Dainik Maval News : मावळ तालुक्यातील कान्हे येथे अत्यंत दुर्मिळ मानला जाणारा बिनविषारी इंडियन स्मूथ स्नेक (गजरा साप) आढळून आल्याने वन्यजीव अभ्यासक आणि निसर्गप्रेमींमध्ये आनंदाचे वातावरण आहे. या दुर्मिळ सापाच्या नोंदीमुळे मावळ परिसरातील समृद्ध जैवविविधतेवर पुन्हा एकदा शिक्कामोर्तब झाले आहे.
कान्हे येथील रहिवासी विक्रम सातकर यांच्या घराशेजारी साप असल्याची माहिती मिळताच वन्यजीव रक्षक मावळ संस्थेचे उपाध्यक्ष प्रमोद ओव्हाळ व सामाजिक कार्यकर्ते शशांक सातकर यांनी तातडीने घटनास्थळी धाव घेतली. घरालगत मोकळे रान आणि नदीचा परिसर असल्यामुळे सुरुवातीला तो नाग, घोणस किंवा धामण असावा असा अंदाज व्यक्त करण्यात आला होता. मात्र, बारकाईने पाहणी केल्यानंतर तो अत्यंत दुर्मिळ इंडियन स्मूथ स्नेक (Wallophis brachyura) असल्याचे स्पष्ट झाले.
सदर सापाचे सुरक्षितरीत्या रेस्क्यू करण्यात आले. त्यानंतर वन्यजीव रक्षक मावळ संस्थेचे संस्थापक निलेश गराडे आणि वन्यजीव संशोधक रौनक खरे यांच्या उपस्थितीत त्याला योग्य नैसर्गिक अधिवासात सुखरूप मुक्त करण्यात आले.
हा साप नुकताच अंड्यातून बाहेर आलेला असून त्याची लांबी सुमारे २४ सेंटीमीटर असल्याचे निरीक्षण करण्यात आले. यावरून संबंधित परिसरात या दुर्मिळ प्रजातीचे प्रजनन होत असल्याची शक्यता व्यक्त करण्यात येत आहे.
वन्यजीव संशोधक जिगर सोलंकी यांनी सांगितले की, “इंडियन स्मूथ स्नेक हा भारतातील काही विशिष्ट भागातच आढळणारा अत्यंत लाजाळू, शांत आणि पूर्णपणे बिनविषारी साप आहे. शरीरावरील गुळगुळीत खवल्यांमुळे त्याला ‘स्मूथ स्नेक’ असे म्हटले जाते. हा साप मानवी वस्त्यांमध्ये क्वचितच दिसतो. त्यामुळे त्याची नोंद होणे ही वन्यजीव संवर्धनाच्या दृष्टीने अत्यंत महत्त्वाची बाब आहे. कान्हे परिसरात या सापाचे अस्तित्व आढळणे म्हणजे वाढत्या शहरीकरणानंतरही मावळची जैवविविधता समृद्ध असल्याचा पुरावा आहे. या दुर्मिळ प्रजातींचे अस्तित्व टिकवण्यासाठी त्यांच्या नैसर्गिक अधिवासाचे संवर्धन करणे ही काळाची गरज आहे.”
वन्यजीव तज्ज्ञांनी नागरिकांना आवाहन केले आहे की, परिसरात साप आढळल्यास घाबरून त्यांना इजा करू नये. तत्काळ वन विभाग किंवा प्रशिक्षित सर्पमित्रांशी संपर्क साधून सुरक्षितरीत्या त्यांचे रेस्क्यू करण्यास सहकार्य करावे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– अस्मानीनंतर सुलतानी फेरा… पाटण गाव रिकामं होताच चोरांनी १६ घरं फोडली; सोन्या-चांदीसह रोकड लंपास
– पाटण दरड दुर्घटना, लोणावळा शहरातील पूर यांसह मावळातील नुकसानग्रस्तांना मदत करा – आमदार सुनील शेळके
– डोंगर उशाला अन् धोका जीवाला! मावळ तालुक्यातील दरडप्रवण गावांत तातडीने उपाययोजना करणे आवश्यक
