Dainik Maval News : ठोकळवाडी धरणातील ३ टीएमसी पाणी पिंपरी-चिंचवड शहराला देण्याच्या प्रस्तावाला विरोध करण्यासाठी आंदर मावळातील धरणग्रस्त कृती समितीने आता संघटित लढ्याची तयारी सुरू केली आहे. या पार्श्वभूमीवर धरणग्रस्त कृती समितीचे अध्यक्ष, उपाध्यक्ष, सचिव आणि सदस्य यांची महत्त्वपूर्ण बैठक पार पडली. या बैठकीत पाणी प्रश्नासह धरणग्रस्तांच्या हक्कांसाठी व्यापक जनआंदोलन उभारण्याबाबत सविस्तर चर्चा करून विविध महत्त्वपूर्ण निर्णय घेण्यात आले.
ठोकळवाडी धरणातील पाणी पिंपरी-चिंचवड शहराला देण्यास विरोध करण्यासाठी आवश्यक कागदपत्रांची जुळवाजुळव करण्याचा निर्णय बैठकीत घेण्यात आला. विशेषतः १८८८ पासून ते २०२६ पर्यंत टाटा कंपनीसोबत झालेले करार, त्यातील अटी व शर्ती तसेच पाण्याच्या वापरासंदर्भातील ऐतिहासिक नोंदींची माहिती संकलित करण्यात येणार आहे. या कागदपत्रांच्या आधारे धरणग्रस्तांच्या हक्काची बाजू सक्षमपणे शासन आणि प्रशासनासमोर मांडली जाणार आहे.
या प्रश्नासंदर्भात वडगाव मावळ येथील तहसीलदारांना निवेदन देण्यात येणार असून, शासन आणि प्रशासनाच्या संबंधित अधिकाऱ्यांसोबत संयुक्त बैठक आयोजित करण्याची मागणीही करण्यात येणार आहे. त्यामुळे पाणीवाटपाच्या प्रश्नावर अधिकृत भूमिका स्पष्ट होण्यास मदत होणार आहे.
दरम्यान, या लढ्याला गावपातळीवर व्यापक जनसमर्थन मिळावे, यासाठी अंदर मावळातील प्रत्येक गावात तसेच वाड्या-वस्त्यांवर घोंगडी बैठका आयोजित करण्याचे नियोजन करण्यात आले आहे. प्रत्येक गावातील धरणग्रस्त शेतकऱ्याने कृती समितीचा सदस्य बनावे, यासाठी शेतकऱ्यांना विश्वासात घेऊन त्यांच्या हक्कांची जाणीव करून दिली जाणार आहे. आपल्या हक्काच्या पाण्यासाठीची लढाई ही आपल्यालाच एकजुटीने लढावी लागेल, असा संदेश या माध्यमातून दिला जाणार आहे.
धरणग्रस्त कृती समिती आगामी काळात धरणग्रस्तांच्या सर्व प्रलंबित मागण्यांसाठी आवाज उठवणार असली, तरी सध्या समितीची प्रथम आणि प्रमुख मागणी ठोकळवाडी धरणातील हक्काचे पाणी पिंपरी-चिंचवड शहराला देऊ नये, हीच राहणार असल्याचे बैठकीत स्पष्ट करण्यात आले.
एकजुटीतूनच हक्काच्या पाण्याचे संरक्षण!
आंदर मावळातील सर्व नागरिक, धरणग्रस्त शेतकरी आणि ग्रामस्थांनी पक्षीय मतभेद बाजूला ठेवून या लढ्यात एकत्र सहभागी व्हावे, असे आवाहन धरणग्रस्त कृती समितीच्या वतीने करण्यात येणार आहे. आपल्या पुढील पिढ्यांच्या पाण्याच्या हक्काचे संरक्षण करण्यासाठी सर्वांनी एकजुटीने पुढे येणे गरजेचे आहे. संघटित शक्तीच्या बळावरच हा लढा यशस्वी होऊ शकतो, असा निर्धार या बैठकीत व्यक्त करण्यात आला.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा
– मावळातील ऊसतोड मजुरांच्या पालावर मंत्री पंकजा मुंडेंची मायेची भेट ; दुष्काळामुळे स्थलांतरित ऊसतोड मजूरांसमवेत दिवाळी साजरी
– पाचाणे येथे शेतकऱ्यांना मका बियाण्यांचे वाटप ; शेतीपूरक व्यवसायाला चालना देण्याचा प्रयत्न
– श्री तीर्थक्षेत्र आई एकविरा देवी येथील मंदिर जतन, संवर्धन व परिसरातील विकासकामे मार्च २०२७ पर्यंत पूर्ण करण्याचे निर्देश


