Dainik Maval News : पुणे जिल्हा दूध संघाचे (कात्रज) माजी चेअरमन व विद्यमान संचालक बाळासाहेब नेवाळे यांनी कार्यकर्त्यांसह अपक्ष उमेदवार बापूसाहेब भेगडे यांना पाठिंबा जाहीर केला आहे. तसेच सर्वपक्षीय अपक्ष उमेदवार बापूसाहेब भेगडे यांच्या पाठीशी खंबीरपणे उभे राहण्याचे आवाहनही नेवाळे यांनी मतदारांना केले आहे.
कामशेत येथील छत्रपती शिवाजी चौकात बाळासाहेब नेवाळे यांनी ‘लढा दडपशाही विरुद्ध’ या सभेचे आयोजन केले होते. सभेला माजी मंत्री मदन बाफना, ज्येष्ठ नेते बबनराव भेगडे, भाजपा नेते गणेश भेगडे, काँग्रेसचे नेते रामदास काकडे, माऊली शिंदे, राष्ट्रवादी काँग्रेस शरदचंद्र पवार पक्षाचे तालुकाध्यक्ष दत्तात्रय पडवळ यांच्यासह सर्वपक्षीय पदाधिकारी, कार्यकर्ते उपस्थित होते.
बाळासाहेब नेवाळे म्हणाले की, गुन्ह्यांशी संबंध नसताना मुद्दाम गोवले जाते, तेव्हा खूप त्रास होतो. माझ्यावर गुन्हे मुद्दामहून दाखल केले. पोलिसांनी योग्य निर्णय घेतला नाही तर 5 डिसेंबरला धरणे आंदोलन करणार आहे. यासह बापू भेगडे यांना पाठिंबा देतानाच त्यांनी आमदार शेळकेंना इशारा दिला, की राजकारण राजकारणाच्या ठिकाणी ठेवा, सुडबुद्धीने वागू नका, अन्यथा एक दिवस रसातळाला जाल.
नेवाळेंवर अन्याय झाला : रामदास काकडे
गुजरात हे आघाडीवर चाललेले राज्य आहे. वर्गिस कुरियन यांच्यामुळे दूध क्रांती झाली. त्यामुळे शेतकरी सुखी व समाधानी झाला. तेच काम गोकुळ, कात्रज दूध संघाने केले आहे. बाळासाहेब नेवाळे यांच्या नेतृत्वाखाली कात्रज डेअरी व शेतकऱ्यांना बोनस देण्याची सुरुवात केली. त्यांनी अभ्यासपूर्ण काम केले आहे. एवढं काम असूनही नेवाळे यांच्यावर अन्याय केला.
मावळात सहकार हरवलाय : माजी मंत्री मदन बाफना
मावळ तालुक्यात ज्या विविध कार्यकारी सोसायटीला स्वतःची इमारत आहे, अशी एकही सोसायटी मावळ तालुक्यात नाही. सहकार जगला तर राज्य जगेल, पण मावळात कुठे आहे सहकार ? गावकऱ्यांनी सोसायट्याकडे लक्ष दिले नाही, तर गावांचे वाटोळं होणार आहे.
मावळात विकास वेडा होऊन हरवलाय : गणेश भेगडे
राज्यात महायुती विरुद्ध महाविकास आघाडी अशा लढती आहेत. मात्र, मावळात सर्वपक्षीय विरुद्ध एक अशी लढत का आहे, याचा विचार समोरच्याने केला पाहिजे. तालुक्यात चाललेला कारभार पसंत नाही म्हणून आम्ही एक झालो आहोत. निवडणूक संपली की राजकारण संपले पाहिजे. सगळे माझे आहेत हे समजून कामाला लागले असते तर आज मावळची राजकीय स्थिती स्वच्छ असली असती.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– आमदार सुनिल शेळके यांनी आंबेडकरी जनतेला सर्वाधिक न्याय दिला – सूर्यकांत वाघमारे
– मावळ विधानसभा मतदारसंघात मतदार ओळख चिठ्ठी वितरणास सुरुवात । Maval Vidhan Sabha
– खून प्रकरणी तिघांना अटक ; मावळ तालुक्यातील नानोली येथील प्रकार । Maval Crime
