Dainik Maval News : मावळच्या माजी व पहिल्या महिला आमदार स्व. रुपलेखा खंडेराव ढोरे यांचे बुधवारी (दि. २९) निधन झाले व बुधवारी सायंकाळीच वडगाव मावळ येथील वैकुंठ स्मशानभूमीत त्यांच्यावर अंतिनसंस्कार देखील करण्यात आले. यावेळी विविध क्षेत्रातील मान्यवर आणि हजारो मावळकर उपस्थित होते. बुधवारी दुपारी बाराच्या सुमारास हृदयविकाराच्या झटक्याने रुपलेखा ढोरे यांचे निधन झाले होते, त्या ७५ वर्षांच्या होत्या. पुणे शहराचे प्रथम महापौर बाबुराव सणस यांची कन्या ते मावळची ‘भाग्यरेखा’ असा दैदिप्यमान आणि आदर्शवत राजकीय जीवप्रवास रुपलेखा ढोरे यांचा होता.
रुपलेखा ढोरे यांच्या पश्चात दोन मुले, दोन मुली, सुना, पुतणे, नातवंडे असा मोठा परिवार आहे. भारतीय जनता किसान मोर्चा पुणे जिल्हा अध्यक्ष मनोज (भाऊ) ढोरे व उद्योजक सचिन (बाळा) ढोरे यांच्या त्या मातोश्री होत. तर, मावळ पंचायत समितीचे दिवंगत माजी सभापती खंडेराव उर्फ दादासाहेब ढोरे यांच्या त्या पत्नी, तर पुणे शहराचे प्रथम महापौर बाबुराव सणस यांच्या त्या कन्या होत्या.
मावळ पंचायत समितीच्या उपसभापती –
रुपलेखा ढोरे यांनी १९९२ साली तत्कालीन वडगाव-इंदोरी जिल्हा परिषद मतदारसंघातून विजय मिळविला होता. त्याच काळात पंचायत समितीमध्ये काँग्रेस व भाजपाचे समसमान बलाबल झाल्याने चिठ्ठ्या टाकून उपसभापतिपदाची निवडणूक झाली होती. या निवडणुकीत त्या विजयी ठरल्या आणि तीन वर्षे उपसभापती म्हणून कार्यभार सांभाळला.
नूतन विद्या प्रसारक मंडळाच्या उपाध्यक्ष
राजकारणासह सामाजिक शिक्षण क्षेत्रातही रुपलेखा ढोरे यांनी आपला ठसा उमटविला होता. तळेगाव दाभाडे येथील नूतन महाराष्ट्र विद्या प्रसारक मंडळाच्या उपाध्यक्ष, तसेच रयत शिक्षण संस्थेच्या वडगाव येथील न्यू इंग्लिश स्कूल व ज्युनियर कॉलेजच्या स्कूल कमिटीच्या चेअरमन म्हणूनही त्यांनी जबाबदारी पार पाडली. नंतर त्या नूतन महाराष्ट्र विद्या प्रसारक मंडळाच्या सल्लागार मंडळावर कार्यरत होत्या.
मावळच्या पहिल्या महिला आमदार –
मावळ विधानसभा मतदारसंघातून भाजपाच्या प्रथम महिला उमेदवार म्हणून त्यांनी सन १९९५ ची विधानसभा निवडणूक लढवली होती. तत्कालीन राज्यमंत्री मदन बाफना यांचा पराभव करत त्या मावळच्या पहिल्या महिला आमदार म्हणून निवडून आल्या होत्या. त्यावेळी राज्यात भाजपा-शिवसेना युतीचे सरकार सत्तेत आले होते, त्यावेळी मुख्यमंत्री मनोहर जोशी आणि उपमुख्यमंत्री गोपीनाथ मुंडे यांच्या समवेत काम करण्याची संधी त्यांना मिळाली होती.
१९९५ च्या विधानसभा निवडणुकीत भाजपकडून उमेदवारी मिळाल्यानंतर त्या आमदार झाल्या. त्यांच्या कार्यकाळात महाराष्ट्र जीवन प्राधिकरणाच्या माध्यमातून तालुक्यात ५५ नळ पाणीपुरवठा योजना राबविण्यात आल्या. मावळ तालुका टँकरमुक्त करण्याचा प्रयत्न केला. तसेच मंगरूळ येथील आंद्रा धरणाच्या कामालाही त्यांच्या कार्यकाळात सुरुवात झाली. मावळच्या विकासात त्यांचे भरीव योगदान कायम स्मरणात राहील.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– महाराष्ट्राच्या राजकारणाला असलेला शाप ! दादा – आबा – साहेब … अनेक दिग्गजांनी घेतलीये अकाली एक्झिट
– मावळची विकासरेखा हरवली ! मावळ विधानसभेच्या माजी आमदार रुपलेखा ढोरे यांचे अल्प आजाराने निधन
– महाराष्ट्राचे लाडके ‘दादा’ पंचतत्वात विलीन.. लाखो चाहते कार्यकर्त्यांकडून अजित पवार यांना साश्रूनयनांनी अखरेचा निरोप
– Photo : अजित दादा पवार यांचे कधीही न पाहिलेले दुर्मिळ फोटो
