Happy Mother’s Day 2024 : स्वामी तिन्ही जगाचा आईविना भिकारी । आई – माता – माऊली हिची महती आणि थोरपणा काय आहे, तो या एका ओळीतून समजून जातो. या विश्वाचे दर्शन घडवणारी आणि आपलं पालण पोषण करून स्वतःच्या पायावर उभं करणारी माता, हिचा गौरव हा दररोज झाला पाहिजे, यात काही शंका नाही. छत्रपती शिवरायांनी तर आई म्हणजे देवघरातील देवता, अशीच शिकवण आपल्याला दिली आहे. तरीही 21व्या शतकात मातेचा गौरव आणि तिच्या समर्पणाचे आभार मानण्यासाठी वर्षातील एक दिवस निश्चित केला आहे, तो म्हणजेच मदर्स डे अर्थात मातृदिन. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
जगभरातील मातांचे योगदान आणि समर्पणाबद्दल आभार मानण्यासाठी दरवर्षी मे महिन्याच्या दुसऱ्या रविवारी मदर्स डे साजरा केला जातो. यंदा हा दिवस 12 मे रोजी साजरा केला जात आहे. या दिवसाच्या निमित्ताने आईला वंदन करणे, तिचे आभार मानने, तिला भेटवस्तू देणे असं काही केलं जातं. पण ह्या दिवसाची सुरुवात नक्की कशी झाली? हे तुम्हाला माहिती आहे का? नसेल माहिती तर काळजी करू नका., दैनिक मावळचा आजचा हा खास लेख फक्त मातृदिन समजून घेण्यासाठीच आहे… ( History of celebrating Mother’s Day )
अशी झाली मदर्स डे साजरा करण्याची सुरुवात –
मातृ दिवस साजरा करण्याची सुरुवात ॲना रीव्हज जार्विस यांनी केली होती. यामागची कथा अशी की, या दिवसाद्वारे अॅनाला तिची आई ॲना रीव्हस जार्विस यांना श्रद्धांजली वाहायची होती. तिच्या आईने गृहयुद्धाच्या काळात कार्यकर्ता म्हणून काम केले होते. त्या जेव्हा 1904 मध्ये मरण पावल्या, तेव्हा अॅनाने आईच्या मृत्यूच्या पहिल्या वर्धापनदिनानिमित्त वेस्ट व्हर्जिनियामध्ये एक कार्यक्रम आयोजित केला होता. ज्यामध्ये माता झालेल्या इतर स्त्रियांना पांढरे कार्नेशन, आईचे आवडते फूल भेट दिले. यानंतर त्यांनी ठरवले की दरवर्षी मदर्स डे साजरा केला जावा, त्यासाठी त्यांनी अनेक प्रयत्न केले. शेवटी 1914 मध्ये अमेरिकेचे अध्यक्ष वुड्रो विल्सन यांनी दरवर्षी मे महिन्याचा दुसरा रविवार हा मदर्स डे म्हणून साजरा करण्याची घोषणा केली. अशा प्रकारे मदर्स डे अर्थात मातृदिन साजरा करण्याची सुरुवात झाली.
आई या शब्दासोबत अनेक भावना जोडलेल्या आहेत. माया, ममता, आपुलकी, विश्वास, काळजी अशा कित्येक गोष्टीं या आई पणात सामावलेल्या असतात. कोणताही स्वार्थ किंवा इच्छा न ठेवता आई आपले संपूर्ण आयुष्य मुलांसाठी समर्पित करते. आईच्या त्यागाची आणि योगदानाची परतफेड करण्याचा आपण कितीही प्रयत्न केला, तरीही ते शक्य नाही. त्यामुळे आयुष्यभर तिला वंदन करणे आणि तिच्याप्रती कृतज्ञ राहणे, तिच्या ऋणात राहणे, हेच आवश्यक.
महत्वाचे म्हणजे मदर्स डे या दिवशी केवळ आईलाच नव्हे तर आपल्या आयुष्यात आईची भूमिका बजावणाऱ्या, आपली काळजी घेणाऱ्या प्रत्येक स्त्रीचे आभार मानले पाहिजेत.
अधिक वाचा –
– तब्बल 20 वर्षांनी पुन्हा भरली शाळा ! जुन्या पाखरांच्या किलबिलाटाने एकविरा विद्यालयाचे प्रांगण पुन्हा गजबजले
– दुःखद ! गहुंजे येथे 16 वर्षीय मुलाचा बुडून मृत्यू । Maval News
– वारं फिरलं… आणि एकतर्फी वाटणारी मावळ लोकसभेची निवडणूक अखेर चुरशीची झाली ! Maval Lok Sabha