Dainik Maval News : लोणावळा शहर पोलिसांनी तांत्रिक तपास, सीसीटीव्ही फुटेज आणि डिजिटल व्यवहारांच्या आधारे चोरीचा गुन्हा उघडकीस आणत २ लाख २९ हजार रुपयांचा चोरीचा मुद्देमाल जप्त केला आहे. याप्रकरणी हरिदास बाबू कोळेकर (रा. मानपाडा, कल्याण, मुंबई) याला अटक करण्यात आली असून, त्याच्याकडून चोरीतील मौल्यवान वस्तूंसह गुन्ह्यात वापरण्यात आलेली दुचाकीही जप्त करण्यात आली आहे.
लोणावळा शहर पोलीस ठाण्यात भारतीय न्याय संहिता कलम ३०३(२) अन्वये २५ जुलै २०२६ रोजी चोरीचा गुन्हा दाखल करण्यात आला होता. गुन्ह्याचा समांतर तपास सुरू असताना पोलिसांनी सीसीटीव्ही फुटेज, तांत्रिक विश्लेषण, मोबाईल लोकेशन तसेच Google Pay व्यवहारांची सखोल पडताळणी केली. याच तपासातून आरोपीपर्यंत पोहोचण्यात पोलिसांना यश आले.
तपासादरम्यान आरोपी हरिदास बाबू कोळेकर हा कल्याणमधील मानपाडा परिसरात असल्याची माहिती मिळाली. त्यानुसार पुणे ग्रामीण पोलिस अधीक्षकांच्या मार्गदर्शनाखाली लोणावळा शहर पोलीस ठाण्याच्या पथकाने मानपाडा येथे सापळा रचून आरोपीला ताब्यात घेतले.
आरोपीची चौकशी केली असता त्याने चोरीची कबुली दिली. त्यानंतर त्याच्याकडून एचपी कंपनीचा लॅपटॉप, दोन अॅपल मोबाईल फोन, अॅपल स्मार्ट वॉच, अॅपल एअरपॉड्स, रोख रक्कम तसेच गुन्ह्यात वापरण्यात आलेली होंडा शाइन दुचाकी (एमएच-०३-एफजी-३३४९) असा एकूण २ लाख २९ हजार रुपयांचा मुद्देमाल जप्त करण्यात आला. आरोपीला न्यायालयात हजर करण्यात आले असून, न्यायालयाच्या आदेशानुसार पुढील तपास सुरू असल्याची माहिती पोलिसांनी दिली.
ही कारवाई पुणे ग्रामीणचे पोलीस अधीक्षक संदीप सिंह गिल, अपर पोलीस अधीक्षक रमेश चोपडे, उपविभागीय पोलीस अधिकारी राजन गवस यांच्या मार्गदर्शनाखाली करण्यात आली. पोलीस निरीक्षक किशोर धुमाळ यांच्या नेतृत्वाखाली पोलीस उपनिरीक्षक देवरे, पोलीस हवालदार संदीप पाडळे, पोलीस शिपाई गणेश कोद्रे आणि हेमांग अय्यर कोकाटे यांनी तपासात महत्त्वाची भूमिका बजावली.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– पुणे जिल्ह्यात सरासरीच्या १७९.९ टक्के पाऊस ; मावळ तालुक्यात सर्वाधिक १६८० मिलिमीटर पावसाची नोंद
– उपमुख्यमंत्री सुनेत्रा पवार यांच्या हस्ते सहाय्यक कृषी अधिकाऱ्यांना लॅपटॉपचे वाटप; मावळमधील ४५ अधिकाऱ्यांना लॅपटॉप
– ‘गेले ते दिवस, राहिल्या फक्त आठवणी’ … मावळ तालुक्यात भातशेतीचं स्वरुप प्रचंड बदललं
