दिनांक 16 मार्च 2024 हा दिवस मावळ तालुक्यातील भाजपा कार्यकर्ता कधीही विसरणार नाही. लोकसभा निवडणूकांच्या काळातील हा दिवस मावळच्या राजकारणासाठी अत्यंत महत्वाचा होता. मावळ लोकसभा निवडणूकीत एनडीए घटकपक्षातील भाजपा पक्षाचाच उमेदवार असावा आणि मावळ तालुक्याला संधी द्यावी आणि ही संधी बाळाभाऊंच्या रुपाने मिळावी यासाठी मावळ तालुक्यातील तमाम भाजपा कार्यकर्ते माजी राज्यमंत्री बाळाभाऊ भेगडे यांच्या घरी गोळा झाले होते. अनेकांची भाषणे झाली, तीव्र विरोधाच्या भुमिका मांडल्या गेल्या तर काही कार्यकर्त्यांनी विद्यमानांच्या विरोधात थेट ‘नोटा’ची भाषा केली. एकंदरीत दिवस प्रचंड गाजला. पण त्यानंतर काय झाले, हे संपूर्ण तालुक्यानेच नव्हे तर राज्याने पाहिले. टोकाचा विरोध केल्यानंतरही पक्षाचा आदेश, युतीचा धर्म अशी कारणे देत भाजपा नेत्यांनी आपल्या तलवारी म्यान केल्या आणि श्रीरंग बारणे यांच्या प्रचारात स्वतःला दिलसे गुंतवून घेतले. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
त्यानंतर आता संपूर्ण राज्यात विधानसभेचे वारे वाहू लागले आहेत. मावळ विधानसभा हा तसा भाजपाचा बालेकिल्ला. तब्बल 25 वर्षे मावळ विधानसभेत फक्त भाजपाचे कमळ फुलत होते. हे कमळ खोडून काढण्याची किमया 2019 साली केली ती पूर्वाश्रमीचे भाजपाचे नेते आणि निवडणूकीवेळी राष्ट्रवादीमय झालेले सुनिल शेळके यांनी. राज्यमंत्री बाळा भेगडे यांचा जवळपास 90 हजारहून अधिकच्या मतांनी पराभव करत पहिल्यांदाच मावळात घड्याळाची टिकटिक आमदार शेळकेंनी वाजवली. परंतु बाळा भेगडे यांचा पराभव भाजपाच्या कार्यकर्त्यांना प्रचंड जिव्हारी लागला. त्यानंतरच्या काळात पक्षाला तालुक्यात रवींद्र भेगडे यांनी सावरून धरले आणि पाच वर्षे बाळा भेगडे, रवींद्र भेगडे आणि टीमने भाजपाचा दबदबा कायम ठेवला. याच जोषात लोकसभेला तिकीट मागण्याची हिंमत भाजपा कार्यकर्त्यांनी ठेवली होती. परंतू त्यांच्या अपेक्षांचा भंग झाला, काही प्रमाणात कार्यकर्ते आपल्या नेत्यांवरही नाराज झाले. पण लोकसभेची कसर विधानसभेत भरून काढू या इर्षेने भाजपा कार्यकर्ते पुन्हा कामाला लागले.
मात्र भाजपाच्या कार्यकर्त्यांना पुन्हा एकदा कन्फ्युज करणारी भुमिका तालुक्यातील वरिष्ठ नेत्यांनी घेतली आहे. लोकसभेप्रमाणेच तिकिट वाटपापूर्वी भाजपा पुन्हा एकदा जोषात विधानसभेसाठी स्वतःचे स्थान बळकट करत आहे, आणि निवडणूक लढवण्याची भाषा करत आहे. विद्यमानांना टोकाचा विरोध करत आहे. यासाठीच दोन दिवसांपूर्वी वडगाव येथे पत्रकार परिषद घेण्यात आली. ज्यात बाळा भेगडे, रवींद्र भेगडे, भाऊसाहेब गुंड आणि इतर सर्वच पक्षाचे प्रमुख पदाधिकारी उपस्थितीत होते. या पत्रकार परिषदेत ही विधानसभा लढवायचीच, कमळाच्या चिन्हावरच लढवायची, आर या पारची भाषा, विजयी संकल्प सभेची घोषणा हे सर्वकाही नेत्यांनी केले. पण… आणि पुन्हा कार्यकर्त्यांना संभ्रमात टाकणारा पण इथे आडवा आलाय.
एकीकडे बाळा भेगडे यांनी विधानसभेसाठी विजयी संकल्प सभेची घोषणा केली असता, दुसरीकडे वेळ आल्यावर पक्षाचा आदेश पाळणार. पक्षाचे निष्ठावंत कार्यकर्ता म्हणून वरिष्ठांचा आदेश पाळणार, युतीचा धर्म पाळणार या सर्व गोष्टींची जाहीर कबुली पत्रकार परिषदेत दिलीये. याचा अर्थ आता नेमका काय घ्यावा, याच कन्फ्युजनमध्ये सध्या भाजपा कार्यकर्ता आहे. दुसरीकडे रवींद्र भेगडे यांनी मात्र त्याच पत्रकार परिषदेत मावळात कमळाचाच उमेदवार असणार आणि भाजपा ही विधानसभा लढवणार हे जोषात जाहीर केले. तसेच त्यांनी स्वतःही विधानसभेसाठी कंबर कसली आहे. परंतू ही अशी कंबर बाळा भेगडे यांनी लोकसभेलाही कसली होती, त्यांचेही फ्लेक्स लागले होते. त्यामुळे आज जी नेत्यांची भुमिका आहे, ती नंतरही भुमिका तशीच असेल का, याबद्दल कार्यकर्ते जरा साशंक आहे. मात्र येत्या 2 ऑगस्ट रोजी होणाऱ्या विजयी संकल्प सभेला सर्व चित्र स्पष्ट होईल, असे भाजपाकडून सांगण्यात येत आहे. ( Maval Taluka BJP Vidhan Sabha Election Preparation Bala Bhegade Ravindra Bhegade )
अधिक वाचा –
– आमदार सुनिल शेळके यांनी घेतली ‘तालुकास्तरीय आढावा बैठक’, ग्रामस्थांनी वाचला तक्रारींचा पाढा
– दावे निकाली काढण्यात पुणे जिल्हा राज्यात प्रथम ; राष्ट्रीय लोक अदालतीत १ लाखाहून अधिक दावे निकाली । Pune News
– वराळे येथे कराटे बेल्ट परीक्षा संपन्न, तळेगावमधील अडीचशे मुलांचा सहभाग, यशस्वी विद्यार्थ्यांना प्रमाणपत्रे आणि बेल्ट प्रदान
