मावळ तालुक्यातील आढले ( खुर्द ) इथे घरफोडीची मोठी घटना घडली आहे. घरी कुणीही नसल्याचा फायदा घेत अज्ञात चोरट्याने घराचे कुलूप तोडून घरात प्रवेश करत तब्बल 1 लाख 18 हजार 500 रुपयांचा मुद्देमाल लंपास केल्याची धक्कादायक घटना घडली आहे.
फिर्यादी मयुर मनोहर भोईर (वय 24 वर्षे, व्या. – नोकरी, रा. आढले (खुर्द), ता. मावळ, जि. पुणे) यांनी या प्रकरणी शिरगाव पोलिसांत फिर्याद दिली आहे. त्यानुसार शिरगाव पोलिस ठाण्यात अज्ञात चोरट्या विरोधात भारतीय दंड विधान कलम 457, 380 अन्वये गुन्हा दाखल करण्यात आला आहे. ( More Than 1 Lakh Burglary In Adhale Khurd Village Of Maval Taluka Case Registered Against Unknown Thief In Shirgaon Police Station )
दैनिक मावळचा व्हॉट्सअॅप ग्रुप जॉइन करण्यासाठी इथे क्लिक करा
पोलिसांनी दिलेल्या माहितीनुसार, दिनांक 26 फेब्रुवारी रोजी रात्री साडेआठ ते ते दिनांक 27 फेब्रुवारी 2023 रोजी सकाळी 7 वाजण्याच्या दरम्यान मौजे आढले (खुर्द) (तालुका मावळ, जिल्हा पुणे) इथे ही घटना घडली. फिर्यादी हे घराचे कुलुप लावुन चुलत्यांच्या घरी झोपण्यासाठी गेले होते. तसेच फिर्यादी यांचा चुलत भाऊ आणि त्याची पत्नी, मुलगी सासुरवाडी (बो-होडेवस्ती मोशी) इथे त्यांच्याही राहत्या घराला कुलुप लावुन गेले होते.
तेव्हा कुणीतरी अज्ञात चोरट्याने फिर्यादी आणि त्यांचा चुलत भाऊ यांच्या राहत्या घराचे कुलुप आणि कडी-कोयंडा तोडून घरात प्रवेश कला. घरातील 47,000 रुपये किंमतीचे 12 ग्रॅम वजनाचे सोने व वेगवेगळे दागिणे, 5,000 रुपये किंमतीचे 1.5 ग्रॅम चांदीचे वेगवेगळे दागिने, 65,000 रुपये रोख आणि 1,500 रुपये किंमतीचे घड्याळ असे एकुण 1,18,500 रुपये किमतीचे सोन्याचे व चांदीचे दागिने आणी इतर माल नमुद अज्ञात आरोपीने चोरी करून नेला, असे फिर्यादीत नमुद असून त्यानुसार दिनांक 27 फेब्रुवारी रोजी अज्ञात चोरट्याविरोधात गुन्हा दाखल करण्यात आला आहे. पोलिस उप निरिक्षक गावित हे या प्रकरणाचा पुढील तपास करत आहे.
अधिक वाचा –
– माळवाडीत पोलिसांसमोरच दोन गटांत तुंबळ हाणामारी, 5 जणांवर तळेगाव एमआयडीसी पोलिसांत गुन्हा
– घरातून निघून गेलेल्या तरुणाचा तळेगाव दाभाडे शहरातील तलावात मृतदेह आढळल्याने खळबळ