Dainik Maval News : मावळ तालुक्यातील सध्याचे राजकीय वातावरण पाहिल्यावर कुणालाही विधानसभा निवडणूक तोंडावर आल्याचे समजून जाईल. तसे पाहता विधानसभा निवडणूकांसाठी अद्याप अडीच ते तीन महिन्यांचा कालावधी बाकी आहे. मात्र मावळ तालुक्यात विधानसभा निवडणूकीची तयारी जोरात सुरू असल्याचे दिसत असून तालुक्यातील राजकीय तापमान देखील वाढू लागले आहे. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
थोडं इतिहासात डोकावू –
मावळ विधानसभा मतदारसंघ हा भाजपाचा बालेकिल्ला म्हणून ओळखला जातो. सलग 25 वर्षे मावळात भाजपाचा आमदार होता. 1996 ते 2019 अशी सलग 25 वर्षे मावळात एकहाती भाजपाची सत्ता होती. परंतु, 2019 साली भाजपातच बंडखोरी होऊन सुनिल शेळकेंनी राष्ट्रवादीच्या तिकीटावर निवडणूक लढवली. भाजपाने तिसऱ्यांना बाळा भेगडेंना उमेदवारी दिल्याने नाराज सुनिल शेळके यांनी राष्ट्रवादी काँग्रेस पक्षात प्रवेश केला, निवडणूक लढवली आणि राज्यमंत्री असलेल्या बाळा भेगडेंचा 90 हजारांहून अधिक मतांनी पराभव केला. तेव्हापासून मावळात राष्ट्रवादीचे प्रस्थ वाढू लागले. सद्यस्थिती मावळात भाजपापेक्षा राष्ट्रवादी वरचड असल्याचे दिसत आहे.
भाजपाची पत्रकार परिषद आणि राजकीय घडामोडींना वेग –
लोकसभा निवडणूकीत तिकीटासाठी डावलल्यानंतर मावळ तालुक्यात भाजपाने विधानसभेसाठी जोरदार कंबर कसली आहे. भाजपातून विधानसभेसाठी इच्छुकांची संख्या देखील अधिक असून अनेक मातब्बर उमेदवार आहेत. अशात 2019 चा पराभव पुसून काढणे आणि 2024 च्या लोकसभेची कसर भरून काढण्यासाठी मावळ भाजपाचे कार्यकर्ते तयारीत असून याच पार्श्वभूमीवर दोन दिवसांपूर्वी मावळ भाजपाने एक पत्रकार परिषद घेऊन आपले लक्ष्य जाहीर केले.
या पत्रकार परिषदेत मावळ विधानसभा मतदारसंघावर दावा करताना बाळा भेगडे यांनी, 1957 ते 2024 या काळात मावळ तालुक्यात जनसंघ, जनता पार्टी आणि भाजपा यांचा वरचष्मा असल्याचे सांगत संघटनेच्या बळावर लोकप्रतिनिधी निवडणूक देण्याची मावळ तालुक्याची एक आगळी-वेगळी ओळख असल्याचे सांगितले. त्यामुळे आमागी विधानसभा निवडणुकीतही परंपरागत आपला असणारा मतदारसंघ आपल्याला मिळावा, यासाठी आम्ही भाजप नेतृत्वाकडे आग्रहाची मागणी करणार आहोत, अशा शब्दांत भेगडे यांनी आगामी विधानसभा निवडणूकीत मावळची जागा भाजपा लढविणार असल्याचा निर्धार व्यक्त केला.
भाजपाची मागणी आणि आमदार सुनिल शेळकेंकडून युती धर्माची आठवण –
भाजपा हा राज्यात महायुतीतील घटकपक्ष आहे, यासोबत राष्ट्रवादी काँग्रेस हाही घटकपक्ष आहे. मावळ विधानसभेत महायुतीच्या घटकपक्षाचे विद्यमान आमदार आहेत, अर्थात राष्ट्रवादीचे आमदार सुनिल शेळके. दुसरीकडे भाजपाने मावळ विधानसभा निवडणूक लढवण्याची केलेली घोषणा म्हणजे आमदार सुनिल शेळके यांना आणि त्यांच्या उमेदवारीला दिलेले खुले आव्हान आहे. यासर्व गोष्टींबद्दल आमदार सुनिल शेळके यांनी देखील आपली भुमिका स्पष्ट केली असून त्यांनी थेट महायुती म्हणून काही गोष्टींचा जाहीर खुलासा केला आहे.
आमदार शेळकेंना सांगितला महायुतीचा बेसिक फॉर्म्युला –
आमदार सुनिल शेळके यांनी या प्रकरणी बोलताना, लोकशाहीमध्ये प्रत्येकाला उमेदवारी मागण्याचा अधिकार आहे. लोकसभेच्या निवडणुकीवेळी राष्ट्रवादीच्या कार्यकर्त्यांनी आणि पदाधिकाऱ्यांनी महायुतीच्या उमेदवाराच शंभर टक्के प्रामाणिक काम केले. त्याच्यावर कुणी शंका घेत असेल आणि आम्हाला जागा मिळावी म्हणून आग्रह करत असेल तर योग्य नाही. अशा शब्दांत नाराजी व्यक्त करत सुनिल शेळकेंनी महायुतीचा विधानसभेसाठीचा बेसिक फॉर्म्युला जाहीर केला. ‘ज्या पक्षाचा आमदार, त्याच पक्षाच्या वाट्याला ती विधानसभा’ असा महायुतीचा बेसिक फॉर्म्युला असून महायुतीत तसं ठरल्याचे शेळके यांनी सांगितले. आमदार सुनिल शेळके यांच्या या प्रतिक्रियेनंतर मावळ भाजपाची चांगलीच कोंडी झाली आहे.
मावळ विधानसभा ठरणार कळीचा मुद्दा –
राज्यात सध्या महायुतीचे सरकार आहे. एकनाथ शिंदे यांची शिवसेना, भारतीय जनता पार्टी आणि अजित पवार यांचा राष्ट्रवादी काँग्रेस पक्ष असे तीन पक्षांचे अर्थात महायुतीचे सरकार अस्तित्वात आहे. नुकत्याच झालेल्या लोकसभा निवडणूकीत महायुतीला मोठा फटका बसला, महाविकासआघाडीपुढे महायुती नापास झाल्याचे दिसले. तरीही आगामी विधानसभा महायुती म्हणून एकत्र लढण्याचे संकेत तिन्ही पक्षांच्या वरिष्ठांनी दिले आहेत. असे असताना मावळ विधानसभेतील राजकीय वादळ हे महायुतीत कळीचा मुद्दा ठरू शकते. मावळप्रमाणेच इतर अनेक विधानसभा क्षेत्रात अशीच परिस्थिती असून ही महायुती विधानसभेला नसेल, अशी चर्चा दबक्या आवाजात सुरू आहे. असे झाल्यास मावळचे चित्र काय असेल, हे वेगळे सांगायला नको.
अधिक वाचा –
– मावळ भाजपाचं नेमकं काय सुरूये ? एकाचवेळी ‘विजयी संकल्प’ आणि ‘त्याग’ समर्पणाची भुमिका, कार्यकर्ते देखील ‘कन्फ्यूज’
– आमदार सुनिल शेळके यांनी घेतली ‘तालुकास्तरीय आढावा बैठक’, ग्रामस्थांनी वाचला तक्रारींचा पाढा
– दावे निकाली काढण्यात पुणे जिल्हा राज्यात प्रथम ; राष्ट्रीय लोक अदालतीत १ लाखाहून अधिक दावे निकाली । Pune News
