Dainik Maval News : गुढीपाडवा मेळाव्यात जाहीर केल्याप्रमाणे राज ठाकरे यांनी संघटनात्मक नियुक्त्यांमध्ये अनेक मोठे बदल करायला सुरूवात केली आहे. राज्यस्तरीय, विभागस्तरीय पदाधिकारी निवडीनंतर आता तालुका पातळीवर संघटनात्मक जबाबदाऱ्या नव्या कार्यकर्त्यांच्या खांद्यावर द्यायला पक्षाने सुरूवात केली आहे. त्यानुसार मावळ तालुक्यातही पक्षाच्या तालुकाध्यक्षपदी नवीन निवड करण्यात आली असून अशोक वसंत कुटे यांच्या खाद्यावर तालुक्याच्या नेतृत्वाची धूरा देण्यात आली आहे.
वेहेरगाव येथील अशोक वसंत कुटे यांची महाराष्ट्र नवनिर्माण सेनेच्या मावळ तालुका अध्यक्षपदी नियुक्ती जाहीर करण्यात आली आहे. स्वतः महाराष्ट्र नवनिर्माण सेना पक्षाचे अध्यक्ष राज ठाकरे यांच्या हस्ते अशोक कुटे यांना नियुक्तीपत्र देण्यात आले आहे. कुटे यांच्या नियुक्तीनंतर त्यांच्या नेतृत्वात मावळ तालुक्यात मनसे नव्याने उभारी घेईल असे बोलले जात आहे.
- अशोक कुटे हे मनसेच्या स्थापनेपासून राज ठाकरेंच्या समवेत काम करीत आहेत. मागील दहा वर्षापासून त्यांनी महाराष्ट्र नवनिर्माण सेना विद्यार्थी आघाडीचे मावळ तालुका अध्यक्षपद सांभाळले आहे. मावळ तालुक्यातील विविध सामाजिक विषयांवर त्यांनी खास मनसे पद्धतीने आंदोलने केली आहेत व त्या आंदोलनांना अपेक्षित यश देखील प्राप्त झाले आहे.
नुकतेच मराठी भाषा व मराठी पाट्या या विषयावर त्यांनी आंदोलन केले होते. बँक ऑफ महाराष्ट्र यामध्ये असणारे अधिकारी व कर्मचारी हे ग्राहकांची मराठी भाषेमध्ये बोलत नसल्याने त्यांनी बँकेचे अधिकारी यांची मनसैनिकांसह भेट घेत कान उघडणी केली होती, ह्या प्रकरणाची चर्चा संपूर्ण राज्यभर झाली होती. तसेच मुंबई-पुणे राष्ट्रीय महामार्गावर असलेल्या वरसोली टोल नाक्यावर दोन्ही बाजूला स्थानिकांसाठी एक लेन सतत सुरू ठेवावी, याबाबतही त्यांनी आवाज उठविला होता.
अशोक कुटे यांच्या या कामाची दखल घेत त्यांची महाराष्ट्र नवनिर्माण सेनेचे अध्यक्ष तथा सर्वेसर्वा राज ठाकरे यांनी मावळ तालुका अध्यक्ष या पदावर त्यांची नियुक्ती केली आहे. या पुढील काळातही पक्षाची ध्येयधोरणे विचार, मावळ तालुक्याच्या कानाकोपऱ्यातील सर्वसामान्य नागरिकांपर्यंत पोहोचवत त्यांना न्याय मिळवून देण्याची भूमिका निवडीनंतर बोलताना कुटे यांनी मांडली.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– ‘पवना कृषक’वर भाजपाची सत्ता ! सर्वपक्षीय नेत्यांच्या राजकारणाला अपयश, सिनेमाला लाजवेल अशा घडामोडी, वाचा सविस्तर
– दिव्यांग नागरिकांना हक्काचा निवारा मिळावा यासाठी राज्य शासन स्वतंत्र घरकुल योजना तयार करणार
– पवना नदी परिसरातील बेकायदेशीर बांधकामावर अतिक्रमणविरोधी कारवाईचा हातोडा ! Pavana Dam Updates
