्यातील सत्ताधारी महायुती पक्षांत जोरदार रस्सीखेच होताना दिसत आहेत. विद्यमान खासदार श्रीरंग बारणे यांनी सलग तिसऱ्यांदा आपली उमेदवारी स्वत:च जाहीर केली आहे. खासदार श्रीरंग बारणे हे मुख्यमंत्री एकनाथ शिंदे यांच्या शिवसेनेचे खासदार आहेत. तर दुसऱ्या बाजूने भाजपाने मावळात कमल फुलवायचंच, या निर्धाराने बैठकांचा सपाटा लावला आहे. यात माजी मंत्री बाळा भेगडे यांचे नाव आघाडीवर आहे. आपल्याला माहितीच आहे की, भाजपा हाही महायुतीत आणि सत्तेत आहे. तिसरीकडे आमदार सुनिल शेळके यांनी देखील, मावळ लोकसभेची जागा राष्ट्रवादी अजित पवार गटाला मिळावी यासाठी रोखठोक भूमिका घेतली आहे. दुसरीकडे ते श्रीरंग बारणे यांचाही विरोध करताना दिसत आहे. त्यामुळे महायुतीतील तिन्ही पक्षांच्या तिन्ही नेत्यांनी मावळ लोकसभेवर आपला दावा सांगितल्याने, ह्या जागेचे काय होणार? यावर राजकीय चर्चा रंगू लागल्या आहेत. ( Maval Lok Sabha Election 2024 MP Shrirang Barane MLA Sunil Shelke BJP Bala Bhegade )
आण्णांचा आप्पांना विरोध –
भाजपाने मावळच्या जागेवर दावा सांगताना बारणेंच्या उमेदवारीला विरोध केलेला नाही, परंतू श्रीरंग बारणे यांनी कमळाच्या चिन्हावर निवडणूक लढवावी, अशी भाजपाची मागणी असल्याची चर्चा सध्या होत आहे. अशात खासदार बारणेंची राजकीय कोंडी होऊ शकते. त्यात आमदार सुनिल शेळके यांनीही आपली स्पष्ट भुमिका घेतली असून त्यांचा बारणेंच्या उमेदवारीला विरोध दिसून येत आहे.
आमदार शेळकेंनी काय म्हटलंय?
श्रीरंग बारणे हे शिवसेनेचे असले तरी ऐनवेळी ते कमळाच्या चिन्हावरही निवडणूक लढवू शकतात, अशी चर्चा सध्या सुरू आहे. त्यावर आमदार शेळकेंना विचारले असता त्यांनी एका माध्यमाला आपली प्रतिक्रिया देताना, ‘मावळ तालुक्याचा लोकप्रतिनिधी म्हणून जबाबदारी म्हणून माझ्या मतदारसंघातील जी लोकभावना आहे, ती मांडण्याचा माझ्या पक्षाकडे प्रयत्न केलेला आहे. पिंपरी चिंचवड, मावळ, कर्जत, पनवेल याठिकाणी राष्ट्रवादीची ताकद मोठ्या प्रमाणावर पाहायला मिळाली आहे. पिंपरी चिंचवडमध्ये अनेक नगरसेवक राष्ट्रवादीसोबत आहेत. मी युतीचा धर्म पाळणारा कार्यकर्ता आहे. पक्ष जो काही निर्णय देईल तो मानणारा कार्यकर्ता आहे. जोपर्यंत आम्हाला आमची भूमिका मांडता येईल. आम्हाला ही जागा मिळावी यासाठी सातत्याने प्रयत्न करतोय,’ असं त्यांनी म्हटले.
तसेच, ‘मी 3 महिन्यापासून स्पष्टपणे मुख्यमंत्री एकनाथ शिंदे, उपमुख्यमंत्री देवेंद्र फडणवीस, आमचे नेते अजित पवार यांना मावळची जागा राष्ट्रवादीला आली पाहिजे ही मागणी करतोय. मावळची जागा मावळ तालुक्याला मिळावी. आजपर्यंतचा इतिहास पाहिला तर मावळला कधीही लोकसभेची संधी मिळाली नाही. त्यामुळे आम्हाला फक्त होय म्हणावं, आमचा उमेदवार तयार आहे. तो उमेदवार मावळ तालुक्यातून दीड लाख मतांची आघाडी घेऊन पुढे जाईल, अशा पद्धतीचा उमेदवार आमची तयारी केली आहे,’ असे सुनिल शेळके म्हणालेत.
अधिक वाचा –
– वेहेरगाव-दहिवली ग्रुप ग्रामपंचायतीच्या नवीन ग्रामपंचायत कार्यालयाचे आमदार सुनिल शेळकेंच्या हस्ते उद्घाटन । Maval News
– शिवे गावात महिलांना आर्थिक उन्नतीसाठी तीन दिवसीय मसाला बनवणे प्रशिक्षण शिबिर । Khed News
– ‘माझी शाळा, सुंदर शाळा’ उपक्रमाबद्दल मावळमधील कान्हे शाळेच्या 400 विद्यार्थ्यांचे मुख्यमंत्री एकनाथ शिंदेंना शुभेच्छापत्र