Dainik Maval News : केंद्रीय गृह मंत्रालयाने सर्व राज्यांना बुधवारी (दि. 7 मे) विविध आपत्कालीन परिस्थितींसाठी सज्जता तपासण्याच्या उद्देशाने मॉक सिक्युरिटी ड्रिल राबविण्याचे निर्देश दिले होते. त्यानुसार पुणे जिल्ह्यात विविध ठिकाणी घेण्यात आलेल्या मॉक ड्रिल अंतर्गत तळेगाव दाभाडे नगरपरिषदेत मॉक ड्रिल घेण्यात आला. या मॉक ड्रिलचा मुख्य उद्देश नागरिकांना आपत्कालीन परिस्थितीचे प्रशिक्षण देणे हा होता. ( Security Mock Drill at Talegaon Dabhade )
केंद्र सरकारच्या निर्देशाप्रमाणे युद्धजन्य परिस्थितीत काळजी घेण्याच्या दृष्टीने तळेगाव नगरपरिषद येथे बुधवारी दुपारी चार वाजता ‘मॉक ड्रिल’ घेण्यात आला. मॉक ड्रिलची गांर्भियता लक्षात घेत सर्व संबंधित यंत्रणांनी अतिशय शिस्तबद्ध पद्धतीने काम केले.
युद्धजन्य परिस्थिती उद्भवल्यास कमीत कमी वेळेत अधिकाधिक नागरिकांपर्यंत मार्गदर्शन आणि मदत पोहोचविण्यासाठी खबरदारी घेण्याच्या दृष्टीने दक्षता म्हणून मॉक ड्रिल घेण्यात आले. यावेळी आपत्कालीन परिस्थिती निर्माण झाल्यास जीवितहानी टाळण्याच्या दृष्टीने विविध प्रात्यक्षिके करण्यात आली.
याप्रसंगी प्रांताधिकारी सुरेंद्र नवले, सहाय्यक पोलीस आयुक्त बाळासाहेब कोपनकर, डीसीपी विशाल गायकवाड, एसीपी सुनील कुराडे, विशाल पाटील, मुख्याधिकारी विजयकुमार सरनाईक, उपमुख्याधिकारी ममता राठोड, बीडीओ कुलदीप प्रधान, आरोग्य अधिकारी सॅमसन सोनवणे, बी. आर. पाटील हे अधिकारी उपस्थित होते. तर, पिंपरी-चिंचवड महानगरपालिका, तळेगाव प्राथमिक आरोग्य केंद्र, खडकाळा प्राथमिक आरोग्य केंद्र येथील, रुग्णवाहिका, पिंपरी-चिंचवड महानगरपालिका, वडगाव नगरपंचायत, तळेगाव दाभाडे नगरपरिषद यांचे अग्निशमक दल सहभागी झाले होते.
मॉक ड्रिलचा उद्देश हवाई हल्ल्याचा इशारा देणारे सायरन वाजविणे, नागरिकांना नागरी संरक्षणाच्या उपाययोजनांचे प्रशिक्षण देणे, शत्रूच्या संभाव्य हल्ल्याच्या वेळी स्वतःचे संरक्षण कसे करावे याबाबत मार्गदर्शन करणे हा होता. तळेगाव येथे मॉक ड्रिल पूर्ण झाल्यानंतर उपस्थित नागरिकांना आपत्कालीन परिस्थितीत काय करावे आणि काय करू नये, याबाबत मार्गदर्शन करण्यात आले.
अधिक वाचा –
– Operation Sindoor : भारताचा पाकिस्तानवर एअर स्ट्राईक ! दहशतवादी तळांवर हल्ले, पहलगाम हल्ल्याचे ‘ऑपरेशन सिंदूर’द्वारे प्रत्युत्तर
– पुणे जिल्ह्यात शहर व ग्रामीण भागात सहा ठिकाणी मॉक ड्रिल यशस्वी ; जिल्हाधिकारी जितेंद्र डुडी यांची माहिती । Pune News
– पर्यटकांच्या सोयीसाठी लोणावळा शहरात वाहनतळ विकसित करावेत – खासदार श्रीरंग बारणे । MP Shrirang Barne
