Dainik Maval News : सोमवारी (दि. ६ ऑक्टोबर ) मंत्रालय, मुंबईत नगर परिषद व नगर पंचायतींच्या नगराध्यक्षपदाचे आरक्षण सोडत जाहीर झाल्यानंतर खऱ्या अर्थाने निवडणुकीच्या रणधुमाळीला सुरूवात झाली असे म्हणावे लागेल. राज्यातील २४७ नगरपरिषदा आणि १४७ नगरपंचायतींच्या नगराध्यक्षपदाचे आरक्षण जाहीर झाले. यात लोणावळा नगर परिषद ( ता. मावळ ) चे ही आरक्षण जाहीर झाले.
अंतिम प्रभाग रचना जाहीर :
लोणावळा नगर परिषदेची अंतिम प्रभागरचना 30 सप्टेंबर रोजी प्रसिद्ध करण्यात आली आहे. पूर्वी प्रसिद्ध केलेल्या प्रभाग रचनेवर अनेक सूचना व हरकती आल्या होत्या. मात्र, किरकोळ दुरुस्ती वगळता प्रभाग जैसे थे ठेवण्यात आले आहेत. शहरामध्ये 13 प्रभाग असून 27 सदस्य संख्या आहे. 12 प्रभाग अनुक्रमे 2 सदस्य व 13 व्या प्रभागात 3 सदस्य असा क्रम असणार आहे. अंतिम प्रभागरचना व नकाशे प्रसिद्ध करण्यात आल्यामुळे त्या-त्या प्रभागामधून निवडणूक लढण्यासाठी इच्छुक असणारे उमेदवार यांना प्रभाग रचना व त्यांची हद्द, त्यामधील मतदार यांच्या गाठीभेटी घेणे व त्यांच्याशी संपर्क करणे सोयीस्कर होणार आहे.
नगराध्यक्षपदाचे आरक्षण जाहीर :
सोमवारी ( दि. ७ ) जाहीर करण्यात आलेल्या सोडतीनुसार लोणावळा नगर परिषदेचे नगराध्यक्ष पद अनुसुचित जाती अर्थात एससी प्रवर्गासाठी आरक्षित करण्यात आले आहे. याठिकाणी एससी प्रवर्गातील नागरिक ( महिला किंवा पुरुष ) नगराध्यक्षपदी विराजमान होणार आहे.
प्रभाग आरक्षण सोडत
बुधवारी ( दि. ८ ) लोणावळा नगरपरिषद सार्वत्रिक निवडणुकीसाठी प्रभाग आरक्षण सोडत जाहीर करण्यात येणार आहे.
मतदार यादी कार्यक्रम जाहीर :
मतदार याद्यांचा कार्यक्रम जाहीर करण्यात आला असून आठ ऑक्टोबरपर्यंत प्रभाग तयार करण्यात येणार आहेत. 8 ते 13 ऑक्टोबरदरम्यान त्यावर सूचना व हरकती घेऊन 28 ऑक्टोबर रोजी अंतिम मतदार यादी प्रसिद्ध केली जाणार आहे. मतदान केंद्रांची यादी 7 नोव्हेंबर रोजी प्रसिद्ध केलीजाणार आहे.
मागील चार वर्षांपासून लोणावळा नगर परिषदेची सार्वत्रिक निवडणूक रखडली आहे. न्यायालयाच्या आदेशामुळे महाराष्ट्रातील निवडणुका जानेवारी 2026 पूर्वी होणार आहेत. त्यामुळे लोणावळा नगर परिषदेची निवडणूकदेखील पुढील दोन-तीन महिन्यांमध्ये होण्याची दाट शक्यता निर्माण झाली आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– कोण होणार तुमच्या शहराचा नगराध्यक्ष? राज्यातील २४७ नगरपरिषदा आणि १४७ नगरपंचायतींच्या नगराध्यक्षपदांची आरक्षण सोडत जाहीर – पाहा संपूर्ण यादी
– पुणे जिल्हा परिषद आणि 13 पंचायत समित्यांच्या निवडणुकीसाठी गट व गणनिहाय प्रारूप मतदार यादी बुधवारी प्रसिद्ध होणार
– लोणावळा, तळेगाव दाभाडे नगरपरिषद आणि वडगाव मावळ, देहू नगरपंचायत नगराध्यक्षपदाचे आरक्षण जाहीर – पाहा एका क्लिकवर
