Dainik Maval News : लोणावळा शहरामध्ये शनिवारी (दि.९) पोलीस प्रशासनाकडून सर्व परवानगी घेऊन माझी जनसंवाद यात्रा सुरू होती. भांगरवाडी या ठिकाणी असलेल्या प्रभू श्रीरामांच्या मंदिरामध्ये मी दर्शनासाठी गेलो म्हणून माझ्यावर विरोधकांनी गुन्हा दाखल केला गेला, अशी प्रतिक्रिया आमदार सुनील शेळके यांनी दिली आहे. भांगरवाडी राम मंदिरात आमदार सुनील शेळके आणि अपक्ष उमेदवार बापूसाहेब भेगडे यांच्या कार्यकर्त्यांच्या दरम्यान झालेल्या वादानंतर आमदार शेळके यांच्यासह त्यांच्या कार्यकर्त्यांवर गुन्हे दाखल करण्यात आले. यावर प्रतिक्रिया देताना ते बोलत होते.
आमची प्रचार रॅली भांगरवाडी याठिकाणी पोचली असता, विरोधक हे जाणीवपूर्वक त्या ठिकाणी थांबून राहिले. चार वाजता माझी जनसंवाद यात्रा भांगरवाडी या ठिकाणी आली. मंदिराच्या बाहेर विरोधी पक्षाचे काही लोक थांबलेले होते. म्हणून आम्ही मार्ग बदलून दुसऱ्या मार्गाने गेलो, जवळपास दीड तास तिथे थांबलो तरी सुद्धा हे लोक मंदिरापासून जायला तयार नव्हते. जाण्यासाठी दुसरा मार्ग नसल्याने आम्हाला त्याच मार्गाने यावे लागले.
जन संवाद यात्रेत आम्ही सर्व देवदेवतांचे मंदिरात जाऊन दर्शन घेत होतो. भांगरवाडी येथे आल्यानंतर आम्ही प्रभु श्रीरामाचे दर्शन घेण्यासाठी मंदिरात गेलो व दर्शन घेऊन बाहेर आलो. त्यानंतर विरोधी गटांनी स्टंटबाजी करत माझ्या विरोधात ठिय्या आंदोलन करत, मंदिरात का आले असे म्हणत आचारसंहिता भंगाचा गुन्हा दाखल केला आहे. आता प्रभू श्रीरामाचे दर्शन घेण्यासाठी गुन्हा दखल होणार असेल तर होऊ द्या. असे किती गुन्हे ते माझ्यावर दाखल करणार माहित नाही. मात्र मावळ तालुक्यामध्ये सर्वत्र विरोधकांकडून रडीचा डाव सुरू असल्याचा हल्लाबोल आमदार सुनील शेळके यांनी विरोधकांवर केला आहे.
आमदार शेळके म्हणाले, संपूर्ण मावळ तालुक्यामध्ये व लोणावळा शहरामध्ये जनसंवाद यात्रेला प्रत्येक विभागांमध्ये व गावांमध्ये मिळत असलेल्या प्रतिसाद पाहून विरोधकांच्या पायाखालची वाळू सरकू लागली आहे याकरिता खोटे-नाटे आरोप करणे, गुन्हे दाखल करणे असे प्रकार विरोधकांकडून सुरू आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– दुकाने, मॉल आणि महिला बचत गट येथील कामगार वर्गात मतदान करण्याविषयी जनजागृती
– सोमाटणे गावच्या हद्दीत खासगी बसमधून सात लाखांचा ऐवज चोरीला । Maval Crime
– मावळ विधानसभा मतदारसंघातील मतदान प्रक्रियेबाबत महत्वाची माहिती । Maval Vidhan Sabha
