Dainik Maval News : हुंड्यासाठी सतत छळ करत अखेर पत्नीचा खून केल्याप्रकरणी आरोपी पतीला वडगाव मावळ जिल्हा सत्र न्यायालयाने जन्मठेपेची शिक्षा सुनावली. अतिरिक्त सत्र न्यायाधीश डी. के. अनभुले यांनी हा निर्णय देताना आरोपी सियाराम पंचम विश्वकर्मा याला १८ हजार रुपयांचा दंडही ठोठावला. या खटल्यात पीडित आरती विश्वकर्मा हिने मृत्यूशय्येवर दिलेला जबाब अत्यंत महत्त्वाचा पुरावा ठरला. तसेच, पुरेशा पुराव्याअभावी सहा जणांना न्यायालयाने निर्दोष मुक्त केले.
आरती आणि सियाराम यांचा विवाह २ मे २००८ रोजी झाला होता. कुटुंबाची आर्थिक परिस्थिती हलाखीची असल्याने आरतीच्या भावाने विवाहाच्या वेळी हुंड्यापोटी ठरलेल्या पाच लाख रुपयांपैकी सुरुवातीला केवळ एक लाख रुपये दिले होते. त्यानंतर उर्वरित रक्कम देणे शक्य नसल्याने सासरी तिच्यावर मानसिक व शारीरिक छळ सुरू झाला. शिवीगाळ, मारहाण असे प्रकार वारंवार होऊ लागले. त्रास असह्य झाल्याने आरती काही काळ माहेरी राहिली. मध्यस्थीनंतर ती पुन्हा सासरी गेली; मात्र अत्याचार सुरूच राहिले.
छळाची परिसीमा ओलांडत आरोपीने आरतीच्या अंगावर रॉकेल ओतून तिला पेटवण्याचा प्रयत्न केल्याचे न्यायालयात स्पष्ट झाले. लाथाबुक्क्यांनी झालेल्या बेदम मारहाणीमुळे ती गंभीर जखमी झाली आणि तिला रुग्णालयात दाखल करण्यात आले. तेथेच तिने पोलिसांसमोर दिलेला जबाब तिच्या मृत्यूनंतर या खटल्यातील मुख्य पुरावा ठरला.
आरतीचा उपचारादरम्यान मृत्यू झाला असून, देहूरोड पोलीस ठाण्यात पती आणि कुटुंबीयांवर गुन्हा दाखल करण्यात आला होता. सुनावणीदरम्यान सादर केलेल्या साक्षी आणि पुरावे तपासल्यानंतर न्यायालयाने पती सियाराम विश्वकर्मा याला दोषी धरत जन्मठेपेची शिक्षा सुनावली.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा –
– मोठी बातमी ! महाराष्ट्रातील स्थानिक स्वराज्य संस्थांच्या निवडणुका ठरलेल्या वेळेत होणार ; सुप्रीम कोर्टाचा महत्वपूर्ण निकाल
– मोठी बातमी ! घरफोडीतील आरोपींचा पोलिसांवर गोळीबार ; सोमाटणे फाटा येथे पाठलाग सुरू असतानाचा थरार, आरोपी जेरबंद
– Lonavala Election : राष्ट्रवादी काँग्रेस पार्टीने लोणावळ्यात घेतलेल्या ‘त्या’ एका निर्णयाचे राज्यभर होतंय कौतुक, विरोधकांनीही मानलं…
