Dainik Maval News : खडकाळा (कामशेत) ग्रामपंचायतीने केलेली 30 टक्के वाढीव घरपट्टी रद्द करावी, या मागणीसाठी कामशेत ग्रामस्थांनी सोमवारी मावळ पंचायत समिती कार्यालयाच्या प्रवेशद्वाराजवळ आंदोलन केले. यावेळी एका ग्रामस्थाला कुंभकर्णाच्या वेषात झोपवून ‘कुंभकर्णा जागा हो’ अशा घोषणा देत हे आंदोलन करण्यात आले.
- कामशेत ग्रामपंचायतीचे तत्कालीन ग्रामसेवक सोनटक्के यांनी ग्रामस्थांना पूर्वसूचना न देता, कोणत्याही मिळकतीचे सर्वेक्षण न करता 30 टक्के घरपट्टी वाढविली आहे. या कराला ऑगस्टमध्ये झालेल्या ग्रामसभेत नागरिकांनी विरोध केला. विरोध होऊनही 30 टक्के वाढीव घरपट्टी भरण्यासाठी नोटीस बजविण्यात आल्या. त्यानंतर ग्रामस्थांनी याबाबत पत्र व्यवहार केले, आंदोलन केले. तरी देखील करवाढ कमी न केल्याने सोमवारी पंचायत समिती कार्यालयाजवळ आंदोलन करण्याचा निर्णय घेतला.
ही करवाढ अन्यायकारक असून यामुळे नागरिकांना नाहक त्रास होणार आहे, तरी ही करवाढ तत्काळ रद्द करावी, अशी मागणी यावेळी करण्यात आली. वारंवार आंदोलन करूनही दखल न घेतल्याने ग्रामपंचायत प्रशासनाला जागे करण्यासाठी हे आंदोलन केल्याचे यावेळी सांगण्यात आले, असे ग्रामस्थांनी सांगितले. जर ही करवाढ रद्द करण्यात आली नाही, तर यापुढे तीव्र आंदोलन करण्यात येईल, असेही आंदोलकांनी सांगितले आहे.
आंदोलनात अभिमन्यू शिंदे, संजय पडावकर, भाऊसाहेब गायकवाड, संतोष कदम, मोहन वाघमारे, विजय दौंडे, विजय शिंदे, प्रकाश गायकवाड, वसंत काळे, मीना मावकर, सारिका शिंदे, रुपेश गायकवाड, गिरीश रावळ, ऋषिनाथ शिंदे यांच्यासह ग्रामस्थ मोठ्या संख्येने उपस्थित होते.
अधिक वाचा –
– Operation Sindoor : भारताचा पाकिस्तानवर एअर स्ट्राईक ! दहशतवादी तळांवर हल्ले, पहलगाम हल्ल्याचे ‘ऑपरेशन सिंदूर’द्वारे प्रत्युत्तर
– पुणे जिल्ह्यात शहर व ग्रामीण भागात सहा ठिकाणी मॉक ड्रिल यशस्वी ; जिल्हाधिकारी जितेंद्र डुडी यांची माहिती । Pune News
– पर्यटकांच्या सोयीसाठी लोणावळा शहरात वाहनतळ विकसित करावेत – खासदार श्रीरंग बारणे । MP Shrirang Barne
