आंदर मावळ भागातील माऊ गावाच्या हद्दीत टाकवे-वडेश्वर रस्त्यावर बुधवार (14 डिसेंबर) रोजी झालेल्या अपघातात एका व्यक्तीचा दुर्दैवी मृत्यू झाला आहे. पप्पू दारकू हिलम ( वय 35, रा. वडेश्वर) असे या अपघातात मृत्यू पावलेल्या व्यक्तीचे नाव आहे. याप्रकरणी सहादू शिंदे (वय 45 रा. वडेश्वर) यांनी वडगाव मावळ पोलिसांत फिर्याद दिली आहे. ( One Killed Tn Two-Wheeler Accident On Takve Wadeshwar Road Near Mau Village Maval Taluka )
दैनिक मावळचा व्हॉट्सअॅप ग्रुप जॉइन करण्यासाठी इथे क्लिक करा
पोलिसांनी दिलेल्या माहितीनुसार, दिनांक 14 डिसेंबर रोजी साडेबारा वाजण्याच्या सुमारास पप्पू दारकू हिलम हि व्यक्ती मोटारसायकलवर (क्र. एम.एच. 12 एचएम 8412) मुळ गाव बेलजहून पुन्हा माघारी वडेश्वर येथे जात होती. त्यावेळी माऊ गावच्या हद्दीत वळणावर त्याचे मोटार सायकलवरील नियंत्रण सुटले. त्यामुळे पप्पू हिलम मोटारसायकलसह रस्त्याच्या बाजूला असलेल्या ओढ्यात जाऊन पडला. यावेळी दगडावर पडल्याने तो गंभीर जखमी झाला, यात त्याच्या डोक्याला गंभीर दुखापत झाल्याने त्याचा जागीच मृत्यू झाला. सदर प्रकरणाचा पुढील तपास वडगाव मावळ पोलीस करत आहेत.
पप्पू हिलम हे वडेश्वर येथे एका वीटभट्टी कारखान्यावर वीट कामगार म्हणून काम करत होते. त्यांच्या पश्चात पत्नी, दोन मुली, तीन मुले, आई, वडील, दोन भाऊ असा मोठा परिवार आहे. या सर्व परिवाराची जबाबदारी त्यांच्यावर होती. त्यामुळे पप्पू यांच्या जाण्याने या कुटुंबावर आभाळ कोसळले असून त्यांच्या घरातील कर्ता पुरुष गेल्याने त्यांच्यासमोर मोठे आर्थिक संकट आ वासून उभे आहे. त्यामुळे या दुःखातून सावरण्यासाठी आणि प्रपंच चालवण्यासाठी समाजातील दानशूर व्यक्तींनी, लोकप्रतिनिधींनी मदत करावी, अशी अपेक्षा आहे.
अधिक वाचा –
– सरपंचपदाच्या उमेदवार महिलेच्या पतीचा प्रचारादरम्यान मृत्यू; गावकऱ्यांनी घेतलेल्या निर्णयाचे सर्वत्र होतंय कौतूक
– वरसोली, देवळे, कुनेनामा गावात पोलिसांकडून रूट मार्च; भयमुक्त होऊन मतदान करण्याचे मतदारांना आवाहन